Read ქართული ბიბლია, სრული ვერსია Daniel (Hebrew) 6 Bible Online

Daniel (Hebrew) 6 - ქართული ბიბლია, სრული ვერსია bible

Daniel (Hebrew) 6

¹დარიოსმა გადაწყვიტა, თავის სამეფოში 120 სატრაპი დაეყენებინა, რათა მთელს სამეფოში ყოფილიყვნენ.

²მათ კი სამი მთავარი დაუყენა, მათ შორის ერთი დანიელი, რათა სატრაპებს მათთვის ჩაებარებინათ ანგარიში, რომ მეფეს საზრუნავი არ ჰქონოდა.

³მაშინ სხვა მთავრებსა და სატრაპებზე მეტად გამოირჩა დანიელი, რადგან მასში საკვირველი სული იყო, და მეფე ფიქრობდა მთელი სამეფოს მთავრად დაეყენებინა იგი.

⁴მაშინ მთავრებმა და სატრაპებმა საბაბს დაუწყეს ძებნა, რომ დანიელისთვის სამეფოს მართვის საქმეში ბრალი დაედოთ. მაგრამ რაიმე საბაბისა და შეცოდების პოვნა ვერ მოახერხეს, რადგან ერთგული იყო იგი და რაიმე შეცდომა ან დანაშაული არ აღმოაჩნდა.

⁵მაშინ ამ კაცებმა თქვეს: „დანიელს ვერავითარ ბრალს ვერ ვუპოვნით, მისი საწინააღმდეგო მისივე ღმერთის რჯულში თუ არ ვიპოვეთ.“

⁶მთავრები და სატრაპები საჩქაროდ მიადგნენ მეფეს და უთხრეს: „მეფე დარიოს, იცოცხლე უკუნისამდე!

⁷სამეფოს ყველა მთავრებმა, მეფისნაცვლებმა, სატრაპებმა, მრჩევლებმა და მხედართმთავრებმა მოითათბირეს, რათა გამოცემულიყო სამეფო დადგენილება და შემოღებულიყო მტკიცე აკრძალვა, რომ ყველა, ვინც კი 30 დღის განმავლობაში რომელიმე ღმერთს ან კაცს, შენს გარდა, მეფეო, რაიმე თხოვნით მიმართავდა, ლომების ხაროში ჩაეგდოთ.

⁸ახლა კი, მეფეო, დაამტკიცე ეს აკრძალვა და ხელი მოაწერე სიგელს, რომ შეუცვლელი იყოს ეს ბრძანება, მიდიელთა და სპარსელთა კანონისამებრ, რომლთა გაუქმებაც შეუძლებელია.“

⁹ამიტომ ხელი მოაწერა მეფე დარიოსმა ამ ბრძანების სიგელს.

¹⁰როდესაც დანიელმა შეიტყო, რომ ასეთი სიგელი იქნა ხელმოწერილი, შინ წავიდა. მისი ზემოთვალის სარკმლები იერუსალიმის მხარეს იყო გაღებული. დღეში სამჯერ იდრეკდა მუხლს, ლოცულობდა და მადლს სწირავდა თავისი ღმერთის წინაშე, როგორც ამას მანამდეც აკეთებდა.

¹¹მაშინ ამ კაცებმა დაუყარაულეს და წაასწრეს დანიელს, როცა იგი ლოცულობდა და თავისი ღმერთისგან წყალობას ითხოვდა.

¹²შემდეგ ეახლნენ მეფეს და მოახსენეს მისი ბრძანების დარღვევის თაობაზე: „მეფეო, განა შენ არ დაწერე ბრძანება, რომ ყველა ის კაცი, რომელიც 30 დღის განმავლობაში, შენს გარდა, რომელიმე ღმერთს ან კაცს, თხოვნით მიმართავდა, ლომების ხაროში უნდა ჩაეგდოთ?“ მიუგო მეფემ და უთხრა მათ: „მართალია, სპარსელთა და მიდიელთა კანონის დარღვევა შეუძლებელია.“

¹³მაშინ მიუგეს მათ მეფეს: „მეფეო, დანიელი, იუდადან ტყვედ რომ არის წამოყვანილი, არც შენ გაქცევს ყურადღებას და არც შენს მიერ ხელმოწერილ ბრძანებას; დღეში სამჯერ შესთხოვს თავის ღმერთს.“

¹⁴ეს რომ მეფემ გაიგო, ძალზე შეწუხდა, დანიელის ხსნა ჩაიდო გულში და მზის ჩასვლამდე ცდილობდა როგორმე ეშველა მისთვის.

¹⁵მაშინ ის კაცები მივიდნენ და უთხრეს: „იცოდე, მეფეო, მიდიელთა და სპარსელთა კანონია, რომ მეფის ყოველი აკრძალვა და დადგენილება უცვალებელი უნდა იყოს.“

¹⁶მაშინ ბრძანა მეფემ და მოიყვანეს დანიელი. და მათ ლომების ხაროში ჩააგდეს იგი. მეფემ კი უთხრა დანიელს: „შენმა ღმერთმა, რომელსაც ერთგულად ემსახურები, იმან გიხსნას!“

¹⁷მოიტანეს ლოდი და იმ ხაროს დაადეს თავზე. მეფემ იგი თავისი ბეჭდითა და დიდკაცების ბეჭდებით დაბეჭდა, რათა დანიელის მიმართ არაფერი შეცვლილიყო.

¹⁸მერე თავის სასახლეში წავიდა მეფე. ღამე მარხულმა გაატარა, თავშესაქცევი არ მოუტანიათ მის წინაშე, და ძილიც გაუკრთა.

¹⁹განთიადის ალიონზე ადგა მეფე და ლომების ხაროს მიაშურა.

²⁰ორმოს რომ მიუახლოვდა, ნაღვლიანი ხმით ჩასძახა დანიელს: „დანიელ, ცოცხალი ღმერთის მსახურო, აბა, თუ შეძლო შენი ხსნა ლომებისგან იმ ღმერთმა, მუდამ რომ ემსახურები?“

²¹მაშინ გამოეპასუხა დანიელი მეფეს: „მეფეო, იცოცხლე უკუნისამდე!

²²ჩემმა ღმერთმა თავისი ანგელოზი მოავლინა, ლომებს პირები აუკრა და მათაც არა მავნეს რა, რადგან ღვთის წინაშეც სუფთა აღმოვჩნდი და შენს წინაშეც ბრალი არა მაქვს, მეფეო.“

²³მაშინ დიდად გაიხარა მეფემ და ბრძანა, დანიელი ხაროდან ამოეყვანათ. ამოიყვანეს დანიელი ხაროდან. არაფერი ვნებოდა, რადგან მას სწამდა თავისი ღმერთისა.

²⁴მეფემ ბრძანა და მოიყვანეს ის კაცები, რომელთაც დანიელი დააბეზღეს, და ლომების ხაროში ჩაყარეს ისინი და მათი შვილები და ცოლები. ჯერ ხაროს ძირამდე არც კი ჩაეღწიათ მათ, რომ ებდღვნენ ლომები და ძვლებიანად დახრეს.

²⁵მაშინ დარიოსმა ყველა ხალხს, ტომს და ენას — მთელი ქვეყნის მკვიდრებს — მისწერა: „მშვიდობა გაგიმრავლდეთ!

²⁶ბრძანებას ვიძლევი, რომ ჩემი სამეფოს ყველა სამთავროში ძრწოლა და შიში ჰქონდეთ დანიელის ღმერთის წინაშე, რადგან იგი ცოცხალი და მარადმყოფელი ღმერთია, მისი სამეფო შეუმუსრავია და მისი ხელმწიფება — უსასრულო;

²⁷იგი შველის და იხსნის, სასწაულებსა და ნიშნებს ახდენს ცაზე და მიწაზე. მან იხსნა დანიელი ლომებისგან.“

²⁸და წარმატებული იყო დანიელი, როგორც დარიოსის მეფობაში, ასევე კიროს სპარსელის მეფობის დროსაც.