Read ქართული ბიბლია, სრული ვერსია Ezekiel 25 Bible Online

Ezekiel 25 - ქართული ბიბლია, სრული ვერსია bible

Ezekiel 25

¹და იყო სიტყვა უფლისა ჩემდამი თქმული:

²ადამის ძევ! მიაქციე პირი ყამონიანებისკენ, და იწინასწარმეტყველე,

³და უთხარი ყამონის ძეთ: ისმინეთ სიტყვა უფალი ღმერთისა: ასე ამბობს-თქო უფალი ღმერთი: რაკი აუგს ამბობ ჩემს საწმიდარზე, რადგან შეიბღალა იგი, — და ისრაელის მიწაზე, რადგან აოხრდა, და იუდას სახლზე, რადგან ტყვეობაშია წაყვანილი, —

⁴ამიტომ აჰა, მე მიგცემ შენ აღმოსავლეთის ძეთ სამკვიდროდ. და მოაწყობენ შენს მიწაზე თავიანთ ბანაკებს და გაშლიან თავიანთ კარვებს, შეჭამენ შენი მიწის ნაყოფს და დალევენ შენს რძეს.

⁵რაბას ვაქცევ აქლემთა საძოვრებად, და ყამონიანთა ქვეყანას — ცხვრის ფარეხებად. და მიხვდებით, რომ მე ვარ უფალი.

⁶რადგან ასე ამბობს უფალი ღმერთი: ტაშს რომ უკრავდი და ბუქნას რომ უვლიდი და მთელი შენი სულის ზიზღით ხარობდი ისრაელიანთა უბედურებაზე,

⁷ამიტომ, აჰა, ხელს მოგიღერებ და მიგცემ ხალხებს საძარცვავად, და მოგკვეთავ ხალხებიდან, და მოგსპობ ქვეყნებიდან; გაგანადგურებ და მიხვდები, რომ მე ვარ უფალი.

⁸ასე ამბობს უფალი ღმერთი: რადგან ასე ამბობენ მოაბი და სეყირი: აჰა, როგორც ყველა სხვა ხალხები, ისეა სახლი იუდასი,

⁹ამიტომ, აჰა, მე გავარღვევ მოაბის სიმაგრეებს — ქალაქებს, მის სასაზღვრო ქალაქებს, ქვეყნიერების მშვენებებს: ბეთ-იეშიმოთს, ბაყალ-მეყონს და კირიათაიმს

¹⁰აღმოსავლეთის ძეთათვის და სამემკვიდრეოდ მივცემ მათ, ყამონის ძეებიანად, რათა აღარ იხსენიებოდნენ ყამონიანები ხალხებში,

¹¹და მოაბს დავდებ მსჯავრს და მიხვდებიან, რომ მე ვარ უფალი.

¹²ასე ამბობს უფალი ღმერთი: რაკი შურისგებით ექცეოდა ედომი იუდას სახლს და შესცოდა, მის მიმართ შურისძიებით,

¹³ამიტომ ასე ამბობს უფალი ღმერთი: ხელს მოვუღერებ ედომს და მოვსპობ კაცსა და პირუტყვს, და უდაბნოდ ვაქცევ; თემანიდან დედანამდე ყველა მახვილით დაეცემა.

¹⁴და აღვასრულებ შურისგებას ედომზე ჩემი ერის, ისრაელის ხელით და მოექცევიან ედომს ჩემი რისხვისა და გულისწყრომისამებრ; მაშინ მიხვდებიან ჩემს შურისგებას, — ამბობს უფალი ღმერთი.

¹⁵ასე ამბობს უფალი ღმერთი: იმის გამო, რომ ფილისტიმელნი შურისძიებით იქცეოდნენ და სულის ზიზღით იძიებდნენ შურს მოსასპობად მარადიული მტრობით,

¹⁶ამიტომ ასე ამბობს უფალი ღმერთი: აჰა, მე ხელს მოვუღერებ ფილისტიმელებს და მოვსპობ ქერეთელებს და გავანადგურებ მათ ნატამალს ზღვის პირას;

¹⁷და აღვასრულებ მათზე დიდ შურისგებას მრისხანე სასჯელებით; და მიხვდებიან, რომ მე ვარ უფალი, როცა შურს ვიძიებ მათზე.