Read ქართული ბიბლია, სრული ვერსია Numbers 19 Bible Online

Numbers 19 - ქართული ბიბლია, სრული ვერსია bible

Numbers 19

¹ელაპარაკა უფალი მოსეს და აარონს და უთხრა:

²„ეს არის წესი რჯულისა, რომელიც ბრძანა უფალმა: უთხარი ისრაელიანთ, რომ მოგგვარონ შენ წითელი საღი დეკეული, რომელსაც არ ექნება ხინჯი, და უღელში არ ყოფილა შებმული.

³მიჰგვარეთ ის ელეაზარ მღვდელს, რომ გაიყვანოს ბანაკს გარეთ და დაკლან მის თვალწინ.

⁴და აიღოს ელეაზარ მღვდელმა მისი სისხლი თითით და მოაპკუროს საკრებულო კარვის წინა მხარეს შვიდჯერ.

⁵და დაწვან დეკეული მის თვალწინ: მისი ტყავი, ხორცი და სისხლი მის ნეხვთან ერთად დაწვან;

⁶აიღოს მღვდელმა კედარის ხე და უსუპი, ასევე ჭიაფერი ნართი და დააყაროს ალმოდებულ დეკეულს.

⁷გაირეცხოს მღვდელმა შესამოსელი და წყლით დაიბანოს ტანი, და ამის შემდეგ შევიდეს ბანაკში, და შებილწული დარჩება მღვდელი საღამომდე.

⁸და დეკეულის დამწველმა გაირეცხოს სამოსელი წყლით და ტანი დაიბანოს წყლით; ის შებილწული დარჩება საღამომდე.

⁹შეაგროვოს ვინმე შეუბილწავმა კაცმა ფერფლი დეკეულისა და დაყაროს ბანაკს გარეთ, სუფთა ადგილას, და ის შეინახოს ისრაელიანთა თემმა გამასუფთავებელი წყლისთვის; ეს არის ცოდვის მსხვერპლი.

¹⁰დეკეულის ფერფლის შემგროვებელმა გაირეცხოს სამოსელი, და შებილწული დარჩება საღამომდე. და იყოს ეს ისრაელიანთათვის და მათთან მცხოვერბ ხიზანთათვის სამუდამო წესად.

¹¹ვინც მკვდარი ადამიანის გვამს მიეკარება, შებილწული იქნება შვიდი დღე.

¹²მესამე დღეს და მეშვიდე დღეს გასუფთავდება იგი. და თუ ის არ გასუფთავდება მესამე დღეს და მეშვიდე დღეს, არ იქნება სუფთა.

¹³ყოველი, ვინც მიეკარება მკვდარი ადამიანის გვამს და არ გასუფთავდება, უფლის სავანეს შებილწავს იგი. მოიკვეთოს ეს პირი ისრაელიდან, რადგან გამასუფთავებელი წყალი არ ეპკურა მას, და შებილწულია ის, და მისი სიბილწე კვლავაც მასზეა.

¹⁴და ეს არის წესი: როდესაც ადამიანი კარავში მოკვდება, ყველა, ვინც შევა კარავში, და ყველა, ვინც კარავშია, შებილწული იქნება შვიდ დღეს.

¹⁵ასევე ყოველი თავღია ჭურჭელი, რომელიც თავდასარქვლული და პირმოკრული არაა, შებილწულია.

¹⁶და ყველა, ვინც შეეხება მინდორში მახვილით განგმირულს, ან მკვდარს, ან ადამიანის ძვალს, ან საფლავს, შებილწული იქნება შვიდ დღს.

¹⁷შებილწულისათვის აიღონ ცოდვის გამოსყიდვისათვის დამწვარი იმ დეკეულის ფერფლი და დაასხან მას წყაროს წყალი ჭურჭლით.

¹⁸და აიღოს ვინმე სუფთა ადამიანმა უსუპი, და ამოავლოს ამ წყალში, და აპკუროს კარავს, და ყოველ მის ჭურჭელს და ყველა ადამიანს, რომელიც იქ იქნება, და ყველას, ვინც შეხებია ადამიანის ძვალს, ან გვამს, ან საფლავს.

¹⁹აპკუროს სუფთამ შებილწულს მესამე დღეს და მეშვიდე დღეს, და ასე გაასუფთავებს მას მეშვიდე დღეს. და გაირეცხავს სამოსელს, და წყლით დაიბანს ტანს, და უკვე სუფთა იქნება საღამოთი.

²⁰და თუ ვინმე შეიბილწა და არ გასუფთავდა, უნდა მოიკვეთოს კრებულიდან, რადგან შებილწა უფლის საწმიდარი; გამასუფთავებელი წყალი არ პკურებია მას და შებილწულია იგი.

²¹იყოს ეს მათთვის სამუდამო წესად. და წყლის მასხურებელმაც გაირეცხოს თავისი სამოსელი; და ვინც გამასუფთავებელ წყალს შეეხება, შებილწული დარჩება საღამომდე.

²²და ყველაფერი, რასაც შებილწული გაეკარება, შებილწული იქნება. და ვინც მას მიეკარება, შებილწული დარჩება საღამომდე.“