Read ქართული ბიბლია, სრული ვერსია Ezekiel 41 Bible Online

Ezekiel 41 - ქართული ბიბლია, სრული ვერსია bible

Ezekiel 41

¹შემდეგ შემიყვანა მან ტაძარში და გაზომა სვეტებს შუა ექვსი წყრთა სიგანე ერთი მხრიდან და ექვსი წყრთა სიგანე მეორე მხრიდან. ეს იყო კარვის სიგანე.

²სიგანე შესასვლელისა 10 წყრთა; შესასვლელის ფრთა ხუთი წყრთა ერთ მხარეს და ხუთი წყრთა მეორე მხარეს; გაზომა მისი სიგრძე 40 წყრთა და სიგანე 20 წყრთა.

³და შევიდა შიგნით და გაზომა შესასვლელის სვეტებში კართან ორი წყრთა და შესასვლელი ექვსი წყრთა, და შესასვლელის სიგანე — შვიდი წყრთა.

⁴და გაზომა მისი სიგრძე 20 წყრთა და სიგანეც 20 წყრთა ტაძრისა, და მითხრა: ეს არის წმიდათა წმიდა.

⁵და გაზომა ტაძრის კედელი ექვსი წყრთა და სიგანე გვერდითი სენაკებისა ოთხ-ოთხი წყრთა ტაძრის ირგვლივ.

⁶გვერდითი სენაკები 33 იყო, სენაკი სენაკის გვერდით; და მიუყვებოდა ტძრის კედელს ირგვლივ, რომ ერთმანეთით ყოფილიყვნენ გამაგრებული და ტაძრის კედელს არ დაყრდნობოდნენ.

⁷გვერდითი სენაკების სიგანე ფართოვდებოდა მაღლა და მაღლა ტარძრის გარშემო, რადგან ტაძარიც განივრდებოდა მაღლა და მაღლა, ისე რომ ქვედა სართულიდან ზედა სართულზე შუადან იყო ასასვლელი.

⁸დავინახე, სახლს ჰქონდა შემაღლებული ბაქანი ირგვლივ; გვერდითი სენაკების საფუძველი სრული ექვსი წყრთა იყო.

⁹გვერდითი სენაკების გარეთა კედლის სიგანე ხუთი წყრთა იყო, ხოლო ცარიელი ადგილი იყო ტაძრის გვერდით სენაკებს შორის.

¹⁰მანძილი სენაკებს შორის 20 წყრთა იყო ტაძრის ირგვლივ.

¹¹გვერდითი სენაკიდან ღია სივრცეში იყო გასასვლელები, ერთი გასასვლელი ჩრდილოეთისკენ და ერთი გასასვლელი სამხრეთისკენ; ღია სივრცის სიგანე ხუთი წყრთა იყო ირგვლივ.

¹²შენობა, რომელიც მოედნის წინ იდგა დასავლეთისკენ, სიგანით 70 წყრთა იყო; შენობის კედლის სიგანე ხუთი წყრთა იყო ირგვლივ და სიგრძე — 90 წყრთა.

¹³გაზომა ტაძრის სიგრძე 100 წყრთა; მოედანი შენობითურთ და მისი კედლები სიგრძით 100 წყრთა.

¹⁴ტაძრის სიგანე წინა მხარეს და მოედნისა აღმოსავლეთისკენ 100 წყრთა.

¹⁵გაზომა შენობის სიგრძე მოედნის წინ, მის უკანა მხარეს, თავისი გვერდითი სენაკებით ორივე მხარეს გაზომა 100 წყრთა შიდა ტაძრიანად და ეზოს სტოებითურთ.

¹⁶კარების ზღურბლები და ცხაურიანი სარკმლები და გვერდითი სენაკები ირგვლივ, სამთავე სართულად, ზღურბლების წინ, ხით იყო მოპირკეთებული, ასევე იატაკიდან სარკმლებამდე; სარკმლები ყრუ იყო.

¹⁷შესასვლელის თავზე, როგორც ტაძრის შიგნით, ასევე გარეთ, და მთელ კედელზე ირგვლივ, შიგნიდან და გარედან, მოჩუქურთმებული გამოსახულებები იყო.

¹⁸და ამოკვეთილი იყო ქერუბიმები და ფინიკები. და ფინიკი იყო ქერუბიმსა და ქერუბიმს შორის, და ორ-ორი სახე ჰქონდა ყოველ ქერუბიმს.

¹⁹ადამიანის სახე იყო მიმართული ფინიკისაკენ ერთი მხრიდან, და ლომის ბოკვერის სახე ფინიკისაკენ მეორე მხრიდან. ასე იყო ირგვლივ მთელ ტაძარში.

²⁰იატაკიდან შესასვლელის თავამდე ქერუბიმები და ფინიკები იყო გამოსახული, ასევე ტაძრის კედლებზე.

²¹ტაძრის კარის წირთხლები ოთხკუთხედი იყო, და საწმიდარსაც ისეთივე შესახედაობა ჰქონდა.

²²ხის სამსხვერპლო სიმაღლით სამი წყრთა იყო, სიგრძე — ორი წყრთა. მისი კუთხეები, მისი კვარცხლბეკი და მისი კედლები ხისა იყო; და მითხრა მან: ეს არის მაგიდა, რომელიც უფლის წინაშეა.

²³ორ-ორი კარი ჰქონდა ტაძარსაც და წმიდათა წმიდასაც.

²⁴თითოეულ კარს ორი ფრთა ჰქონდა, ორივე იღებოდა. ორი ფრთა ერთ კარს და ორი ფრთა მეორე კარს.

²⁵ტაძრის კარებზე ქერუბიმები და ფინიკები იყო გამოსახული, ისეთი, როგორც კედლებზე. გარეთ, სტოას წინ, ხის ზღურბლი იყო.

²⁶და ცხაურიანი სარკმლები ფინიკებით სტოას კედლების ორივე მხარეს.