Read ქართული ბიბლია, სრული ვერსია Hosea 13 Bible Online

Hosea 13 - ქართული ბიბლია, სრული ვერსია bible

Hosea 13

¹როცა დაძრავდა სიტყვას ეფრემი, შიშის ზარი ლევდა ყველას; იგი აღზევდა ისრაელში, მაგრამ დადანაშაულდა ბაყალის გამო და მოკვდა.

²ახლა უმატეს ცოდვას; ჩამოისხეს ქანდაკნი ვერცხლისაგან, ოსტატურად; კერპები, რომელთაც ყოველი მჭედელი აკეთებს. ისინი ამბობენ მათზე: კაცის შემწირველნი ხბორებს კოცნიანო!

³ამიტომაც დილის ნისლივით იქნებიან ისინი და ცვარივით, ადრე რომ ქრება; კალოდან ქარისგან ახვეტილ ბზესავით და საკვამურიდან ადენილი კვამლივით არიან.

⁴მე ვარ უფალი, თქვენი ღმერთი, ეგვიპტის ქვეყნიდან მოყოლებული; სხვას არავის იცნობთ ჩემს გარდა არავინაა მხსნელი.

⁵მე გცანი შენ უდაბნოში, მწყურვალე მიწაზე.

⁶როცა საძოვრები გაუჩნდათ და გაძღნენ, გადიდგულდნენ, ამიტომაც დამივიწყეს მე.

⁷მე კი ლომად ვექცევი მათ, ჯიქივით ჩავუსაფრდები გზაზე.

⁸ბელებწაგვრილი დათვივით დავეცემი თავს, შევუნგრევ გულისფიცარს და ლომივით შევჭამ მათ; ველის მხეცები დაფლეთენ მათ.

⁹თავი წაიწყმიდე, ისრაელ, რადგან მხოლოდ ჩემშია შენი შეწევნა!

¹⁰სად არის ახლა შენი მეფე, რომ გიხსნას ყოველ შენს ქალაქში? ან შენი მსაჯულნი, რომლებსაც ეუბნებოდი: მომეცი მეფე და მთავრებიო.

¹¹მე მოგეცი შენ მეფე ჩემი მრისხანებისას და წაგართმევ ჩემი გულისწყრომისას.

¹²შეფუთულია ეფრემის უკეთურებანი, გადანახულია მისი ცოდვები.

¹³მშობიარის ტკივილები ეწევა მას; უგუნური შვილია, თორემ არ დაყოვნდებოდა საშოს კართან.

¹⁴ჯოჯოხეთის ხელიდან გამოვისყიდი მათ, სიკვდილისაგან ვიხსნი. სად არის შენი ნესტარი, სიკვდილო? სად არის შენი ძლევა, ჯოჯოხეთო? შებრალება მიეფარა ჩემს თვალს!

¹⁵თუმცა განივრცო ეფრემი ძმათა შორის, მაგრამ დაუბერავს აღმოსავლეთის ქარი, უფლის ქარი ამოვარდება უდაბნოდან და დაშრება მისი წყარო და დაწყდება მისი სათავე; ის გაძარცვავს ყოველნაირ ძვირფას ჭურჭელთა საგანძურს.