Read ქართული ბიბლია, სრული ვერსია Daniel (Hebrew) 7 Bible Online

Daniel (Hebrew) 7 - ქართული ბიბლია, სრული ვერსია bible

Daniel (Hebrew) 7

¹ბაბილონის მეფის, ბელშაცარის, მეფობის პირველ წელს დანიელმა ნახა სიზმარი და ხილვა თავის სარეცელზე. მაშინ ჩაიწერა მან ეს სიზმარი და გადმოსცა მთავარი აზრი.

²და თქვა დანიელმა: „ღამით ჩემს ხილვაში ვხედავდი, აჰა, ზეცის ოთხი ქარი დიდ ზღვას აწყდებოდა.

³ზღვიდან ოთხი, ერთიმეორისაგან განსხვავებული, ვეება მხეცი ამოვიდა.

⁴პირველი ლომსა ჰგავდა და არწივის ფრთები ჰქონდა. ვუყურებდი, სანამ ფრთები დააწყდებოდა. იგი წამოყენებულ იქნა მიწიდან, ფეხზე დადგა კაცივით და კაცისავე გული მიეცა.

⁵აჰა, სხვა მეორე მხეცი, დათვის მსგავსი. იდგა პირველის გვერდით და სამი ნეკნი ეჭირა კბილებით. მას უთხრეს: ‘ადექ, ჭამე ბევრი ხორცი!’

⁶ამის შემდეგ ვიხილე ჩემს ღამეულ ხილვაში ავაზას მსგავსი მხეცი, ზურგზე ოთხი ფრთა ჰქონდა, ფრინველისა. ოთხი თავი ჰქონდა ამ მხეცს და ხელმწიფება მიეცა მას.

⁷ამის შემდეგ ვიხილე ჩემს ღამეულ ხილვაში მეოთხე მხეცი, საშინელი, საზარელი და ძალზე ღონიერი; რკინის ვეება კბილები ჰქონდა. იგი ნთქავდა, მუსრავდა და ნარჩენებს ფეხით თელავდა. გამოირჩეოდა ყველა წინამორბედი მხეცისგან და ათი რქა ჰქონდა.

⁸მე ვაკვირდებოდი ამ რქებს და, აჰა, მათ შორის კიდევ ერთი მომცრო რქა ამოვიდა და სამი პირვანდელი რქა ძირიანად ამოვარდა მის წინაშე. და, აჰა, ამ რქას თვალები კაცის მსგავსი ჰქონდა და პირი — ამპარტავნულად მოლაპარაკე.

⁹ვიხილე, რომ ტახტრევნები დაიდგა და დაჯდა დღეებით ძველი. მისი სამოსელი თოვლივით სპეტაკი იყო და მისი თმები — მატყლივით სუფთა. მისი ტახტი ცეცხლის ალი იყო, მისი ეტლის ბორბლები — მოგიზგიზე ცეცხლი.

¹⁰მოედინებოდა ცეცხლის მდინარე და მის წინიდან გამოდიოდა. 1000 ათასეული ემსახურებოდა მას და 10 ათასეული იდგა მის წინაშე. დასხდა სამსჯავრო და გადაიშალა წიგნები.

¹¹მაშინ ვიხილე: იმ ამპარტავნული სიტყვების გამო, რქა რომ ამბობდა, ჩემს თვალწინ, მოკლულ იქნა ის მხეცი; მისი გვამი კი შეიმუსრა და ცეცხლს მიეცა დასაწველად.

¹²დანარჩენ მხეცებს წაერთვათ ძალაუფლება, მაგრამ მათ მიეცათ დრო და ჟამი, თუ ვის რამდენი უნდა ეცოცხლა.

¹³ვიხილე ჩემს ღამეულ ხილვაში, აჰა, დავინახე, ცის ღრუბლებზე მოდიოდა ადამიანის ძის მსგავსი; იგი დღეებით ძველთან მოვიდა და წარდგენილ იქნა მის წინაშე.

¹⁴მიეცა მას ხელმწიფება, დიდება და მეფობა, რათა ყველა ხალხები, ტომები და ენები ემსახურონ. მისი ხელმწიფება საუკუნო ხელმწიფებაა, რომელიც არ გადაივლის და მისი სამეფო არ დაიქცევა.

¹⁵მე, დანიელს, შემიწუხდა სული სხეულში და ჩემმა ხილვებმა შემაშფოთეს.

¹⁶მივუახლოვდი ერთ იქ მდგომთაგანს და ვკითხე ყოველივე ამის ნამდვილი მნიშვნელობა. მითხრა მან და გამაგებინა ყოველივეს მნიშვნელობა:

¹⁷‘ის ოთხი ვეება მხეცი ოთხი მეფეა, რომლებიც მიწიდან აღდგებიან.

¹⁸შემდეგ მიიღებენ უზენაესის წმიდა სამეფოს და დაეუფლებიან მას სამუდამოდ, უკუნითი უკუნისამდე.’

¹⁹მაშინ მოვიწადინე სინამდვილის გაგება იმ მეოთხე მხეცზე, რომელიც ყველასგან გამორჩეული და მეტად საზარელი იყო თავისი რკინის კბილებითა და ბრიჯაოს ბრჭყალებით, რომელიც ნთქავდა, მუსრავდა და ნარჩენებს ფეხით თელავდა.

²⁰და იმ ათ რქაზე, თავზე რომ ჰქონდა, და იმ სხვა რქაზე, რომელიც ამოუვიდა და, რომლის წინაშეც სამი რქა ამოვარდა; ამ რქას ჰქონდა თვალები და პირი ამპარტავნულად მოლაპარაკე, და რომელიც უფრო დიდი იყო, ვიდრე სხვები.

²¹ვიხილე ეს რქა, წმიდებს რომ ებრძოდა და მანამდე ჯაბნიდა მათ,

²²სანამ დღეებით ძველი მოვიდოდა. მაშინ ეს სამსჯავრო უზენაესის წმიდებს გადაეცა. მაშინ დადგა ის ჟამი, როდესაც სამეფოს წმიდები დაეუფლნენ.

²³და მან ასე თქვა: ‘მეოთხე მხეცი მეოთხე სამეფო იქნება ქვეყნად. გამორჩეული იქნება ყველა სამეფოსგან და გადაჭამს მთელ ქვეყანას, გაქელავს და შემუსრავს მას.

²⁴ხოლო ათი რქა ეს არის ათი მეფე, რომლებიც ამ სამეფოდან აღდგებიან. მათ შემდეგ სხვა აღდგება. იგი განსხვავებული იქნება პირველთაგან და სამ მეფეს დაამდაბლებს.

²⁵უზენაესის წინააღმდეგ სიტყვებს იტყვის და უზენაესის წმიდებს შეავიწროვებს. განიზრახავს დროთა და რჯულის შეცვლას. ისინი ხელში მიეცემიან მას დროის, ორი დროისა და ნახევარი დროის მანძილზე.

²⁶შემდეგ დასხდება სამსჯავრო და წაართმევს მას ხელმწიფებას, მის ბოლომდე მოსასპობად და დასაღუპად.

²⁷მეფობა, ხელმწიფება და ცისქვეშეთის ყველა სამეფოს დიდება უზენაესის წმიდების ერს მიეცემა. მისი სამეფო საუკუნო სამეფო იქნება და ყველა ხელმწიფე მას მოემსახურება და მას დაემორჩილება.’

²⁸აქ არის სიტყვის დასასრული. მე, დანიელი, ჩემმა ფიქრებმა ძალზე შემაშფოთეს და სახეზე ფერი მეცვალა, მაგრამ ეს ამბავი გულში დავიმარხე.“