Read ქართული ბიბლია, სრული ვერსია Ezekiel 32 Bible Online

Ezekiel 32 - ქართული ბიბლია, სრული ვერსია bible

Ezekiel 32

¹მეთორმეტე წელს, მეთორმეტე თვის პირველ დღეს იყო სიტყვა უფლისა ჩემდამი თქმული:

²ადამის ძევ! იწყე მოთქმა ფარაონზე, ეგვიპტის მეფეზე, და უთხარი მას: როგორც ლომის ბოკვერი ხალხებს შორის და ურჩხული ზღვებზე, ისე აწყდები შენს მდინარეებს და შენი თათებით ამღვრევ წყლებს, და თელავ მათ დინებებს.

³ასე ამბობს უფალი ღმერთი: მოვისვრი შენზე ჩემს ბადეს ხალხთა კრებულში და ამოგათრევენ ისინი ჩემი სათხევლით

⁴და მიგაგდებ მიწაზე, მინდვრის პირას მიგატოვებ და დავაბინავებ შენზე ცის ყველა ფრინველს, და გავაძღობ შენით მიწის ყველა მხეცს.

⁵და დავყრი შენს ხორცს მთებზე და გავავსებ ხევ-ხუვებს შენი მძორით.

⁶შენს სისხლს შევასმევ მიწას მთების კალთებამდე და კალაპოტები გაივსება შენით.

⁷და როდესაც ჩაქრები, მე დავფარავ ზეცას და დავაბნელებ მის ვარსკვლავებს, მზეს ღრუბლით დავფარავ და მთვარე არ გაანათებს თავისი ნათელით.

⁸ყველა მნათობს დაგიბნელებ ცაზე და წყვდიადს დავამკვიდრებ შენს მიწაზე, — ამბობს უფალი ღმერთი.

⁹შევაშფოთებ მრავალი ხალხების გულს, როდესაც გამოვაცხადებ შენს დაცემას ხალხებში, ქვეყნებში, რომლებიც შენ არ იცოდი.

¹⁰და გავაოგნებ შენით მრავალ ხალხებს, და მათი მეფენი შეძრწუნდებიან შენს გამო, როცა მოვიქნევ ჩემს მახვილს მათ წინაშე, და იკანკალებს ყოველ წამს თითოეული თავისი დაღუპვის შიშით შენი დაცემის დღეს.

¹¹რადგან ასე ამბობს უფალი ღმერთი: ბაბილონის მეფის მახვილი მოვაო შენზე.

¹²მამაცთა მახვილით დავცემ შენს ხალხს; ყველა ისინი — უსასტიკესნი არიან წარმართთა შორის, და წარწყმედენ ეგვიპტის სიამაყეს; და განადგურდება მთელი მისი სიმრავლე.

¹³გავწყვეტ მთელ მის პირუტყვს დიდ წყლებთან, და ადამიანის ფეხი აღარ აამღვრევს მათ, და არც საქონლის ჩლიქი აამღვრევს მათ.

¹⁴მაშინ დავამდორებ მათ წყლებს, და მათ მდინარეებს ზეთივით ვადენ, — ამბობს უფალი ღმერთი.

¹⁵როცა გავაუდაბურებ ეგვიპტის მიწას და დაცარიელდება მისი სავსე ქვეყანა, როდესაც განვგმირავ მის ყველა მცხოვრებს, მიხვდებიან, რომ მე ვარ უფალი.

¹⁶ეს არის საგოდებელი სიმღერა, რომელსაც იგოდებენ; ხალხთა ასულნი იგოდებენ მას; ეგვიპტესა და მის სიმრავლეზე იგოდებენ მას, — ამბობს უფალი ღმერთი.

¹⁷მეთორმეტე წელს, იმ თვის მეთხუთმეტე დღეს იყო სიტყვა უფლისა ჩემდამი თქმული:

¹⁸ადამის ძევ! დაიტირე ეგვიპტის ამაყი ხალხი, და ჩაიყვანე ის და ასულნი ძლიერი ხალხებისა შავეთში საფლავებში ჩამავლებთან ერთად.

¹⁹ვის აღემატები შენ? ჩადი და დაწექი წინადაუცვეთელებთან.

²⁰ისინი დაეცემიან მახვილით დაცემულებთან ერთად, და ისიც მიეცა მახვილს; წაათრიეთ ისიც და მთელი მისი სიმრავლეც.

²¹შავეთში ილაპარაკებენ მასზე და მის შემწეებზე უძლიერესნი ძლიერთა შორის; ისინი დაეცნენ და იქვე წვანან მახვილით განგმირულნი წინადაუცვეთელთა გვერდით.

²²იქაა აშური და მთელი მისი მხედრობა; მის ირგვლივაა მისი საფლავები; ყველა მახვილითაა განგმირული და დაცემული.

²³მისი საფლავები შავეთის უფსკრულშია, და მისი მხედრობა მისი საფლავის ირგვლივაა, ყველა განგმირულნი, მახვილით დაცემულნი, ისინი, ვინც შიშის ზარს ჰგვრიდნენ ცოცხალთა ქვეყანას.

²⁴იქაა ყელამი მთელი მისი სიმრავლით მისი საფლავის ირგვლივ, ყველა ის განგმირული, მახვილით დაცემული, რომლებიც წინადაუცვეთელებთან ერთად ჩავიდნენ შავეთში, რომლებიც შიშის ზარს ჰგვრიდნენ ცოცხალთა ქვეყანას და ატარებენ თავიანთ შერცხვენას საფლავებში ჩასულებთან ერთად.

²⁵განგმირულთა შორის მისცეს მას საწოლი მთელ მის მხედრობასთან ერთად; მის ირგვლივაა მათი საფლავები; ყველანი წინადაუცვეთელნი არიან, მახვილით დაცემულნი; და როგორც ისინი შიშის ზარს ჰგვრიდნენ ცოცხალთა ქვეყანას, ისე ატარებენ თავიანთ შერცხვენას საფლავში ჩასულებთან ერთად და განგმირულნი არიან განგმირულთა შორის.

²⁶იქ არიან მეშექი და თუბალი მთელი მათი სიმრავლით; მის ირგვლივაა მათი საფლავები, ყველანი წინადაუცვეთელნი არიან, მახვილით განგმირულნი, რადგან შიშის ზარს ჰგვრიდნენ ცოცხალთა ქვეყანას.

²⁷ნუთუ არ უნდა იწვნენ ისინი წინადაუცვეთელ გმირთაგან დაცემულებთან, რომელნიც ჩავიდნენ შავეთში თავიანთი საომარი საჭურვლიანად და თავქვეშ ამოიდეს მახვილები, და მათ ძვლებზე დარჩა მათი ურჯულოება, რადგან ის ძლიერნი შიშის ზარს ჰგვრიდნენ ცოცხალთა ქვეყანას.

²⁸და შენ წინადაუცვეთელთა შორის დაილეწები და მახვილით განგმირულებთან ერთად დაწვები.

²⁹იქაა ედომი და მისი მეფენი და ყველა მისი მთავარნი, რომელნიც თავიანთი ძლიერების მიუხედავად მახვილით დაეცნენ და წინადაუცვეთელთა და საფლავში ჩასულთა შორის წვანან.

³⁰იქ არიან ჩრდილოეთის ხელმწიფენი, ყველა ისინი, და ყველა ციდონელი, რომელნიც ჩავიდნენ განგმირულებთან ერთად, მათი ზარდამცემი ძლიერებით სირცხვილნაჭამნი და წვანან წინადაუცვეთელნი მახვილით განგმირულებთან ერთად და თან აქვთ წაღებული თავიანთი სირცხვილი საფლავში ჩასულებთან ერთად.

³¹მათ იხილავს ფარაონი და ინუგეშებს მთელი მისი სიმრავლის გამო, მახვილით განგმირულთა გამო, ფარაონი და მთელი მისი ლაშქარი, — ამბობს უფალი ღმერთი.

³²რადგან მე მოვგვრი შიშის ზარს ცოცხალთა ქვეყანას, და დაწვება ფარაონი და მთელი მისი სიმრავლე მახვილით განგმირულ წინადაუცვეთელთა შორის, — ამბობს უფალი ღმერთი.