Read ქართული ბიბლია, სრული ვერსია Hosea 4 Bible Online

Hosea 4 - ქართული ბიბლია, სრული ვერსია bible

Hosea 4

¹ისმინეთ უფლის სიტყვა, ისრაელიანებო! რადგან დავა აქვს უფალს ქვეყნის მკვიდრებთან; რადგან არ არის ჭეშმარიტება, არც სიქველე, არც ღვთის ცოდნა ქვეყნად.

²წყევლა და ტყუილი, კაცისკვლა, ქურდობა და მრუშობა გავრცელდა; სისხლისღვრას სისხლისღვრა მოსდევს.

³ამიტომაც გოდებს მიწა; ჩაკვდა მისი ყოველი მკვიდრი ველის მხეცებთან და ცის ფრინველებთან ერთად; ზღვის თევზებიც კი გაქრებიან.

⁴არავინ იდაოს, არავინ იყოს მამხილებელი, რადგან შენი ერი მღვდელს ედავება.

⁵წაიფორხილებ დღისით, და წაიფორხილებს ღამით წინასწარმეტყველიც შენთან ერთად; და მე მოვსპობ დედაშენს.

⁶მოისპობა ჩემი ერი უმეცრების გამო, რადგან შენ უარჰყავი ცოდნა, და მეც გადაგაყენებ ჩემს წინაშე მღვდელმსახურებისაგან; და როგორც შენ გაქვს დავიწყებული შენი ღმერთის სიყვარული, მეც დავივიწყებ შენს შვილებს.

⁷რაც უფრო მრავლდებიან ისინი, მით მეტად სცოდავენ ჩემს წინაშე; მათ პატივს სირცხვილად ვაქცევ.

⁸ცოდვებით იკვებება ჩემი ერი და უკეთურებისაკენ მიუწევს გული.

⁹და რაც ერს მოუვა, იგივე მოუვა ბერს; მსჯავრს დავდებ მათ მათი გზების გამო და მათი საქმეების გამო.

¹⁰ჭამენ და ვერ ძღებიან, ბოზობენ და ვერ მრავლდებიან, რადგან დაივიწყეს უფლის სამსახური.

¹¹ბოზობამ, ღვინომ და მაჭარმა დაიპყრო მათი გული.

¹²ჩემი ერი თავის ხეს[3] ეკითხება და მისი კვერთხი აძლევს მას პასუხს, რადგან ბოზობის სულმა შეაცდინა ის და განუდგა თავის ღმერთს.

¹³მთათა თხემებზე სწირავენ მსხვერპლს და გორაკებზე უკმევენ საკმეველს მუხის, ვერხვისა და ტერებინთოს ქვეშ, რადგან საამურია მათი ჩრდილი; ამიტომ ბოზობენ თქვენი ასულები და მრუშობენ თქვენი რძლები.

¹⁴არ მოვთხოვ პასუხს შენს ასულებს და შენს რძლებს, როცა მრუშობენ, რადგან მამაკაცები მეძავ ქალებთან დაეთრევიან და ტაძრის მემრუშებთან ერთად სწირავენ მსხვერპლს, უგუნური ხალხი კი იღუპება.

¹⁵თუ შენ მრუშობ, ისრაელო, იუდეა მაინც ნუ შესცოდავს, ნუ ივლის გილგალში, ნუ ავა ბეთ-ავენში, ნუ დაიფიცავს: ცოცხალიმც არისო უფალი!

¹⁶რადგან ატეხილი ფურივით არის ისრაელი ატეხილი; ამიტომ როგორ აძოვებს ახლა მათ უფალი, როგორც ცხვარს, ვრცელ საძოვარზე?

¹⁷შეეკრა კერპებს ეფრემი, დაეხსენით, იყოს მარტო.

¹⁸გამოუნელდებათ სიმთვრალე და ბოზობას იწყებენ, მიეჩვივნენ სირცხვილს მისი მთავრები.

¹⁹გაახვევს მათ ქარი თავის ფრთებში და მათ შერცხვებათ თავიანთი მსხვერპლისა.