Read ქართული ბიბლია, სრული ვერსია Daniel (Hebrew) 10 Bible Online

Daniel (Hebrew) 10 - ქართული ბიბლია, სრული ვერსია bible

Daniel (Hebrew) 10

¹სპარსეთის მეფე კიროსის ხელმწიფების მესამე წელს გამოცხადება ჰქონდა დანიელს, ბელტეშაცარად წოდებულს. ჭეშმარიტი იყო ეს გამოცხადება და დიდი ძალის მქონე. მან გაიგო ეს გამოცხადება და მიხვდა ამ ხილვას.

²იმ დღეებში მე, დანიელი, სამი შვიდეულის მანძილზე მგლოვიარე ვიყავი.

³გემრიელი პური არ მიჭამია; ხორცი და ღვინო პირში არ ჩამიშვია, და ნელსაცხებელი არ მიმიკარებია, ვიდრე სამი შვიდეული არ დასრულდა.

⁴პირველი თვის ოცდამეოთხე დღეს, დიდი მდინარის, ტიგროსის, პირას ვიყავი,

⁵თვალი ავახილე და დავინახე: აჰა, სელით შემოსილი კაცი დგას, წელი უფაზის ოქროთი აქვს შემოსარტყლული.

⁶ტანი ქრიზოლითს მიუგავდა, სახე — ელვას, თვალები — ანთებულ ლამპრებს, მკლავები და წვივები — მბზინვარე ბრინჯაოს, სიტყვის ბგერადობა — ბევრი ხალხის გუგუნს.

⁷მხოლოდ მე, დანიელმა, ვიხილე ეს ხილვა, ხოლო მათ, ვინც ჩემთან იყვნენ, ვერ დაინახეს ეს ხილვა, დიდი შიში დაეცა მათ და დასამალად გაიქცნენ.

⁸მე მარტო დავრჩი და ვუყურებდი ამ დიად ხილვას, ღონე აღარ შემრჩა, სახე გამიხურდა და სიმხნევე დავკარგე.

⁹მისი სიტყვების ბგერადობა შემომესმა და მისი სიტყვების ბგერადობის გაგონებისთანავე გაოგნებული დავემხე და მიწაზე ვეგდე პირქვე.

¹⁰და, აჰა, ხელი შემეხო და წამომაყენა მუხლებზე და ხელის გულებზე.

¹¹და მითხრა მან: „დანიელ, სასურველო კაცო! ჩასწვდი ამ სიტყვებს, მე რომ გეტყვი, და მუხლებში გაიმართე, რადგან შენთანა ვარ ახლა მოვლენილი.“ როცა ეს სიტყვები მითხრა, აცახცახებული წამოვდექი.

¹²მითხრა: „ნუ გეშინია, დანიელ! რადგან პირველივე დღიდან, რაც შენი გული გონიერებასა და შენი ღვთის მორჩილებას მიეცი, შესმენილია შენი სიტყვები, და მეც შენი სიტყვების გამო მოვედი.

¹³სპარსეთის სამეფოს მთავარი 21 დღე მეწინააღმდეგებოდა; და, აჰა, ჩემს საშველად მოვიდა მიქაელი, ერთ-ერთი პირველ მთავართაგანი, და მე იქ დავრჩი სპარსეთის მეფეებთან.

¹⁴ახლა კი მოვედი, რომ გაგაგებინო, თუ რა ბედი ეწევა შენს ერს უკანასკნელ დღეებში, რადგან ეს ხილვაც იმ შორეულ დღეებს შეეხება.“

¹⁵როცა ამ სიტყვებს მეუბნებოდა, მიწაზე პირქვე დავემხე და დავმუნჯდი.

¹⁶და, აჰა, ადამიანის ძის მსგავსი, შეეხო ჩემს ბაგეს, და მე გავხსენი ბაგე და ავლაპარაკდი და ვუთხარი ჩემს წინ მდგომს: „ჩემო ბატონო! ამ ხილვისგან ტკივილებმა დამიარეს ნაწლავებში, და ძალი ვეღარ მოვიკრიბე.

¹⁷როგორ შეუძლია ჩემი ბატონის მსახურს ელაპარაკოს ჩემს ასეთ ბატონს? რადგან აღარც ძალი შემრჩა და სუნთქვაც შემეკრა.“

¹⁸მაშინ კვლავ შემეხო კაცის იერის მქონე და გამამაგრა

¹⁹და მითხრა: „ნუ გეშინია, სასურველო კაცო! მშვიდობა შენდა; გამაგრდი, გამაგრდი!“ როცა მელაპარაკებოდა, გავმაგრდი და ვუთხარი: „ილაპარაკე, ჩემო ბატონო, რადგან შენ გამამაგრე.“

²⁰მითხრა: „თუ იცი, რისთვის მოვედი შენთან? ახლა სპარსეთის მთავართან საომრად უნდა გავბრუნდე, და, როცა მე გავალ, აჰა, მაშინ მოვა იავანის მთავარი.

²¹მაგრამ მე გაუწყებ ჭეშმარიტების წიგნში დაწერილს: არავინა მყავს, ვინც მომეხმარებოდა მათ წინააღმდეგ, გარდა მიქაელისა, თქვენი მთავრისა.“