Read ქართული ბიბლია, სრული ვერსია Daniel (Hebrew) 8 Bible Online

Daniel (Hebrew) 8 - ქართული ბიბლია, სრული ვერსია bible

Daniel (Hebrew) 8

¹მეფე ბელშაცარის მეფობის მესამე წელს მე, დანიელს, კვლავ მქონდა ხილვა, მის მერე, პირველად რომ მეჩვენა.

²ვხედავდი ხილვაში და, როცა ვხედავდი, სატახტო ქალაქ შუშანში ვიყავი, ყელამის ქვეყანაში რომ არის. დავინახე ხილვაში, რომ მდინარე ულაის პირას ვიდექი.

³თვალები ავახილე და დავინახე: აჰა, მდინარის პირას ერთი ვერძი დგას, ორი რქა აქვს, ორთავე გრძელი. ერთი რქა მეორეზე გრძელია, და ის გრძელი უფრო გვიან ამოუვიდა.

⁴დავინახე, ეს ვერძი ირქინებოდა დასავლეთისკენ, ჩრდილოეთისკენ, სამხრეთისკენ. წინ ვერცერთი მხეცი ვერ უდგებოდა და ვერც ვერავინ ახერხებდა მისგან თავდახსნას. რასაც უნდოდა, იმას აკეთებდა და იზრდებოდა.

⁵როდესაც მე ამას ვუკვირდებოდი, აჰა, დასავლეთიდან ერთი ვაცი მოდიოდა, მთელი დედამიწის ზურგზე გამოექანა, მიწას ფეხს არ აკარებდა; ვაცს თვალებს შუა საჩინო რქა ჰქონდა.

⁶მოვიდა იგი იმ ორრქიან ვერძთან, მდინარის პირას მდგომი რომ ვნახე, და მთელი თავისი ძალის რისხვით მივარდა მას.

⁷დავინახე, იგი მიუახლოვდა ვერძს, რისხვა აეშალა მასზე, დაეტაკა და ორთავე რქა მოსტეხა. ძალა არ ეყო ერკემალს[5], რომ წინ აღდგომოდა. მან მიწას დაანარცხა იგი და გაქელა, და არავინ იყო ერკემლის მხსნელი მისგან.

⁸მაშინ ძალზე განდიდდა ვაცი. როდესაც გაძლიერდა, მოსტყდა მას დიდი რქა და მის ადგილას ოთხი სხვა რქა ამოუვიდა ზეცის ოთხი ქარის მიმართულებით.

⁹ერთ იმათგანზე სხვა მომცრო რქა ამოუვიდა, რომელიც მეტისმეტად გაიზარდა სამხრეთის, აღმოსავლეთისა და მშვენიერი ქვეყნის მიმართულებით.

¹⁰იგი ცის მხედრობამდე გაიზარდა, მიწაზე დასცა მხედრობისა და ვარსკვლავების ნაწილი და გაქელა ისინი.

¹¹იგი ამ მხედრობის მთავრამდე გაიზარდა და წაერთვა მთავარს მუდმივი მსხვერპლი და დამხობილ იქნა მისი საწმიდრის ადგილი.

¹²მხედრობა მიცემულ იქნა მუდმივ მსხვერპლთან ერთად დანაშაულის გამო და მან მიწაზე დაამხო ჭეშმარიტება და მოქმედებდა და წარემართებოდა.

¹³გავიგონე, ერთი წმიდა ლაპარაკობდა. უთხრა ამ ერთმა წმიდამ ვიღაცას, რომელიც ლაპარაკობდა: „როდემდე გასტანს ეს ხილვა მუდმივ მსხვერპლზე და გატიალების დანაშაულზე, საწმიდარზე და მხედრობაზე, რომელიც უნდა გაიქელოს?“

¹⁴მითხრა: „2300 საღამოსა და დილას გასტანს და ამის შემდეგ აღდგება საწმიდარი.“

¹⁵როცა მე, დანიელმა, ვნახე ეს ხილვა და ვცდილობდი მის გაგებას, აჰა, ჩემს წინ ვიღაც იდგა, კაცის იერის მქონე.

¹⁶და შემომესმა კაცის ხმა შუა ულაიდან[6]. დაიძახა მან და თქვა: „გაბრიელ, აუხსენი მაგას ეგ ხილვა!“

¹⁷და მოვიდა იმ ადგილას, სადაც მე ვიდექი. მისი მოსვლისთანავე თავზარი დამეცა და პირქვე დავემხე. მითხრა: „იცოდე, ადამის ძეო, რომ ეს ხილვა აღსასრულის ჟამს შეეხება.“

¹⁸რომ მელაპარაკებოდა, გაოგნება დამეცა მიწაზე პირქვე გართხმულს. მაშინ ის შემეხო და ჩემს ადგილას დამაყენა.

¹⁹და მითხრა: „აჰა, მე გაუწყებ, რაც მოხდება რისხვის დასასრულს, რადგან ეს აღსასრულის დათქმულ ჟამს შეეხება.

²⁰ორრქიანი ვერძი რომ ნახე, ეს მიდიისა და სპარსეთის მეფეები არიან,

²¹ხოლო ის ვაცი საბერძნეთის მეფეა; თვალებს შუა ამოსული დიდი რქა მისი პირველი მეფეა.

²²ის რქა მოტყდა და მის ნაცვლად ოთხი ამოუვიდა — ოთხი სამეფო აღდგება მისი ხალხიდან, მაგრამ მათ მისი მსგავსი ძალა არ ექნებათ.

²³მათი სამეფოს აღსასრულისას, როდესაც დამნაშავენი თავისას აღასრულებენ, აღდგება ურცხვინო და ორპირობაში გაწაფული მეფე.

²⁴განმტკიცდება მისი ძლიერება, ოღონდ არა მისი საკუთარი ძალით. უდაბნოებად აქცევს ქვეყნებს და წარემართება და იმოქმედებს, და გაანადგურებს ძლიერებს და წმიდა ერს.

²⁵და გარდა თავისი ჭკუისა და მზაკვრობისა, წარმატებაც ექნება ხელთ. გულზვიადი გახდება და ქვეყანაზე მრავალს დაღუპავს. წინ აღუდგება მაღალ ღმერთს, მაგრამ შეიმუსრება, ოღონდ არა კაცთა ხელით.

²⁶ხოლო მწუხრისა და დილის ხილვა, რომელიც შენ იხილე, ჭეშმარიტია. მაგრამ დამალე ეს ხილვა, რადგან დიდი დროა მის ახდენამდე.“

²⁷და მე, დანიელი, დავუძლურდი და რამდენიმე დღე ავად ვიყავი; მერე ავდექი და მეფის საქმეებს შევუდექი; გაოცებული ვიყავი ამ ხილვით, მაგრამ ვერაფერს ვხვდებოდი.