Read ქართული ბიბლია, სრული ვერსია Hosea 5 Bible Online

Hosea 5 - ქართული ბიბლია, სრული ვერსია bible

Hosea 5

¹ისმინეთ ეს, მღვდლებო, გაიგონე, ისრაელის სახლო და ყურად-იღე, მეფის სახლო! რამეთუ სამსჯავრო გელით, რადგან მახედ ექეცით მიცფას და მოსროლილ სათხევლად — თაბორს.

²ღრმად ჩაეფლნენ ისინი გარყვნილებაში; ამიტომაც ყველას მოვიყვან ჭკუაზე.

³მე კარგად ვიცნობ ეფრემს, და ისრაელი ვერ დამემალება; რადგან შენც ბოზობ ახლა, ეფრემ, და წაბილწულია ისრაელი.

⁴მათი ბოროტი საქმეები არ ანებებენ, რომ მიიქცნენ თავიანთი ღვთისაკენ, რადგან ბოზობის სულია მათ წიაღში და უფალი ვერ უცვნიათ.

⁵ისრაელის ამპარტავნება დამცირებულია მათ თვალში; წაიფორხილებენ ისრაელი და ეფრემი თავიანთი ცოდვების გამო, წაიფორხილებს იუდეაც მათთან ერთად.

⁶თავიანთ ცხვარ-ძროხიანად წავლენ უფლის საძიებლად, მაგრამ ვერ იპოვნიან მას — იგი განერიდა მათ.

⁷უღალატეს უფალს და შობენ უცხოთა შვილებს; ამიერიდან ახალმთვარობა შეჭამს მათ მათი წილხვედრიანად.

⁸ჩაჰბერეთ ბუკს გიბეყაში, საყვირს რამაში, დაეცით ყიჟინა ბეთ-ავენში: „მოგდევენ, ბენიამინ!“

⁹უდაბნოდ იქცევა ეფრემი განკითხვის დღეს; ისრაელის ტომთა შორის გამოვაცხადე მე ეს.

¹⁰სამანის გადამნაცვლებლებივით გახდნენ იუდეის მთავრები, წყალივით გადმოვღვრი მათზე ჩემს რისხვას.

¹¹დამონებულია ეფრემი, დათრგუნულია მსჯავრით, რადგან ამაოთა კვალზე ისურვა სიარული.

¹²ჩრჩილად გავუხდები ეფრემს და მატლად — იუდეის სახლს.

¹³დაინახა ეფრემმა თავისი სენი და იუდეამ თავისი ჭრილობა; წავიდა ეფრემი აშურში და შეუთვალა იარებ მეფეს; მაგრამ ის ვერ შეძლებს თქვენს განკურნებას და ჭრილობებს ვერ მოგიშუშებთ.

¹⁴რადგან მე ლომივით ვექცევი ეფრემს და ლომის ბოკვერივით — იუდეის სახლს; დავგლეჯ და წავალ; გავიტაცებ და ვერავინ იხსნის.

¹⁵წავალ და დავუბრუნდები ჩემს ადგილს, ვიდრე არ შეიგნებენ თავიანთ დანაშაულს და ძებნას არ დაუწყებენ ჩემს სახეს; გაუჭირდებათ და მომძებნიან.