Read ქართული ბიბლია, სრული ვერსია Hosea 7 Bible Online

Hosea 7 - ქართული ბიბლია, სრული ვერსია bible

Hosea 7

¹როცა ისრაელს ვკურნავდი, გამოაშკარავდა ეფრემის უკეთურება და სამარიის ბოროტება, რადგან თვალთმაქცურად იქცეოდნენ; და შემოდის ქურდი, ყაჩაღი ძარცვავს გზებზე!

²გულში არც კი გაუვლიათ იმაზე ფიქრი, რომ მე მახსოვს ყოველი მათი ბოროტება; ახლა გარემოუცავს ისინი თავიანთ საქმეებს; ჩემს წინაშე არიან ისინი.

³თავიანთი ბოროტებით ამხიარულებენ მეფეს და თავიანთი ტყუილებით — მთავრებს.

⁴ყველა ისინი მრუშობით გიზგიზებენ, გახურებულნი არიან ხაბაზის თონესავით, რომელსაც პურის ჩაკვრის წინ განელება სჭირდება.

⁵დღეს ჩვენი მეფის გვირგვინის კურთხევის დღეა! — ამბობენ ღვინით გახურებული მთავრები, მეფე კი მასხარებისაკენ იწვდის ხელს.

⁶რადგან თონესავით გახდა მათი გული მზაკვრობისაგან; მთელი ღამე სძინავს ხაბაზს, დილით კი ანთია თონე აგიზგიზებული ცეცხლივით.

⁷ყველანი გახურებულნი არიან თონესავით და ჭამენ თავიანთ მსაჯულებს; განმდგარია ყველა მათი მეფე, და არავინ მიხმობს მათგან.

⁸ეფრემი შეერია ხალხებს; ნამცხვარს დაემგვანა, რომლის გადაბრუნებაც არავის სურს.

⁹უცხონი ჭამდნენ მის ძალას, ის კი ვერ ამჩნევდა; კიდეც გაჭაღარავდა, მას კი არაფერი უგრძვნია.

¹⁰ისრაელის ამპარტავნება დამცირებულია მათ თვალში, მაგრამ მიუხედავად ამისა ისინი არ მოიქცნენ თავიანთი უფალი ღმერთისკენ და არ უძებნიათ იგი.

¹¹ჩერჩეტი მტრედივით იქცა ეფრემი, უგულისხმო გახდა: ეგვიპტეს უხმობენ, აშურში მიდიან.

¹²როგორც კი წავლენ, ჩემს სათხეველს მოვისვრი მათზე და ცის ფრინველებივით ჩამოვბერტყავ; დავსჯი მათ, როგორც გაფრთხილებული იყვნენ თავიანთ კრებულში.

¹³ვაი მათ, რადგან ზურგი მაქციეს! დაღუპვა მათ, რადგან განმიდგნენ! მე ვიხსენი ისინი, ისინი კი მზაკვრობენ ჩემს წინააღმდეგ!

¹⁴და გულით არ შემომღაღადებდნენ მე, არამედ კვნესოდნენ თავიანთ საწოლებში; პურისა და ღვინისთვის იკრიბებიან, მე კი განმიდგნენ.

¹⁵მე ვმოძღვრავდი მათ, მკლავს ვუმაგრებდი, ისინი კი ავს განიზრახავდნენ ჩემს წინააღმდეგ.

¹⁶ისინი მიიქცნენ, მაგრამ არა ყოვლადძლიერისაკენ, არამედ მოშვებულ მშვილდს დაემსგავსნენ; მახვილით დაეცემიან მათი მთავრები უტიფარი ენის გამო; ეს იქნება მათი სირცხვილი ეგვიპტის ქვეყანაში.