Read ქართული ბიბლია, სრული ვერსია Hosea 2 Bible Online

Hosea 2 - ქართული ბიბლია, სრული ვერსია bible

Hosea 2

¹დაუძახეთ თქვენს ძმებს: „ჩემი ერი“ და თქვენს დებს: „შეწყალებული.“

²უჩივლეთ დედათქვენს, უჩივლეთ, რადგან აღარ არის ის ჩემი ცოლი და მეც აღარ ვარ მისი ქმარი. ჩამოიცილოს გარყვნილება პირისახიდან და მრუშობა მკერდიდან.

³თორემ გავაშიშვლებ და ისე გამოვაჩენ, როგორც მისი დაბადების დღეს იყო; უდაბნოსავით ვაქცევ; უწყლო მიწად გავხდი და წყურვილით დავახრჩობ.

⁴არ შევიწყალებ მის შვილებს, რადგან სიძვის შვილები არიან.

⁵რადგან მრუშობდა მათი დედა და თავი შეირცხვინა მათმა მუცლადმღებელმა, რადგან თქვა: გავეკიდები ჩემს საყვარლებს, რომლებიც მაძლევენო პურსა და წყალს, მატყლსა და სელს, ზეთსა და სასმელებს.

⁶ამიტომ, აჰა, ეკალ-ბარდებით გადავუღობავ გზას და ყორეს აღვუმართავ წინ, რომ ვერ გაიგნოს თავისი ბილიკები.

⁷გაედევნება თავის საყვარლებს და ვერ დაეწევა; ძებნას დაუწყებს მათ და ვერ იპოვის. იტყვის: წავალ, დავბრუნდები ჩემს პირველ ქმართან, რადგან მაშინ ახლანდელზე უკეთ ვიყავიო.

⁸მან კი არ იცოდა, რომ მე ვაძლევდი მას პურს, ღვინოს და ზეთს; რომ მე გავუმრავლე ოქრო და ვერცხლი, რომელსაც ბაყალს ახარჯავდა.

⁹ამიტომაც უკან წავიღებ მე ჩემს ხორბალს მის სიმწიფეში და ჩემს ღვინოს მისი დაღვინებისას; წავართმევ ჩემს მატყლსა და სელს, რითაც სიშიშვლე უნდა დაეფარა.

¹⁰ახლა კი გამოვააშკარავებ მის სირცხვილს მისი საყვარლების თვალწინ და ვერავინ გამომტაცებს მას ხელიდან.

¹¹გავაუქმებ ყველა მის სიხარულს, ზეიმს, ახალმთვარობას, შაბათს, ყველა დღესასწაულს;

¹²გავუჩანაგებ ვაზსა და ლეღვის ხეებს, რომლებზეც ამბობს, ჩემი საჩუქრებია, ჩემმა საყვარლებმა მაჩუქესო; ტყედ ვაქცევ და ტყის ნადირი შეჭამს მათ.

¹³მას მოვკითხავ ბაყალთა დღეებს, როცა გუნდრუკს უკმევდა მათ, და საყურეებითა და ყელსაბამებით ირთვებოდა; როცა საყვარლებს დასდევდა, მე კი მივიწყებდა, — თქვა უფალმა.

¹⁴ამიტომაც აჰა, შევიტყუებ და უდაბნოში წავიყვან, რომ გულითადად ველაპარაკო.

¹⁵იქ მივცემ მას თავის ვენახს და ყაქორის ხეობას იმედის კართან; იქ იმღერებს, როგორც ყმაწვილქალობისას მღეროდა, როცა ეგვიპტის ქვეყნიდან ამომყავდა.

¹⁶იმ დღეს იქნება, — თქვა უფალმა, — რომ დამიძახებ: „ჩემო ქმარო!“ და აღარ დამიძახებ: „ჩემო ბაყალო!“

¹⁷მოვაშორებ მის ბაგეებს ბაყალთა სახელებს, რომ აღარ იხსენებოდნენ თავიანთი სახელებით.

¹⁸დავდებ იმ დღეს მათთვის აღთქმას ველის ნადირთან, ცის ფრინველთან და ქვეწარმავლებთან; მოვსპობ ქვეყანაზე მშვილდს, მახვილს და ომიანობას, და მშვიდობით ცხოვრებას დავანებებ მათ.

¹⁹და მე საუკუნოდ დაგწინდავ ჩემთვის, დაგწინდავ სიმართლით და სამართლით, წყალობითა და სიყვარულით;

²⁰დაგწინდავ რწმენით და შეიცნობ უფალს.

²¹იმ დღეს იქნება, რომ მე მოვუსმენ, — თქვა უფალმა, — მოვუსმენ ცას და ისიც მოუსმენს მიწას;

²²მიწა მოუსმენს ხორბალს, ღვინოსა და ზეთს, ხოლო ესენი მოუსმენენ იზრეყელს.

²³და ჩემთვის დავითესავ მას მიწაზე და შევიწყალებ ლო-რუხამას და ვეტყვი ლო-ყამს: ჩემი ერი ხარ-მეთქი, და ის მეტყვის: ჩემი ღმერთი ხარო.