Read ქართული ბიბლია, სრული ვერსია Daniel (Hebrew) 3 Bible Online

Daniel (Hebrew) 3 - ქართული ბიბლია, სრული ვერსია bible

Daniel (Hebrew) 3

¹გააკეთა მეფე ნაბუქოდონოსორმა ოქროს კერპი, 60 წყრთა სიმაღლისა და ექვსი წყრთა სიგანისა. და ბაბილონის ქვეყანაში დადგა იგი, დურას ველზე.

²ხალხი დაგზავნა ნაბუქოდონოსორმა, რათა სატრაპნი, მთავარნი, მეფისნაცვალნი, მრჩეველნი, მეგანძურენი, მსაჯულნი, რჯულისკაცნი და განმგებელნი შეყრილიყვნენ და მოსულიყვნენ იმ კერპის სატფურებაზე[4], მეფე ნაბუქოდონოსორმა რომ აღმართა.

³მაშინ შეიკრიბნენ სატრაპნი, მთავარნი, მეფისნაცვალნი, მრჩეველნი, მეგანძურენი, მსაჯულნი, რჯულისკაცნი და მხარეთა განმგებელნი იმ კერპის სატფურებაზე, რომელიც მეფე ნაბუქოდონოსორმა აღმართა, და დადგნენ ისინი იმ კერპის წინ.

⁴მაშინ ქადაგმა რიხიანად დაიძახა: „თქვენ გიცხადებთ, ერებო, ტომებო და სხვადასხვა ენებზე მოლაპარაკე ადამიანებო,

⁵როგორც კი საყვირის, სალამურის, ბობღნის, სამბუკის, ქნარის, სტვირის და სხვა საკრავების ხმას გაიგონებთ, პირქვე დაემხეთ და თაყვანი ეცით ამ ოქროს კერპს, მეფე ნაბუქოდონოსორმა რომ აღმართა.

⁶ვინც არ დაემხობა და თაყვანს არა სცემს, იმწამსვე ცეცხლით გავარვარებულ ქურაში იქნება ჩაგდებული!“

⁷ამიტომ, როგორც კი ერებმა და ტომებმა გაიგონეს საყვირის, სალამურის, ბობღნის, სამბუკის, ქნარისა და სხვა საკრავების ხმა, ყველა ხალხები, ტომები და ენები დაემხნენ და თაყვანი სცეს ოქროს კერპს, რომელიც მეფე ნაბუქოდონოსორმა აღმართა.

⁸ამ დროს მოვიდა ზოგიერთი ქალდეველი და ბრალს სდებდა იუდაელთ.

⁹მათ უთხრეს ნაბუქოდონოსორ მეფეს: „მეფეო, იცოცხლე უკუნისამდე!

¹⁰მეფეო, შენ განკარგულება გაეცი, რომ ყოველი კაცი, რომელიც კი საყვირის, სალამურის, სამბუკის, ქნარის, სტვირისა და ყველა სხვა საკრავის ხმას გაიგონებდა, დამხობილიყო და ოქროს კერპისთვის ეცა თაყვანი;

¹¹ხოლო ის, ვინც არ დაემხობოდა და თაყვანს არ სცემდა, ჩაგდებული იქნებოდა ცეცხლით გავარვარებულ ღუმელში.

¹²მაგრამ არიან იუდაელნი, რომელთაც შენ ბაბილონის ქვეყნის საქმეები ჩააბარე: შადრაქი, მეშაქი და ყაბედ-ნეგო. მეფეო, ეს კაცები არ დაემორჩილნენ შენს განკარგულებას. ისინი არც შენს ღმერთებს ემსახურებიან და არც იმ ოქროს კერპს სცემენ თაყვანს, შენ რომ აღმართე.“

¹³მაშინ განრისხებულმა ნაბუქოდონოსორმა ბრძანა შადრაქის, მეშაქისა და ყაბედ-ნეგოს მოყვანა. და მოჰგვარეს მეფეს ეს კაცები.

¹⁴ნაბუქოდონოსორმა უთხრა მათ: „შადრაქ, მეშაქ და ყაბედ-ნეგო, ნუთუ განზრახ არ ემსახურებით ჩემს ღმერთებს და თაყვანს არ სცემთ იმ ოქროს კერპს, მე რომ აღვმართე?

¹⁵ახლა კი მოემზადეთ და საყვირის, სალამურის, ბობღნის, სამბუკის, ქნარის, სტვირისა და სხვა ყველანაირი საკრავის ხმის გაგონებაზე, დაემხეთ და თაყვანი ეცით იმ კერპს, მე რომ გავაკეთე, ხოლო თუ თაყვანი არ გიციათ, იმწამსვე ცეცხლით გავარვარებულ ღუმელში იქნებით ჩაყრილი. მაშინ ვნახოთ რომელი ღმერთი დაგიხსნით ჩემი ხელიდან?“

¹⁶შადრაქმა, მეშაქმა და ყაბედ-ნეგომ მიუგეს მეფეს: „ნაბუქოდონოსორ, ჩვენ არ ვსაჭიროებთ, გიპასუხოთ მაგაზე.

¹⁷მეფეო, ჩვენს ღმერთს, რომელსაც ვემსახურებით, შესწევს ძალი, რომ ცეცხლით გავარვარებული ღუმლიდანაც კი გადაგვარჩინოს და შენი ხელიდანაც დაგვიხსნას.

¹⁸და თუ ასეც არ მოხდება, იცოდე, მეფეო, ჩვენ მაინც არ მოვემსახურებით შენს ღმერთებს და თაყვანს არა ვცემთ იმ ოქროს კერპს, შენ რომ აღმართე.“

¹⁹მაშინ ნაბუქოდონოსორი გულისწყრომით აღივსო, შადრაქზე, მეშაქზე და ყაბედ-ნეგოზე გაბრაზებულს სახე შეეცვალა და ბრძანება გასცა, ღუმელი შვიდჯერ უფრო მეტად გაეხურებინათ, ვიდრე ჩვეულებრივ ახურებდნენ.

²⁰და უბრძანა თავის საუკეთესო მხედრებს, შეეკრათ შადრაქი, მეშაქი და ყაბედ-ნეგო და ცეცხლით გავარვარებულ ღუმელში ჩაეყარათ.

²¹მაშინ ეს კაცები შეკრეს ისევე ჩაცმულები და თავსაბურველითა და სხვა სამოსლითურთ და ცეცხლით გახურებულ ღუმელში ჩაყარეს.

²²რაკი მკაცრი იყო მეფის ბრძანება და ღუმელი მეტისმეტად იყო გახურებული, ის კაცები, რომლებიც შადრაქს, მეშაქსა და ყაბედ-ნეგოს ყრიდნენ ღუმელში, ცეცხლის ალმა დახოცა.

²³ხოლო ის სამნი: შადრაქი, მეშაქი და ყაბედ-ნეგო გავარვარებულ ღუმელში შებოჭილნი ჩაცვივდნენ...

²⁴მაშინ გაოცებული ნაბუქოდონოსორი ფეხზე წამოიჭრა და უთხრა თავის მრჩეველთ: „განა ჩვენ სამი შეკრული კაცი არ ჩავაგდეთ ცეცხლში?“ მათ პასუხად მიუგეს მეფეს: „ჭეშმარიტად ასეა, მეფეო!“

²⁵მიუგო მეფემ და თქვა: „აჰა, ოთხ ხელ-ფეხ გახსნილ კაცს ვხედავ, შუაგულ ცეცხლში რომ მიმოდიან უვნებლად. მეოთხე შესახედაობით ღვთის შვილსა ჰგავს.“

²⁶მაშინ მიდგა ნაბუქოდონოსორი გავარვარებული ღუმლის კართან და შესძახა: „შადრაქ, მეშაქ და ყაბედ-ნეგო, მაღალი ღმერთის მსახურნო, გამოდით და აქ მოდით!“ მაშინ შადრაქი, მეშაქი და ყაბედ-ნეგო გამოვიდნენ შუა ცეცხლიდან.

²⁷შემოიკრიბნენ სატრაპნი, მთავარნი, მეფისნაცვალნი და მრჩეველნი და ნახეს, რომ ამ კაცების ტანზე ცეცხლს თავისი ძალა ვერ მიეტანა: თავზე თმებიც კი არ შეტრუსოდათ, სამოსელიც არ ალანძოდათ და ნატისუსალიც კი არ ასდიოდათ.

²⁸მაშინ ნაბუქოდონოსორმა შესძახა: „კურთხეულია ღმერთი შადრაქისა, მეშაქისა და ყაბედ-ნეგოსი, რომელმაც მოავლინა თავისი ანგელოზი და იხსნა თავისი მსახურნი, რომლებიც მას მიენდვნენ, არ დაემორჩილნენ მეფის ბრძანებას და საკუთარი სხეული ცეცხლს მისცეს, რათა თავიანთი ღმერთის გარდა, სხვა ღმერთისთვის არ ეცათ თაყვანი!

²⁹ამიტომ ვბრძანებ: ყოველი ხალხი, ტომი ან ენა, რომელიც შადრაქის, მეშაქის და ყაბედ-ნეგოს ღმერთზე აუგს იტყვის, ასო-ასო აიკუწოს, მისი სახლი კი ნანგრევებად იქცეს. რადგან არ არსებობს სხვა ღმერთი, ასე რომ შეეძლოს ხსნა.“

³⁰მაშინ მეფემ კვლავ აღამაღლა ბაბილონის ქვეყანაში შადრაქი, მეშაქი და ყაბედ-ნეგო.