Read ქართული ბიბლია, სრული ვერსია Numbers 1 Bible Online

Numbers 1 - ქართული ბიბლია, სრული ვერსია bible

Numbers 1

¹ელაპარაკა უფალი მოსეს სინაის უდაბნოში, საკრებულო კარავში, მეორე თვის პირველ დღეს, ეგვიპტის ქვეყნიდან გამოსვლის მეორე წელს, და უთხრა:

²აღრიცხეთ ისრაელიანთა მთელი თემი მათი საგვარეულოების, მათი მამისსახლების, მათი სახელების რიცხვის მიხედვით, ყოველი მამრი სათითაოდ,

³20 წლიდან და ზევით, ყოველი ლაშქარში გამსვლელი ისრაელიანი შენ და აარონმა აღრიცხეთ მათი ლაშქრების მიხედვით.

⁴თითოეული ტომიდან თქვენთან იყოლიეთ თითო კაცი, თითოეული თავისი მამისსახლის თავკაცი.

⁵ეს არის სახელები იმ თავკაცებისა, რომელნიც იქნებიან თქვენთან ერთად: რეუბენიდან ელიცური, ძე შედეურისა;

⁶სიმეონიდან შელუმიელი, ძე ცურიშადაისა;

⁷იუდადან ნახშონი, ძე ყამინადაბისა;

⁸ისაქარიდან ნეთანელი, ძე ცუყარისა;

⁹ზებულუნიდან ელიაბი, ძე ხელონისა;

¹⁰იოსებიანთაგან: ეფრემიდან ელიშამაყი, ძე ყამიჰუდისა; მანაშედან გამალიელი, ძე ფედაცურისა;

¹¹ბენიამინიდან აბიდანი, ძე გიდეონისა;

¹²დანიდან ახიყეზერი, ძე ყამიშადაისა;

¹³აშერიდან ფაგეყიელი, ძე ყოქრანისა;

¹⁴გადიდან ელიასაფი, ძე დეუელისა;

¹⁵ნაფთალიდან ახირაყი, ძე ყენანისა.

¹⁶ესენი იყვნენ არჩეულნი თემიდან, თავკაცნი თავიანთი მამების შტოებისა, ისრაელის ათასისთავები.

¹⁷მოიყვანეს მოსემ და აარონმა ეს კაცები, რომლებიც სახელებით იყვნენ ჩამოთვლილი,

¹⁸და შეკრიბეს მთელი თემი მეორე თვის პირველ დღეს, და გამოაცხადეს მათ თავიანთი წარმომავლობა, მათი საგვარეულოების, მათი მამისსახლებისა და სახელთა რიცხვის მიხედვით, 20 წლიდან და ზევით, ყველანი სათითაოდ.

¹⁹როგორც უბრძანა უფალმა მოსეს, ისე აღრიცხა მან ისინი სინაის უდაბნოში.

²⁰სულ აღირიცხა რეუბენის, ისრაელის[1] პირმშოს, შთამომავალთაგან მათი საგვარეულოების, მათი შტოებისა და მათი მამისსახლების მიხედვით, სახელთა რიცხვისამებრ, ყველა მამაკაცი სათითაოდ, 20 წლიდან და მათზე უფროსნი, ყოველი ლაშქარში გამსვლელი,

²¹რეუბენის ტომში აღირიცხა 46500.

²²სიმეონის ძეთაგან მათი საგვარეულოების, მათი შტოების, მათი მამისსახლების მიხედვით, სახელთა რიცხვისამებრ, სათითაოდ, ყოველი მამაკაცი 20 წლიდან და ზევით, ყოველი ლაშქარში გამსვლელი.

²³სიმეონის ტომში აღირიცხა 59300.

²⁴გადიანთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

²⁵გადის ტომში აღირიცხა 45650.

²⁶იუდას ძეთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

²⁷იუდას ტომში აღირიცხა 74600.

²⁸ისაქარიანთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

²⁹ისაქარის ტომში აღირიცხა 54400.

³⁰ზებულუნიანთაგან მათი საგვარეულოების, მათი ტომების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

³¹ზებულუნის ტომში აღირიცხა 57400.

³²იოსების ძეთაგან: ეფრემის ძეთაგან მათი საგვარეულოების, მათი ტომების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

³³ეფრემის ტომში აღირიცხა 40500.

³⁴მანაშეანთაგან მათი საგვარეულოების, მათი ტომების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

³⁵მანაშეს ტომში აღირიცხა 32 200.

³⁶ბენიამინიანთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

³⁷ბენიამინის ტომში აღირიცხა 35 400.

³⁸დანიანთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

³⁹დანის ტომში აღირიცხა 62 700.

⁴⁰აშერიანთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

⁴¹აშერის ტომში აღირიცხა 41 500.

⁴²ნაფთალიანთაგან მათი საგვარეულოების, მათი შტოების, მათი მამისსახლების, მათი სახელების რიცხვის მიხედვით, 20 წლიდან და ზევით, ყოველი ლაშქარში გამსვლელი,

⁴³ნაფთალის ტომში აღირიცხა 53 400.

⁴⁴ესენი არიან აღრიცხულნი, რომლებიც აღრიცხეს მოსემ და აარონმა და ისრაელის მთავრებმა — თორმეტმა კაცმა — თითო კაცმა თითო ტომიდან.

⁴⁵და ყველა აღრიცხული ისრაელიანი, მათი მამისსახლებიდან, 20 წლიდან და ზევით, ყოველი ლაშქარში გამსვლელი ისრაელიანი,

⁴⁶და მთლიანად აღრიცხული იყო 603550.

⁴⁷ლევიანები მათი მამის ტომების მიხედვით არ აღრიცხულან მათ შორის.

⁴⁸უთხრა უფალმა მოსეს:

⁴⁹მხოლოდ ლევის ტომი არ შეიტანო აღწერაში და არ აღრიცხო ისინი ისრაელიანთა შორის.

⁵⁰არამედ დაადგინე ლევიანები საკრებულო კარვის მსახურებაზე, მთელ მის აღჭურვილობასა და ყოველივეზე, რაც მასშია. მათ ატარონ კარავი და მთელი მისი მოწყობილობა, და ემსახურონ მას, და კარვის გარშემო დაბანაკდნენ.

⁵¹როცა საჭირო იქნება კარვის გადატანა, დაშალონ იგი ლევიანებმა; და კარვის შეჩერებისას დადგან ის ლევიანებმა, უცხო კი, ვინც მას გაეკარება, მოიკლას.

⁵²დაიბანაკონ ისრაელიანებმა, თითოეულმა თავის ბანაკში და თითოეულმა თავის დროშასთან — თავ-თავისი ლაშქრის მიხედვით.

⁵³ლევიანებმა კი დაიბანაკონ საკრებულო კარვის გარშემო, რათა არ მოვიდეს რისხვა ისრაელიანთა თემზე, და იდგნენ ლევიანები საკრებულო კარვის დარაჯად.

⁵⁴და გააკეთეს ისრაელიანებმა ყველაფერი ისე, როგორც უბრძანა უფალმა მოსეს.