Read ქართული ბიბლია, სრული ვერსია Ezekiel 23 Bible Online

Ezekiel 23 - ქართული ბიბლია, სრული ვერსია bible

Ezekiel 23

²ადამის ძევ! იყო ორი ქალი, ასული ერთი დედისა.

³და მეძაობდნენ ისინი ეგვიპტეში, სიყმაწვილეშივე იმეძავეს. იქ დაუსრისეს მათ ძუძუები და დაუჭყლიტეს დვრილნი ქალწულობისა.

⁴და სახელები მათი: უფროსისა — ოჰოლა და მისი დისა — ოჰოლიბა. და ჩემები იყვნენ ისინი და მიშვეს ძენი და ასულნი. და სახელები მათი: ოჰოლა სამარია არის და ოჰოლიბა — იერუსალიმი.

⁵და გაბოზდა ოჰოლა ჩემს ხელში და ეტრფოდა თავის საყვარლებს, აშურელ მეომრებს,

⁶ძოწეულით შემოსილ სპასპეტსა და ერისმთავრებს. ყველანი ლამაზი ჭაბუკები იყვნენ — მხედრები, ცხენებზე ამხედრებულნი.

⁷და იმეძავა მათთან, აშურის ყველა რჩეულ ძესთან, ვისაც ეტრფოდა, და ყველა მათი კერპით შეიბილწა.

⁸და თავისი მეძაობა ეგვიპტეში არ მიატოვა, რადგან იწვნენ მასთან მის სიყმაწვილეში და მათ სრისეს მისი სიქალწულის დვრილები და დაღვარეს თავიანთი სიძვა მასზე.

⁹ამიტომ მივეცი მე იგი მისი საყვარლების ხელთ, აშურის ძეთა ხელთ, რომლებსაც ეტრფოდა.

¹⁰მათ გამოაჩინეს მისი სიშიშვლე, მისი ძენი და ასულნი წაიყვანეს, ის კი მახვილით მოკლეს. და გახდა მისი სახელი სირცხვილად ქალთა შორის და მსჯავრი დასდეს მას.

¹¹და დაინახა ეს მისმა დამ, ოჰოლიბამ, და თავის დაზე მეტად გახრწნა თავისი ტრფიალება, და მეძაობით თავისი დის მეძაობას გადააჭარბა.

¹²ისიც აშურის ძეთ ეტრფოდა, სპასპეტთა და ერისმთავართ, თავის მეზობლებს ბრწყინვალედ შემოსილთ, მხედრებს, ცხენებზე ამხედრებულთ — ყველა რჩეულ ჭაბუკს.

¹³და მე ვნახე, რომ შეიბილწა — ერთი გზა ჰქონდა ორივე დას.

¹⁴მოუმატა თავის მეძაობას: ნახა კაცები გამოხატულნი კედელზე, გამოსახულებანი ქალდეველთა, სინგურით დახატული,

¹⁵წელზე სარტყელშემორტყმულნი, თავზე დოლბანდჩამოფარებულნი, მსგავსნი მხედართმთავართა, შესადარნი ბაბილონის ძეთა, რომელთა მშობლიური ქვეყანა ქალდეა არის.

¹⁶და მიეტრფო მათ თვალის ერთი შეხედვით და გაგზავნა მათთან მოციქულნი ქალდეაში.

¹⁷და მივიდნენ მასთან ძენი ბაბილონისა სასიყვარულო სარეცელზე და შებილწეს იგი თავიანთი სიძვით. და შეიბილწა მათგან და განშორდა მათ მისი სული.

¹⁸და გამოაჩინა მან თავისი მეძაობა და გამოაჩინა თავისი სასირცხვო. და განშორდა ჩემი სული მას, როგორც განშორდა ჩემი სული მის დას.

¹⁹და ამრავლა მან თავისი მეძაობა, როცა იხსენებდა თავის სიყმაწვილის დღეებს, როდესაც მეძაობდა ეგვიპტის ქვეყანაში,

²⁰და ეტრფოდა თავის საყვარლებს, რომელთა ხორციც ვირების ხორცია და ულაყთა ქუქუნია მათი ქუქუნი[7].

²¹შენ გაიხსენე გარყვნილება შენი სიყმაწვილისა, როცა ეგვიპტელნი გისრესდნენ შენი სიყმაწვილის ძუძუთა დვრილებს.

²²ამიტომ, ოჰოლიბა, — ასე ამბობს უფალი ღმერთი, — აჰა, მე აღვძრავ შენს საყვარლებს შენზე, რომელთაც მოშორდა შენი სული და მოგისევ მათ ყოველი მხრიდან,

²³ბაბილონის ძეთ და ყველა ქალდეველს, ფეკოდელს, შოაყელს და კოაყელს, აშურის ყველა ძეს მათთან ერთად, ლამაზ ჭაბუკთ, სპასპეტთ და ერისმთავართ, მხედართმთავართ და დიდებულთ — ცხენებით მოდგრიალეთ.

²⁴შეგესევიან საჭურვლით, ცხენებითა და ეტლებით ხალხთა ბრბოები; გარს მოგიცავენ თოროსნები ფარმუზარადით. და მე მიგცემ მათ სამსჯავროდ და დაგდებენ მსჯავრს თავიანთი სამართლით.

²⁵და მოვაწევ ჩემს გულისწყრომას შენზე და რისხვით მოგექცევიან ისინი, ცხვირსა და ყურებს დაგაჭრიან და შენი დანარჩენები მახვილით დაეცემიან. შენს ძეთ და შენს ასულთ ტყვეებად გაირეკავენ და შენს დანარჩენს ცეცხლი შეჭამს.

²⁶სამოსელს შემოგძარცვავენ და წაიღებენ შენს სამკაულებს.

²⁷და აღვკვეთავ შენს გარყვნილებას და შენს ეგვიპტის ქვეყნიდან მოყოლილ შენს მეძაობას, და აღარ მიაპყრობ თვალებს მათ და ეგვიპტეს აღარ გაიხსენებ.

²⁸რადგან ასე ამბობს უფალი ღმერთი: მე გადაგცემ შენ იმათ ხელთ, ვინც შეიძულე, იმათ ხელთ, ვინც მოიშორა შენმა სულმა,

²⁹მოგექცევიან შენ სიძულვილით და წაიღებენ მთელ შენს ქონებას, და დაგტოვებენ შიშველ-ტიტველს, და გამოჩნდება შენი უხამსობის სირცხვილი, შენი გარყვნილება და შენი მეძაობა.

³⁰ეს დაგემართება შენი მეძაობის გამო წარმართებთან, მათი კერპებით რომ შეიბილწე.

³¹შენი დის გზაზე დადიოდი; ამიტომ მოგცემ ხელთ მის სასმისს.

³²ასე ამბობს უფალი ღმერთი: შენი დის სასმისს შესვამ, ღრმასა და ფართოს და იქნები დასაცინი და მასხარად აგდებული; ბევრს იტევს იგი.

³³სიმთვრალითა და ნაღველით აივსები; სასოწარკვეთილებისა და გატიალების სასმისია შენი დის, სამარიის, სასმისი.

³⁴შესვამ მას და გამოწრუპავ, ნაპირებს მოულოკავ და მკერდს დაიგლეჯ, რადგან მე ვთქვი ეს! — ამბობს უფალი ღმერთი.

³⁵ამიტომ ასე ამბობს უფალი ღმერთი: რადგან შენ დამივიწყე და ზურგსუკან მომისროლე, ატარე ახლა შენი გარყვნილებისა და მეძაობის სასჯელი.

³⁶და მითხრა უფალმა მე: ადამის ძევ! მსჯავრი გინდა დასდო ოჰოლასა და ოჰოლიბას? უთხარი მათ მათი სისაძაგლეები.

³⁷რადგან ისინი მეძაობდნენ და ხელი სისხლში აქვთ გასვრილი. თავიანთ კერპებთან მეძაობდნენ და თავის ძეებს, რომლებიც მე მიშვეს, ცეცხლში ატარებდნენ კერპების შესაჭმელად.

³⁸კიდევ აი რა გამიკეთეს მე: შებღალეს ჩემი საწმიდარი იმ დღეს და ჩემი შაბათები შელახეს.

³⁹და როდესაც სწირავდნენ თავის შვილებს თავიანთ კერპებს, იმავე დღეს მოდიოდნენ ჩემს საწმიდარში და ბღალავდნენ მას. აი როგორ იქცეოდნენ ისინი ჩემს სახლში.

⁴⁰ამას გარდა შორიდან მოსასვლელ ხალხსაც კი იბარებდნენ; მოციქული იგზავნებოდა; მოდიოდნენ ისინი, ვისთვისაც იბანებოდი, თვალებს იოლავდი და სამკაულებით ირთვებოდი;

⁴¹ბრწყინვალე საწოლზე ჯდებოდი და გაწყობილი ტაბლა იდგა მის წინ და ზედ ჩემს საკმეველსა და ჩემს ზეთს აწყობდი.

⁴²უდარდელი ბრბოს ხმა გაისმოდა იქ და ამ უამრავ ხალხთან მოჰყავდათ უდაბნოდან საბეელები, რომლებიც სამაჯურებს უკეთებდნენ ხელებზე მათ და თავზე ლამაზ გვირგვინებს ადგამდნენ.

⁴³და მე ვთქვი მეძაობით გაცვეთილებზე: ახლა კი დამთავრდება მისი მეძაობა მასთან ერთად.

⁴⁴და მოდიოდნენ მასთან, როგორც მიდიან მეძავ ქალთან, ისე მოდიოდნენ ოჰოლასთან და ოჰოლიბასთან — გარყვნილ ქალებთან.

⁴⁵მაგრამ მართალი ხალხი განსჯის მათ გარყვნილთა მსჯავრით და სისხლისმღვრელთა მსჯავრით, რადგან გარყვნილნი არიან და სისხლია მათ ხელებზე.

⁴⁶რადგან ასე ამბობს უფალი ღმერთი: ბრბო მიუსიე მათ და მიეცი ისინი ძრწოლასა და ძარცვა-გლეჯას.

⁴⁷და ჩაქოლავს მათ კრებული ქვით, და დაჩეხავენ მათ თავისი მახვილებით, მათ ძეთა და ასულთ დახოცავენ და მათ სახლებს ცეცხლში დასწვავენ.

⁴⁸და შევწყვეტ გარყვნილებას ამ ქვეყანაზე და ყველა ქალი ისწავლის ჭკუას და არ მოიქცევიან თქვენი გარყვნილებისამებრ.

⁴⁹და თქვენზევე მოაქცევენ თქვენს გარყვნილებას და იტვირთავთ თქვენს კერპთა ცოდვებს, და მიხვდებით, რომ მე ვარ უფალი ღმერთი.