Read ქართული ბიბლია, სრული ვერსია Hosea 1 Bible Online

Hosea 1 - ქართული ბიბლია, სრული ვერსია bible

Hosea 1

¹უფლის სიტყვა, რომელიც იყო ოსიას[1] მიმართ, ბეერის ძისა, იუდეის მეფეების: ყუზიას, იოთამის, ახაზისა და ხეზეკიას დროს, და ისრაელის მეფის იერობოყამ იოაშის ძის დროს.

²როცა იწყო უფალმა ქადაგება ოსიას პირით, უთხრა: წადი, მოიყვანე გარყვნილი ქალი და გარყვნილების ძენი, რადგან გაირყვნა ქვეყანა და განადგურდა უფალი.

³წავიდა და მოიყვანა გომერი, დიბლაიმის ასული. დაორსულდა ქალი და უშვა ძე.

⁴და უთხრა უფალმა მას: დაარქვი სახელად იზრეყელი, რადგან, ცოტაც და, უნდა მოვკითხო იზრეყელის სისხლი იეჰუს სახლს და გავაუქმო ისრაელის მეფობა.

⁵იმ დღეს იქნება, რომ შევმუსრავ ისრაელის მშვილდს იზრეყელის ველზე.

⁶კვლავ დაორსულდა ქალი და შვა ასული. უთხრა უფალმა: დაარქვი სახელად ლო-რუხამა (არა შესაწყალისი), რადგან აღარ შევიწყალებ ისრაელის სახლს და არასოდეს შევუნდობ.

⁷იუდას სახლს კი შევიწყალებ და ვიხსნი უფლის, მათი ღვთის, ხელით; არც მშვილდით, არც მახვილით, არც ბრძოლით, არც მხედრებით არ ვიხსნი მათ.

⁸მოწყვიტა ძუძუს ლო-რუხამა და ისევ დაორსულდა და შვა ძე.

⁹თქვა უფალმა: დაარქვი სახელად ლო-ყამი (არა ჩემი ერი), რადგან აღარ ხართ ჩემი ერი და მეც აღარ ვარ თქვენი.

¹⁰ზღვის ქვიშასავით იქნება ისრაელიანთა რიცხვი, რომელიც არც გაიზომება და არც აღირიცხება; და ნაცვლად იმისა, რომ უთხრან, ლო-ყამი (არა ჩემი ერი) ხართო, ეტყვიან, ცოცხალი ღმერთის შვილები ხართო.

¹¹შეიყრებიან ერთად იუდაელები და ისრაელიანები და დაისვამენ ერთ მთავარს და გამოვლენ ქვეყნიდან, რადგან დიდი იქნება იზრეყელის დღე.