Read ქართული ბიბლია, სრული ვერსია Hosea 9 Bible Online

Hosea 9 - ქართული ბიბლია, სრული ვერსია bible

Hosea 9

¹ნუ ხარობ, ისრაელო, ნუ ილხენ სხვა ხალხებივით, რადგან შენ მრუშობ ღვთისაგან განმდგარი; სიძვის საჩუქრებს ირჩევ ყოველ კალოზე.

²კალო და საწნახელი არ გამოკვებავს მათ და ღვინო უმტყუნებს მათ.

³არ იცხოვრებენ უფლის მიწაზე: ეფრემი ეგვიპტეში დაბრუნდება და უწმიდურს შეჭამენ აშურში.

⁴არ დაუღვრიან უფალს ღვინოს და მათი მსხვერპლი არ აამებს მას; მათი პური ქელეხის პურივით იქნება; ყოველი მისი მჭამელი გაუწმიდურდება, რადგან ეს პური მათთვის არის, და ვერ შევა უფლის სახლში.

⁵რას იზამთ დღესასწაულის დღეს და საუფლო ზეიმის დღეს?

⁶რადგან, აჰა, წაუვლენ აოხრებას. ეგვიპტე თავს მოუყრის მათ და ნოფი დამარხავს მათ; მისი ვერცხლის საგანძურს ეკალ-ბარდები დაიმკვიდრებენ და ძეძვი ამოვა მის კარვებში.

⁷დადგა განკითხვის დღეები, დადგა ნაცვალგების დღეები. იცოდეს ისრაელმა, რომ სულელი იყო წინასწარმეტყველი, შეშლილი იყო სულის კაცი, შენი დიდი სიცრუის გამო გამრავლდა ცბიერება

⁸ეფრემის — ჩემი ღვთის ერის — მცველი წინასწარმეტყველია. ყველა გზაზე ხაფანგია დაგებული და მხოლოდ მტრობაა მისი ღვთის სახლში.

⁹ღრმად გაირყვნენ, როგორც გიბეყას დღეებში; მაგრამ ის გაიხსენებს მათ უკეთურებას და მოჰკითხავს ცოდვებს.

¹⁰ყურძენივით ვიპოვე უდაბნოში ისრაელი; როგორც პირველნაყოფი ლეღვის ხეზე, როგორც მისი ნათავარი, ისე მივიჩნიე თქვენი მამები; მაგრამ ბაყალ-ფეღორთან წავიდნენ ისინი, სირცხვილს მისცეს თავი და ვინც შეიყვარეს, მათსავით საძაგლები შეიქნენ.

¹¹ეფრემი — ჩიტივით გაფრინდება მისი დიდება! არც შობა, არც ორსულობა, არც მუცლადღება!

¹²თუმცა გაზრდიან შვილებს, მაგრამ წავართმევ მათ; ერთი კაციც აღარ დარჩება; და ვაი მათ, თუ მივატოვე!

¹³ეფრემი, როგორც დავინახე, მშვენიერ მდელოზეა დარგული, როგორც ცორი, მაგრამ ეფრემი მკვლელს გაუყვანს თავის შვილებს.

¹⁴უფალო მიეცი მათ: რას მისცემ მათ? მიეცი ბერწი საშო და გამომშრალი ძუძუსთავები.

¹⁵გილგალშია მთელი მათი ბოროტება; იქ შევიძულე ისინი მათი ავი საქმეების გამო; ჩემი სახლიდან გავყრი მათ და აღარასოდეს შევიყვარებ; განდგომილია ყველა მისი მთავარი.

¹⁶აჩეხილია ეფრემი, გამხმარია მისი ფესვები, აღარ გამოიღებს ნაყოფს; კიდეც რომ შობონ, მოვაკვდინებ მათი საშოს სანატრელ ნაშიერს.

¹⁷მოიშორებს მათ ჩემი ღმერთი, რადგან არ გაუგონეს მას, და წარმართთა შორის ხეტიალს მოჰყვებიან.