Read ქართული ბიბლია, სრული ვერსია Ezekiel 6 Bible Online

Ezekiel 6 - ქართული ბიბლია, სრული ვერსია bible

Ezekiel 6

¹და იყო სიტყვა უფლისა ჩემდამი თქმული:

²ადამის ძევ! პირი მიაქციე ისრაელის მთებისაკენ და უწინასწარმეტყველე მათ,

³და უთხარი: მთანო ისრაელისა! ისმინეთ სიტყვა უფალი ღმერთისა: ასე უთხრა უფალმა ღმერთმა მთებს, ბორცვებს, ველებსა და ღელეებს: აჰა, მე მომაქვს თქვენზე მახვილი და მოვსპობ თქვენს სამსხვერპლო მაღლობებს.

⁴და დაინგრევა თქვენი სამსხვერპლოები და დაილეწება თქვენი მზის სვეტები და დაეცემიან თქვენი განგმირულები თქვენი კერპების წინ.

⁵და დავყრი ისრაელიანთა გვამებს მათი კერპების წინ და გავფანტავ თქვენს ძვლებს თქვენი სამსხვერპლოების ირგვლივ.

⁶მთელს თქვენს სამკვიდროში აოხრდება ქალაქები და დაინგრევა სამსხვერპლო მაღლობები, რათა გატიალდეს და განადგურდეს თქვენი სამსხვერპლოები, და დაილეწოს და მოისპოს თქვენი კერპები, და დაემხოს თქვენი მზის სვეტები და აღმოიფხვრას თქვენი ხელით ნაქნარი.

⁷და დაეცემიან განგმირულები თქვენს შორის და გაიგებთ, რომ მე ვარ უფალი.

⁸მე დავტოვებ თქვენს ნატამალს, და გეყოლებათ მახვილს გადარჩენილნი, როდესაც გაიფანტებით ქვეყნებში.

⁹და გამიხსენებს მე თქვენი ნატამალი იმ ხალხებში, რომელთა შორისაც ტყვეებად იქნებიან, როდესაც შევმუსრავ მათ გარყვნილ გულებს, რომლებიც განდგნენ ჩემგან, და მათ თვალებს, რომლებიც მეძაობდნენ თავიანთი კერპების კვალზე, და შეზიზღდებათ საკუთარი თავი იმ უკეთურების გამო, რასაც სჩადიოდნენ მთელ თავიანთ სისაძაგლეებთან.

¹⁰და გაიგებენ, რომ მე ვარ უფალი და ამაოდ არ ვამბობდი, რომ მოვაწევდი მათ ამ უბედურებას.

¹¹ასე ამბობს უფალი ღმერთი: შემოჰკარი ხელი ხელს და ფეხი დაჰკარ მიწას და თქვი: ვაგლახ! ისრაელის სახლის ყველა ბოროტი სისაძაგლის გამო, რადგან დაეცემიან მახვილით, შიმშილითა და შავი ჭირით!

¹²შორსმყოფი შავი ჭირით მოკვდება და ახლოსმყოფი მახვილით დაეცემა; ხოლო გადარჩენილი და ალყაშემორტყმული შიმშილით მოკვდება. და ასე დავასრულებ ჩემს რისხვას მათზე.

¹³და გაიგებთ, რომ მე ვარ უფალი, როდესაც თქვენი განგმირულები დაეცემიან თავიანთ კერპებს შორის, მათი სამსხვერპლოების ირგვლივ, ყველა მაღალ ბორცვზე, ყველა მთის თხემზე და ყველა ხემხვივანის ქვეშ და ყველა რტოგაშლილი მუხის ქვეშ, იმ ადგილებზე, სადაც კეთილსურნელებებას უკმევდნენ კერპებს.

¹⁴და გავიწვდენ ჩემს ხელს მათზე და ვაქცევ იმ ქვეყანას ოხრად და ტიალად დიბლას[1] უდაბნოზე უარესად, ყოველ მათ სამკვიდროში და გაიგებენ, რომ მე ვარ უფალი.