Read ქართული ბიბლია, სრული ვერსია Ezekiel 9 Bible Online

Ezekiel 9 - ქართული ბიბლია, სრული ვერსია bible

Ezekiel 9

¹და ჩამძახა ყურში უფალმა დიდი ხმით და მითხრა: მოახლოვდა ქალაქის დასჯა; და თითოეულს ხელთ უპყრია გამანადგურებელი იარაღი.

²და, აჰა, ექვსი კაცი მოდის ზემო კარიბჭის გზით, რომელიც ჩრდილოეთისკენაა მიმართული, და თითოეულს ხელთ უპყრია გამანადგურებელი იარაღი; და მათ შორის ერთი კაცია სელით შემოსილი და მწიგნობრის სამელნე უდევს სარტყელში, და მოვიდნენ და დადგნენ ბრინჯაოს სამსხვერპლოსთან.

³და ისრაელის უფალი ღმერთის ბრწყინვალე მშვენიერება, ქერუბიმს რომ ედგა, აიწია და გაემართა ტაძრის ზღურბლისაკენ და სელით შემოსილ კაცს მოუხმო, რომელსაც მწიგნობრის სამელნე ედო სარტყელში.

⁴და უთხრა მას: შედი ქალაქ იერუსალიმში და შუბლზე ნიშნები დაადე ადამიანებს, რომელნიც კვნესიან და მოსთქვამენ იმ სისაძაგლეთა გამო, რაც მათ შორის ხდება.

⁵და სხვა დანარჩენთ უთხრა ჩემს გასაგონად: მიჰყევით მის კვალს ქალაქში და ყველა დახოცეთ, ნუ შეიბრალებს თქვენი თვალი და ნუ დაინდობთ!

⁶მოხუცი, ჭაბუკი და ქალწული, ბავშვი და ქალი ამოხოცეთ. და ყოველ კაცს, რომელსაც ნიშანი აზის შუბლზე, ნუ შეეხებით. ჩემი ტაძრიდან დაიწყეთ. და დაიწყეს მოხუცი ადამიანებიდან, რომელნიც ტაძრის წინ იყვნენ.

⁷და უთხრა მათ: შებილწეთ ეს ტაძარი და გაავსეთ ეზოები განგმირულებით და გადით! და გავიდნენ ისინი ქალაქში და დაიწყეს ხალხის ხოცვა-ჟლეტა.

⁸და როდესაც დახოცეს და მე დავრჩი, პირქვე დავემხე, შევღაღადე და ვუთხარი: ოჰ, უფალო ღმერთო! ნუთუ გაწყვეტ ისრაელის მთელს ნატამალს, რისხვას რომ აფრქვევ იერუსალიმზე?

⁹და მან მითხრა მე: ურჯულოება ისრაელის სახლისა და იუდასი მეტისმეტად დიდია. გაივსო ეს ქვეყანა სისხლით და ქალაქი სავსეა სიცრუითა და უწმიდურებით, რადგან ამბობენ: დატოვა უფალმა ეს ქვეყანა და ვერაფერს ხედავსო.

¹⁰არ შეიბრალებს ჩემი თვალი და არ დავინდობ, მათსავე საქციელს დავატეხ თავს.

¹¹და, აჰა, იმ კაცმა, სელით შემოსილმა, რომელსაც მწიგნობრის სამელნე ედო სარტყელში, პასუხად მოიტანა: როგორც მიბრძანე, ისე მოვიქეციო.