Read ქართული ბიბლია, სრული ვერსია Ezekiel 39 Bible Online

Ezekiel 39 - ქართული ბიბლია, სრული ვერსია bible

Ezekiel 39

¹და შენ, ადამის ძევ! იწინასწარმეტყველე გოგზე და თქვი: ასე ამბობს-თქო უფალი ღმერთი: გაფრთხილდი, შენს წინააღმდეგ ვარ, გოგ, როშის, მეშექისა და თუბალის მთავარო!

²მოგაბრუნებ და წამოგიძღვები, და ამოგიყვან ჩრდილოეთის კიდეებიდან და მოგიყვან ისრაელის მთებზე.

³და გაგდებინებ მშვილდს მარცხენა ხელიდან და ისრებს — მარჯვენა ხელიდან.

⁴ისრაელის მთებზე დაეცემით შენ, და მთელი შენი ურდოები და ხალხები, რომლებიც შენთან არიან. მტაცებელ ფრინველებსა და ველის ნადირს მიგცემ შესაჭმელად.

⁵ტრიალ მინდორზე დაეცემი, რადგან მე ვთქვი, — ამბობს უფალი ღმერთი.

⁶გავგზავნი ცეცხლს მაგოგში და უზრუნველ ზღვისპირელებში და მიხვდებიან, რომ მე ვარ უფალი.

⁷და ჩემს წმიდა სახელს გამოვაცხადებ ჩემს ერში, ისრაელიანებში, და აღარ შეიბღალება ჩემი წმიდა სახელი, და მიხვდებიან წარმართნი, რომ მე, უფალი, წმიდა ვარ ისრაელში.

⁸აჰა, ეს მოდის და ახდება, — ამბობს უფალი ღმერთი, — ეს ის დღეა, რომელზეც მე ვლაპარაკობდი.

⁹და გამოვლენ ისრაელის ქალაქების მცხოვრებნი და გააჩაღებენ ცეცხლს და დაწვავენ საჭურველს, დიდსა და პატარა ფარებს, მშვილდებსა და ისრებს, კომბლებსა და შუბებს და გააჩაღებენ ყველაფერ ამით ცეცხლს შვიდ წელიწადს.

¹⁰და აღარ გაზიდავენ მინდვრიდან შეშას, და აღარ გაჩეხავენ ტყეებს, რადგან საჭურვლით გააჩაღებენ ცეცხლს, და გაძარცვავენ თავიანთ მძარცველთ და წაართმევენ თავიანთ დამყაჩაღებელთ, — ამბობს უფალი ღმერთი.

¹¹და იმ დღეს იქნება, რომ მივცემ გოგს დასამარხ ადგილს ისრაელში, დასავლეთიდან მომავალთა ხეობაში, და გზას გადაუღობავს მომავალთ; იქ დამარხავენ გოგს და მთელს მის ურდოს; და დაერქმევა მას გოგის ურდოსხევი.

¹²შვიდ თვეს მოუნდება მათ დამარხვას ისრაელის სახლი, რათა გაწმინდოს ქვეყანა.

¹³და დამარხავს მათ ამ ქვეყნის მთელი ერი; და სასახელო იქნება ის დღე, როცა დიდებით გამოვჩნდები, — ამბობს უფალი ღმერთი.

¹⁴და საგანგებო კაცებს გამოარჩევენ ქვეყნად მავალთაგან, რომ მათთან ერთად დამარხონ ზემოთ დარჩენილნი, რათა გაწმინდონ მიწა. შვიდი თვის ბოლოს დაუწყებენ ძებნას ზემოთ დაყრილთ.

¹⁵და გაივლიან ქვეყნად მავალნი და დაინახავს ვინმე ადამიანის ძვალს, დადგამს მის გვერდით ნიშანს, სანამ არ დამარხავენ მას მესაფლავენი გოგის ურდოსხევში.

¹⁶და ქალაქის სახელი იქნება ხამონა (ურდო). და ასე გაწმენდენ ქვეყანას.

¹⁷და შენ, ადამის ძევ, — ასე ამბობს უფალი ღმერთი, — უთხარი ყოველ ფრთოსანსა და ველის ყოველ ცხოველს: შეგროვდით და მოდით, შეიკრიბეთ ყოველი მხრიდან ჩემს მსხვერპლთან, რომელსაც მე დავკლავ თქვენთვის, დიდ მსხვერპლთან ისრაელის მთებზე; და შეჭამთ ხორცსა და შესვამთ სისხლს.

¹⁸ძლიერთა ხორცს შეჭამთ და შესვამთ ამ ქვეყნის მთავართა სისხლს, როგორც ბაშანში ნასუქალი ვერძების, კრავების, ვაცებისა და ხარების სისხლს.

¹⁹მაძღრივ შეჭამთ ლურთებს და დათრობამდე შესვამთ სისხლს ჩემი საკლვი მსხვერპლისა, რომელსაც თქვენთვის დავკლავ.

²⁰და გაძღებით ჩემს სუფრაზე ცხენიცა და მხედარიც, და ყოველი მეომარი, — ამბობს უფალი ღმერთი.

²¹და გამოვაჩენ ჩემს დიდებას წარმართთა შორის და დაინახავს ყველა წარმართი ჩემს სამართალს, რომელიც აღვასრულე, და ჩემს ხელს, რომელსაც დავდებ მათზე.

²²და მიხვდება ისრაელის სახლი, რომ მე ვარ მათი უფალი ღმერთი ამ დღიდან და შემდგომაც.

²³და მიხვდებიან წარმართნი, რომ თავისი ურჯულოების გამო წარიტყვენა ისრაელის სახლი; იმის გამო, რომ მიმუხთლეს და მე ზურგი ვაქციე მათ და მივეცი ისინი მათ მტრებს; და მახვილით დაეცნენ ყველა ისინი.

²⁴მათი სიბილწისა და დანაშაულის გამო გავაკეთე მე ეს და ზურგი ვაქციე მათ.

²⁵ამიტომ ასე ამბობს უფალი ღმერთი: ახლა დავაბრუნებ იაკობს ტყვეობიდან და შევიწყნარებ მთელ ისრაელის სახლს, და შურს ვიძიებ ჩემი წმიდა სახელისათვის.

²⁶და მიხვდებიან ისინი თავიანთ სირცხვილს და მთელ თავიანთ ურჯულოებას, რასაც აკეთებდნენ ჩემს წინაშე, როცა იცხოვრებენ თავიანთ მიწაზე უსაფრთხოდ და აღარავინ იქნება მათი შემშინებელი.

²⁷როდესაც დავაბრუნებ მათ ხალხებიდან და შემოვკრებ მათ მათი მტრების ქვეყნებიდან, და გამოვაჩენ ჩემს დიდებას მრავალი ხალხების თვალწინ,

²⁸და მიხვდებიან ისინი, რომ მე ვარ უფალი, მათი ღმერთი, რომელმაც განვდევნე ისინი წარმართებში და კვლავ შევკრიბე თავიანთ მიწაზე და არ დავტოვებ იქ არც ერთ მათგანს;

²⁹და აღარ დავფარავ მეტად ჩემს სახეს მათგან, რათა გადმოვღვარო ჩემი სული ისრაელის სახლზე, — ამბობს უფალი ღმერთი.