Read ქართული ბიბლია, სრული ვერსია Ezekiel 21 Bible Online

Ezekiel 21 - ქართული ბიბლია, სრული ვერსია bible

Ezekiel 21

¹და იყო სიტყვა უფლისა ჩემდამი თქმული:

²ადამის ძევ! მიმართე შენი პირი იერუსალიმისაკენ და იქადაგე საწმიდრებზე და უწინასწარმეტყველე ისრაელის მიწას,

³და უთხარი ისრაელის მიწას, ასე ამბობს-თქო უფალი: აჰა, შენს წინააღმდეგ ვარ; ამოვიწვდი ჩემს მახვილს ქარქაშიდან და მოვკვეთ შენგან მართალსა და ბოროტს.

⁴რომ მოვკვეთო შენგან მართალი და ბოროტი, ამოიწვდება ჩემი მახვილი მისი ქარქაშიდან ყველა ხორციელზე — სამხრეთიდან ჩრდილოეთამდე —

⁵და მიხვდება ყველა ხორციელი, რომ მე, უფალმა, ამოვიწოდე მახვილი ქარქაშიდან, და აღარ ჩაეგება ის.

⁶და შენ, ადამის ძევ! იკვნესე წელმოტეხილმა და გამწარებულმა, იკვნესე მათ თვალწინ.

⁷და რადგან გკითხავენ: რატომ კვნესიო? უთხარი: ხმის გამო, რომელიც მოდის-თქო, და დადნება ყოველი გული, და მოდუნდება ყოველი მკლავი, და დაუძლურდება ყოველი სული, და ყოველი მუხლი გაწყალდება. აჰა, ეს მოვა და ახდება, — ამბობს უფალი ღმერთი.

⁸და იყო სიტყვა უფლისა ჩემდამი თქმული:

⁹ადამის ძევ! იწინასწარმეტყველე და თქვი: ასე ამბობს-თქო უფალი: თქვი: მახვილი, მახვილი გალესილია და გაფერილი!

¹⁰გალესილია, რომ დახოცოს, დაფერილია, რომ ელავდეს! უნდა გვიხაროდეს რომ, ჩემი ძის კვერთხი დასცინის ყველა ხეს?

¹¹და მივეცი დასაფერად, ხელში ასაღებად. გალესილია ეს მახვილი და დაიფერა მკვლელის ხელში გადასაცემად.

¹²ზარი თქვი და ივალალე, ადამის ძევ! რადგან ის ჩემი ერის, ისრაელის, ყველა მთავრის წინააღმდეგ არის მოღერებული! მახვილს არიან მიცემულნი ჩემს ერთან ერთად, ამიტომ უნდა ირტყა თეძოებზე ხელი;

¹³რადგან ის მახვილი უკვე გამოცდილია. და რა არის, თუ კვერთხსაც დასცინის? — ამბობს უფალი ღმერთი.

¹⁴და შენ, ადამის ძევ! იწინასწარმეტყველე და შემოჰკარი ხელი ხელს და გაორკეცდება მახვილი და გასამკეცდება განგმირულთა ზედა, მახვილი დიდი ძლევისა, მათი მდევარი.

¹⁵რათა დადნეს გულები და გამრავლდნენ დაცემულნი. ყველა მათ კარიბჭეზე დავდებ ბასრ მახვილს — მოელვარეს, საკლავად დაფერილს.

¹⁶გაემზადე და წადი მარჯვნივ ან გაემართე მარცხნივ — საითკენაც კი შენი სახე იქნება მიმართული.

¹⁷და მეც შემოვკრავ ხელი ხელს და დავიცხრობ რისხვას. მე, უფალმა, ვთქვი ეს.

¹⁸და იყო სიტყვა უფლისა ჩემს მიმართ ნათქვამი:

¹⁹და შენ, ადამის ძევ! დაადგინე ორი გზა, საიდანაც უნდა შემოვიდეს ბაბილონის მეფის მახვილი. ორივე ის გზა ერთი ქვეყნიდან გამოვა; და დასვი გზამკვლევი ბოძი, ქალაქის გზის დასაწყისში დასვი.

²⁰დასახე გზა, რომლითაც შემოვა მახვილი ყამონიანთა რაბასა და იუდაში, გამაგრებულ ქალაქ იერუსალიმში;

²¹რადგან დადგა ბაბილონის მეფე გზათა გასაყართან, ორი გზის დასაწყისში, სამისნოდ: შეარხია ისრები, ჰკითხა თერაფიმებს, ათვალიერებს ღვიძლს.

²²მის ხელმარჯვნივ იერუსალიმზე იყო წილი, რომ განელაგებინათ ტარანები, ხოცვა-ჟლეტისთვის გაეხსნათ პირი, აეტეხათ საომარი ყიჟინა, ტარანები კარიბჭეებისკენ მიეშვირათ, აღემართათ მიწაყრილები და აეგოთ გოდლები.

²³და იქნება ეს მათ თვალში, როგორც ფუჭი მისნობა; ფიცთა ფიცი აქვთ დადებული, მაგრამ ის ახსენებს იმ ურჯულოებას, რის გამოც შეპყრობილ იქნებიან.

²⁴ამიტომ ასე ამბობს უფალი ღმერთი: რადგან თქვენ გაიხსენეთ თქვენი ურჯულოება, როდესაც გამოამჟღავნეთ თქვენი დანაშაულებანი, რათა გეჩვენებინათ თქვენი ცოდვანი თქვენს ყველა ნამოქმედარში, ისე, როგორც თქვენ იყავით გახსენებულნი, ხელით იქნებით შეპყრობილნი.

²⁵და შენ, ისრაელის ბოროტო მთავარო, რომელსაც დაუდგა ჟამი, როცა უნდა მოეღოს ბოლო დანაშაულს,

²⁶და ასე ამბობს უფალი ღმერთი: მოიშორე ჯიღა და მოიხადე გვირგვინი; ყოველთვის ასე არ იქნება; დამდაბლებული ამაღლდება და ამაღლებული დამდაბლდება.

²⁷ნანგრევებად, ნანგრევებად, ნანგრევებად ვაქცევ მას. და ისიც აღარ იქნება, სანამ ის არ მოვა, ვის ხელშიც არის სამართალი, რომ მას ჩავაბარო.

²⁸და შენ, ადამის ძევ! იწინასწარმეტყველე და თქვი: ასე ამბობს-თქო უფალი ღმერთი ყამონიანებზე და მათ შერცხვენაზე. და თქვი: მახვილი, მახვილია გაშიშვლებული დასახოცად, დაფერილია შესამუსრად, რათა ელვასავით ელავდეს.

²⁹ყალბი ხილვებით, ცრუ მისნობით მიგაგდებენ დახოცილ ბოროტეულთა გვამებთან, რომელთაც დაუდგათ ჟამი, როცა ბოლო უნდა მოეღოს დანაშაულს.

³⁰ჩააგე ქარქაშში. იმ ადგილას, სადაც შეიქმენი, შენი შობის ქვეყანაში განგსჯი შენ.

³¹და გადმოვანთხევ შენზე ჩემს რისხვას, ჩემი წყრომის ცეცხლს დავბერავ შენზე და მიგცემ მძვინვარე, მკვლელობაში გაწაფულ, ადამიანთა ხელთ.

³²ცეცხლის შესაჭმელი იქნები შენ, შენი სისხლი ქვეყნის შუაგულში იქნება და არ გაგიხსენებენ, რადგან მე, უფალმა, ვთქვი ეს.