Read ქართული ბიბლია, სრული ვერსია Ezekiel 8 Bible Online

Ezekiel 8 - ქართული ბიბლია, სრული ვერსია bible

Ezekiel 8

¹იყო მეექვსე წელს, მეექვსე თვის მეხუთე დღეს, როცა ვიჯექი მე ჩემს სახლში და იუდას უხუცესნი ისხდნენ ჩემს წინ. და დაეშვა იქ ჩემზე ხელი უფალი ღმერთისა.

²და, აჰა, დავინახე რაღაც მსგავსება ცეცხლის კაცისა. წელს ქვემოთ ცეცხლი იყო, წელს ზემოთ კი გავარვარებული ლითონივით ელვარებდა.

³და მან გამოიწვდინა თავისი ხელის მსგავსება, თმებში ჩამავლო, და ამწია სულმა ცასა და მიწას შორის, და მიმიყვანა ღვთიურ ხილვებში იერუსალიმში ჩრდილოეთით მიმართულ შიდა კარიბჭის შესასვლელთან, იქ, სადაც დადგმული იყო შურისგების კერპი, რომელიც უფლის რისხვას აღძრავს.

⁴და იქ იყო ისრაელის ღმერთის დიდება, მსგავსი ჩვენებისა, რომელიც ვიხილე ველზე.

⁵და მითხრა: ადამის ძევ! მიაპყარ თვალი ჩრდილოეთის გზას. და მივაპყარ თვალი ჩრდილოეთის გზას და დავინახე სამსხვერპლოს კარიბჭის ჩრდილოეთით ის შურისგების კერპი.

⁶და მითხრა: ადამის ძევ! განა არ ხედავ რას აკეთებენ? დიდ სისაძაგლეს, რომელსაც ისრაელის სახლი აკეთებს აქ, რათა მოვშორდე ჩემს ტაძარს! მაგრამ წამომყევი და ნახავ სხვა დიდ სისაძაგლეებს.

⁷და მიმიყვანა ეზოს შესასვლელში და ვიხილე ერთი ხვრელი კედელში.

⁸და მითხრა: ადამის ძევ! გამოთხარე კედელი. გამოვთხარე კედელი და ვნახე შესასვლელი.

⁹და მითხრა: მიდი და ნახე ბოროტი სისაძაგლენი, რასაც ისინი სჩადიან აქ.

¹⁰და მივედი მე და ვნახე ყველანაირი გამოსახულება ქვეწარმავლისა და ბილწი ცხოველისა. ყველანაირი კერპი ისრაელის სახლისა ამოკვეთილი იყო ირგვლივ მთელ კედელზე.

¹¹ისრაელის სახლის უხუცესთაგან 70 კაცი დგას მათ წინ და იააზანია შაფანის ძეც იდგა მათ შორის. და იდგნენ ისინი კერპების წინაშე და თითოეულს თავისი სასაკმევლე ეჭირა ხელში და სქელი ბოლქვები საკმევლისა ადიოდა მაღლა.

¹²და მითხრა: ხომ ნახე, ადამის ძევ, რასაც ისრაელის სახლის უხუცესნი აკეთებენ სიბნელეში, თითოეული თავის მოხატულ ოთახში? რადგან ამბობენ: უფალი ვერ გვხედავსო ჩვენ. დატოვაო უფალმა ეს ქვეყანა!

¹³და კიდევ მითხრა: კიდევ დაბრუნდი და ნახავ დიდ სისაძაგლეებს, რომელთაც ისინი აკეთებენ.

¹⁴და მიმიყვანა მე უფლის ტაძრის კარიბჭის შესასვლელთან, რომელიც ჩრდილოეთისკენაა, და ვიხილე იქ ქალები, რომლებიც ისხდნენ და თამუზსა ჰგოდებდნენ.

¹⁵და მითხრა: ხომ ხედავ, ადამის ძევ? კიდევ წამოდი, ნახავ ამაზე დიდ სისაძაგლეებს.

¹⁶და შემიყვანა უფლის ტაძრის შიდა ეზოში და დავინახე უფლის ტაძრის შესასვლელთან, კარიბჭესა და სამსხვერპლოს შორის, ოცდახუთიოდე კაცი ზურგშექცევით რომ იდგნენ უფლის ტაძრისაკენ. მათ პირი აღმოსავლეთისკენ ჰქონდათ მიპყრობილი და თაყვანს სცემდნენ მზეს აღმოსავლეთით.

¹⁷და მითხრა: ხომ ნახე, ადამის ძევ? ცოტაა იუდას სახლისათვის ამ სისაძაგლეთა კეთება, რომელსაც ისინი აკეთებენ აქ? რადგან აავსეს ეს ქვეყანა ძალადობით და მიიქცნენ ჩემს გასაწყრომად; და, აჰა, რტოები თავადვე მიაქვთ თავის ცხვირთან.

¹⁸და მეც მოვექცევი მათ გულისწყრომით, არ შეიცოდებს ჩემი თვალი მათ და არ შევიბრალებ მე. და, თუნდაც ყურში ჩამკიოდნენ, არ მოვუსმენ მათ.