Read ქართული ბიბლია, სრული ვერსია Numbers 20 Bible Online

Numbers 20 - ქართული ბიბლია, სრული ვერსია bible

Numbers 20

¹და მოვიდნენ ისრაელიანები, მთელი თემი, ცინის უდაბნოში პირველ თვეს, და დარჩა ხალხი კადეშში, და მოკვდა იქ მირიამი და იქვე დაეფლა.

²და არ ჰქონდა თემს წყალი, და შეითქვნენ ისინი მოსესა და აარონის წინააღმდეგ.

³და აუჯანყდა ხალხი მოსეს და უთხრა: „ნეტავ ჩვენც მაშინ დავხოცილიყავით, როცა ჩვენი ძმები დაიხოცნენ უფლის წინაშე!

⁴რისთვის მოგვიყვანე უფლის კრებული ამ უდაბნოში, რომ გავწყდეთ აქ ჩვენცა და ჩვენი საქონელიც?

⁵რად ამოგვიყვანეთ ეგვიპტიდან, იმისთვის, რომ მოგეყვანეთ ამ უვარგის ადგილას, რომელზეც არც ითესება, და არც ლეღვია და ვაზი, არც ბროწეული და წყალიც კი არაა დასალევად?“

⁶და წავიდნენ მოსე და აარონი კრებულისაგან საკრებულო კარვის შესასვლელისკენ, და დაეცნენ პირქვე, და გამოეცხადა მათ დიდება უფლისა.

⁷და ელაპარაკა უფალი მოსეს და უთხრა:

⁸„აიღე კვერთხი, და შეკრიბეთ მთელი თემი შენ და აარონმა, შენმა ძმამ, და უთხარით კლდეს მათ თვალწინ, და მოგცემთ ის თავისგან წყალს. და ასე გადმოუჩქეფებ მათ წყალს კლდიდან, და დაარწყულებ შენს თემსა და მათ პირუტყვს.“

⁹აიღო მოსემ კვერთხი, რომელიც უფლის წინაშე იყო, როგორც მან უბრძანა.

¹⁰და შეკრიბეს მოსემ და აარონმა კრებული კლდესთან და უთხრა მათ: „ისმინეთ, მეამბოხეებო, ამ კლდისაგან ხომ არ გამოგიდინოთ წყალი?“

¹¹და აღმართა მოსემ ხელი, და დაჰკრა კლდეს თავისი კვერთხი ორჯერ. და წამოვიდა უხვად წყალი, და სვა თემმა და მათმა პირუტყვმა.

¹²მაგრამ უთხრა უფალმა მოსეს და აარონს: „რადგან არ მერწმუნეთ მე, რომ გამომეჩინა ისრაელიანთა თვალში ჩემი სიწმიდე, თქვენ ვერ შეიყვანთ ამ კრებულს იმ ქვეყანაში, რომელსაც მათ ვაძლევ.“

¹³ესაა მერიბას წყალი[8], სადაც დრტვინავდნენ ისრაელიანები უფალზე და სადაც გამოუჩინა მან მათ თავისი სიწმიდე.

¹⁴გაგზავნა მოსემ მოციქულები კადეშიდან ედომის მეფესთან ამ სიტყვებით: „ასე თქვა შენმა ძმამ, ისრაელმა: შენ იცი ყოველი სიძნელე, რომელიც ჩვენ თავს გადაგვხდა,

¹⁵ჩავიდნენ ჩვენი მამები ეგვიპტეში, და იქ ვცხოვრობდით დიდხანს, და ცუდად გვეპყრობოდნენ ეგვიპტელნი ჩვენცა და ჩვენს მამებსაც.

¹⁶და როდესაც შევღაღადეთ უფალს, ისმინა მან ჩვენი ხმა, და მოავლინა ანგელოზი და გამოგვიყვანა ეგვიპტიდან. და მოვედით კადეშში, შენს მოსაზღვრე ქალაქში.

¹⁷ნება მოგვეცი, გავიაროთ შენს ქვეყანაზე. არ გავივლით თქვენს ყანებსა და ვენახებზე, და არ დავლევთ თქვენი ჭების წყალს. სამეფო გზით ვივლით და არ გადავუხვევთ არც მარჯვნივ და არც მარცხნივ, ვიდრე არ გავცდებით შენს საზღვარს.“

¹⁸მაგრამ ედომმა შეუთვალა მას: „არ გაიარო ჩემს მიწაზე, თორემ მახვილით გამოვალ შენს წინააღმდეგ.“

¹⁹უთხრეს მას ისრაელიანებმა: „ჩვენ წამოვალთ მთავარი გზით, და თუ შენ წყალს დავლევთ მე და ჩემი საქონელი, საზღაურს გადაგიხდით; სხვას არაფერს გთხოვთ, მხოლოდ ფეხით გავივლით.“

²⁰მაგრამ მან შეუთვალა: „არ გაიარო!“ და გამოვიდა ედომი ისრაელის წინააღმდეგ მრავალრიცხოვანი, კარგად აღჭურვილი ლაშქრით.

²¹არ დათანხმდა ედომი, რომ გზა მიეცა ისრაელიანთათვის, რომ გაევლო მის საზღვრებში. და გვერდი აუარა მას ისრაელმა.

²²დაიძრნენ კადეშიდან ისრაელიანები, და მივიდა მთელი თემი ჰორის მთასთან.

²³და უთხრა უფალმა მოსეს და აარონს ჰორის მთაზე, ედომის ქვეყნის საზღვარზე:

²⁴„შეერთოს აარონი თავის ხალხს, რადგან იგი არ შევა იმ ქვეყანაში, რომელიც მივეცი ისრაელიანთ, რადგან თქვენ არ დაემორჩილეთ ჩემს ბრძანებას მერიბას წყალთან.

²⁵წაიყვანე აარონი და ელეაზარი, მისი ძე, და აიყვანე ისინი ჰორის მთაზე.

²⁶გახადე აარონს მისი შესამოსელი და შემოსე მით ელეაზარი, მისი ძე, რადგან აარონი შეეძინება თავის ხალხს და იქ მოკვდება.“

²⁷გააკეთა მოსემ ისე, როგორც უბრძანა უფალმა, და ავიდნენ ჰორის მთაზე მთელი თემის თვალწინ.

²⁸გახადა მოსემ აარონს მისი შესამოსელი და შემოსა მით ელეაზარი, მისი ძე. და მოკვდა აარონი იქ მთის თხემზე, და ჩამოვიდნენ მოსე და ელეაზარი მთიდან.

²⁹და იხილა მთელმა თემმა, რომ მოკვდა აარონი, და დასტიროდა აარონს ისრაელის მთელი სახლი 30 დღე.