Read ქართული ბიბლია, სრული ვერსია Ezekiel 31 Bible Online

Ezekiel 31 - ქართული ბიბლია, სრული ვერსია bible

Ezekiel 31

¹მეთერთმეტე წლის, მესამე თვის პირველ დღეს იყო სიტყვა უფლისა ჩემდამი თქმული:

²ადამის ძევ! უთხარი ფარაონს, ეგვიპტის მეფეს, და მის ხალხს: თავს ვის უტოლებ-თქო შენი სიდიადით?

³აჰა, აშური — კედარი ლიბანისა, რტომშვენიერი და ჩრდილოვანი ტევრი; ზრომაღალი იყო და ღრუბლებს სწვდებოდა მისი კენწერო.

⁴წყლებმა გაზარდეს ის და უფსკრულმა აამაღლა; მდინარეები გარს უვლიდნენ მის ნერგს და თავიანთ ნაკადებს უგზავნიდნენ ველის ყოველ ხეს.

⁵ამიტომაც ამაღლდა ველის ყველა ხეზე მეტად და გაუხშირდა რტო; და, როცა ზრდა დაიწყო, ბევრი წყლისაგან დაუგრძელდა ტოტები.

⁶მის რტოებში იბუდებდა ცის ყველა ფრინველი; მისი ტოტების ქვეშ შობდა ველის ყველა ცხოველი; და მის ჩრდილში ცხოვრობდნენ მრავალრიცხოვანი ხალხები.

⁷მშვენდებოდა თავისი სიმაღლით, თავისი გრძელი ტოტებით, რადგან ფესვები დიდ წყლებში ჰქონდა გადგმული.

⁸ღვთის ბაღის კედრებმა ვერ დაჩრდილეს იგი; კვიპაროსები ვერ ედრებოდნენ თავისი რტოებით; და ჭადრები ვერ იყო მისი რტოების მსგავსი; ღვთის ბაღის ვერც ერთი ხე ვერ უსწორდებოდა მის სილამაზეს.

⁹მშვენიერი შევქმენი იგი თავისი ხშირი ტოტებით; და შურდა მისი სილამაზე ყველა ხეს ღვთის ბაღში.

¹⁰ამიტომ ასე ამბობს უფალი ღმერთი: იმიტომ, რომ ზრო აიყარა და კენწეროთი ღრუბლებს მისწვდა და აღზევდა მისი გული მისი სიმაღლით,

¹¹ხელთ მივეცი იგი ხალხთა მბრძანებელს; და მან მიაგო მას მისაგებელი მისი; მისი ბოროტების გამო უარვყავ იგი.

¹²და მოკვეთეს ის უცხოთესლისებმა, უსასტიკესებმა ხალხთა შორის, და მიატოვეს მთებსა და ხეობებში; და დაიყარა მისი ტოტები ველ-მინდვრებზე და ჩაილეწა მისი რტოები ღარტაფებში. და გამოვიდნენ მისი ჩრდილიდან ქვეყნიერების ყველა ხალხები და მიატოვეს ის.

¹³ცის ფრინველებმა დაიბუდეს მის დაყრილ ტოტებში და მიწის მხეცებმა დაიდეს ბუნაგები.

¹⁴ნუ გამედიდურდებიან თავისი სიმაღლით წყლის პირს გაზრდილი ხეები და არ მისწვდნენ კენწეროთი ღრუბღრუბლებს, და წყლის პირს გაზრდილმა ხეებმა არ დაჩაგრონ სხვა ხეები; რადგან ყველანი სასიკვდილოდ არიან განწირულნი ქვეშეთისათვის საფლავში ჩასულ ადამის ძეთა შორის.

¹⁵ასე ამბობს უფალი ღმერთი: შავეთში მისი ჩასვლის დღეს გლოვა გავუმართე მას, უფსკრული დავგმანე მის გამო, და შევაჩერე მისი მდინარეები, და შევაკავე დიდი წყლები და დავამწუხრე მასზე ლიბანი, და ველ-მინდვრის ყოველი ხე დაღონდა მის გამო.

¹⁶მისი დაცემის ხმაზე შევაძრწუნე ხალხები, როდესაც შავეთში ჩავიყვანე ის, საფლავებში ჩასულებთან, და გაიხარა შავეთის ქვეყანაში ედემის ყველა ხემ, ლიბანის რჩეულმა და საუკეთესომ, ყველა წყლის მსმელმა.

¹⁷რადგან ისინიც მასთან ერთად ჩავიდნენ შავეთში მახვილით დაცემულებთან, და მისი შემწენიც მის ჩრდილში მსხდომნი, ხალხებს შორის.

¹⁸ვის ედარები პატივითა და სიდიდით ედემის ხეთა შორის? ახლა კი ედემის ხეთა მსგავსად ჩაყვანილ იქნები შავეთში და მახვილით დაცემულ წინადაუცვეთელთა შორის დაწვები. ასე მოუვა ფარაონსა და მთელ მის გამედიდურებულ ხალხს, — ამბობს უფალი ღმერთი.