Read ქართული ბიბლია, სრული ვერსია Ezekiel 4 Bible Online

Ezekiel 4 - ქართული ბიბლია, სრული ვერსია bible

Ezekiel 4

¹და შენ, ადამის ძევ, აიღე თიხის ფირფიტა, წინ დაიდე და ზედ დახაზე იერუსალიმი.

²გამოსახე ალყა მის წინააღმდეგ, მოაწყვე სანგრები და აღმართე მის წინააღმდეგ მიწაყრილები, და განალაგე მის წინააღმდეგ ბანაკები, და დააყენე ტარანები ირგვლივ.

³შენ კი აიღე რკინის დაფა და დადგი იგი რკინის კედლად შენსა და ქალაქს შორის, და მიმართე სახე მისკენ, და შემოარტყი ალყა. ეს იქნება ნიშანი ისრაელის სახლისა.

⁴დაწექი მარცხენა გვერდზე და ზედ დაიდე ისრაელის სახლის ცოდვა. და რამდენ დღესაც იწვები მასზე, იმდენ ხანს ატარებ მათ ცოდვებს.

⁵და მე მიგითვლი მათი უკეთურების წლებს დღეების რიცხვის მიხედვით — 390 დღეს — და ატარებ ისრაელის სახლის უკეთურებას.

⁶და შეასრულე ეს და შემდეგ დაწექი მარჯვენა გვერდზე, და ატარე იუდას სახლის უკეთურება 40 დღეს; თითო წელზე თითო დღეს ჩაგითვლი.

⁷იერუსალიმის ალყისაკენ მიმართე შენი სახე და შიშველი მკლავი და იწინასწარმეტყველე მასზე.

⁸და მე დაგადებ შენ ბორკილებს და ვერ გადატრიალდები ერთი გვერდიდან მეორე გვერდზე შენი ალყის დღეების დასრულებამდე.

⁹შენ კი, აიღე შენთვის ხორბალი და ქერი, ცერცვი და ოსპი, ფეტვი და ასლი და ჩაყარე ერთ ჭურჭელში და გქონგეს საჭმელად იმდენ ხანს, რამდენსაც გვედზე იწვები — 390 დღეს უნდა ჭამო ის.

¹⁰საჭმელი, რაც უნდა ჭამო, წონით დღეში 20 შეკელი უნდა იყოს. ჟამიდან ჟამზე ჭამე.

¹¹და წყალი წყვით სვი — მეექვსედი ჰინი, ჟამიდან ჟამზე სვი.

¹²და ჭამე ქერის კვერებივით იგი და ადამიანის სკორეს ფუნაზე გამოაცხვე მათ თვალწინ.

¹³და თქვა უფალმა: ასე შეჭამენ ისრაელის ძენი თავიანთ უწმიდურ პურს იმ ხალხებში, რომლებთანაც განვდევნი მათ.

¹⁴და ვთქვი: ოჰ, უფალო, ღმერთო! აჰა, ჩემი სული არ შებილწულა და მძორი და ნამხეცავი არ მიჭამია ჩემი სიჭაბუკიდან დღემდე, და ჩემს პირში არ ჩასულა უწმიდური ხორცი.

¹⁵და მითხრა მან მე: ნახე! მე გაძლევ ძროხის წივას, ადამიანის სკორეს ნაცვლად და მასზე გამოიცხვე პური.

¹⁶და კიდევ მითხრა: ადამის ძევ, აჰა, მე შევმუსრავ პურის მარაგს იერუსალიმში და ისინი პურს წონითა და სიმწრით შეჭამენ; და წყალს წყვითა და შიშით შესვამენ.

¹⁷რადგან მოაკლდებათ მათ პური და წყალი; და შეძრწუნებულნი დაუწყებენ ყურებას ერთმანეთს და ჩამოდნებიან თავიანთი უკეთურებით.