Read ქართული ბიბლია, სრული ვერსია Numbers 21 Bible Online

Numbers 21 - ქართული ბიბლია, სრული ვერსია bible

Numbers 21

¹როდესაც გაიგო ქანაანელმა მეფემ, ყარადის, სამხრეთის მკვიდრმა, რომ მოდის ისრაელი ათარიმის გზით, შეებრძოლა იგი ისრაელს, და ზოგიერთი მათგანი ტყვედ წაიყვანა.

²და აღთქმა მისცა ისრაელმა უფალს და თქვა: „თუ ამ ხალხს ხელში ჩამიგდებ, მაშინ მე მათ ქალაქებს დავარისხებ.“

³ისმინა უფალმა ისრაელის ხმა, და მისცა ქანაანელნი, და დაარისხეს ისინი და მათი ქალაქები, და უწოდეს სახელი იმ ადგილს ხორმა.[9]

⁴და დაიძრნენ ჰორის მთიდან მეწამული ზღვისაკენ მიმავალი გზით, რათა გვერდი აევლოთ ედომის ქვეყნისთვის. და ხალხმა გამოავლინა სულმოკლეობა გზაზე.

⁵ალაპარაკდა ხალხი ღმერთისა და მოსეს წინააღმდეგ: „რისთვის გამოგვიყვანეთ ეგვიპტიდან, რომ უდაბნოში დავხოცილიყავით? რადგან აქ არ არის პური და არც წყალი, და შეგვძაგდა ეს უვარგისი საჭმელი.“

⁶და მოუვლინა უფალმა ხალხს შხამიანი გველები, რომლებიც გესლავდნენ ხალხს, და ბევრი გაწყდა ისრაელში.

⁷მივიდა ხალხი მოსესთან და უთხრა: „შევცოდეთ, რადგან ვილაპარაკეთ უფლისა და შენს წინააღმდეგ. შეევედრე უფალს, რომ მოგვაშოროს ეს გველები.“ და ილოცა მოსემ ხალხისათვის.

⁸და უთხრა უფალმა მოსეს: „გააკეთე ბრინჯაოს გველი და დაამაგრე იგი კეტზე, და ყოველი დაგესლილი, ვინც მას შეხედავს, ცოცხალი გადარჩება.“

⁹გააკეთა მოსემ ბრინჯაოს გველი, და დაამაგრა კეტზე. და თუ გველი ვინმეს დაკბენდა, შეხედავდა იგი ბრინჯაოს გველს, ცოცხალი რჩებოდა.

¹⁰აიყარნენ ისრაელიანები და დაიბანაკეს ობოთში.

¹¹და აიყარნენ ობოთიდან, და დაიბანაკეს ყიე-ყაბარიმის უდაბნოში, რომელიც მოაბის პირისპირაა, მზის აღმოსავლეთისკენ.

¹²იქიდან აიყარნენ და დაბანაკდნენ ზერედის ხევში.

¹³იქიდან აიყარნენ, გადაიარეს არნონის ხეობა და უდაბნოში დაიბანაკეს, რომელიც ესაზღვრება ამორეველთა სამფლობელოებს. (არნონი მოაბის საზღვარია მოაბსა და ამორეველთა სამფლობელოებს შორის.

¹⁴ამიტომაც ნათქვამია საუფლო ბრძოლების წიგნში: „და ვაჰები, სუფაში რომ არის, და ხეობები, და არნონი

¹⁵და ხეობათა კალთები, რომელიც ეშვებიან ყარისაკენ და ებჯინებიან მოაბის საზღვრებს.“)

¹⁶და იქიდან მათ გასწიეს ბეერისაკენ[10]. ეს ის ჭაა, რომელზეც მოსეს უთხრა უფალმა: შეკრიბე ხალხი და მივცემო მათ წყალს.

¹⁷მაშინ იგალობა ისრაელმა ეს საგალობელი: „აღივსე, ჭაო! უგალობეთ მას!

¹⁸ჭა, რომელიც ამოიღეს მთავრებმა, ამოთხარეს ხალხის თავკაცებმა კვერთხით — თავიანთი არგნებით!“ და უდაბნოდან გასწიეს მათანასაკენ;

¹⁹მათანადან ნახალიელისაკენ და ნახალიელიდან ბამოთისაკენ,

²⁰ბამოთიდან გავიდნენ ღაიში, რომელიც მოაბის მიწაზეა, ფისგას მთის თხემზე, უდაბნოსკენ რომ იყურება.

²¹და გაუგზავნა ისრაელმა მოციქულები სიხონს, ამორეველთა მეფეს, ამ სიტყვებით:

²²„გავივლით შენს ქვეყანაზე. არ შევალთ არც ყანებში და არც ვენახებში, არ დავლევთ შენი ჭების წყალს, და ვივლით სამეფო გზით, ვიდრე არ გავცდებით შენს საზღვრებს.“

²³მაგრამ სიხონმა თავის საზღვრებში გავლის ნება არ მისცა ისრაელს. და შეკრიბა სიხონმა მთელი თავისი ჯარი, და გამოვიდა ისრაელის წინააღმდეგ უდაბნოში, და მივიდა იაჰაცში, და შეებრძოლა ისრაელს.

²⁴მოსრა იგი ისრაელმა მახვილით, და დაეუფლა მის ქვეყანას არნონიდან იაბოკამდე — ყამონელთა ტომებამდე, რადგან ყამონელთა ტომების საზღვარი გამაგრებული იყო.

²⁵აიღო ისრაელმა ყველა ეს ქალაქი და დასახლდა ამორეველთა ყველა ქალაქში, ხეშბონში და ყველა მის დაბა-სოფლებში.

²⁶რადგან ხეშბონი იყო ამორეველთა მეფის, სიხონის, ქალაქი. და ის ებრძოდა მოაბის ყოფილ მეფეს, და წაართვა მთელი ქვეყანა არნონამდე.

²⁷ამიტომ ამბობენ მელექსენი: „შედით ხეშბონში, რათა აშენდეს! განმტკიცდეს ქალაქი სიხონისა!

²⁸რადგან ცეცხლი გამოვიდა ხეშბონიდან, ალი — სიხონის ქალაქიდან, შთანთქა მან ყარ-მოაბი, არნონის სიმაღლეთა მფლობელი.

²⁹ვაი შენ, მოაბო! განადგურდი შენ, ქემოშის ხალხო! მისი ძენი ლტოლვილებად იქცნენ, და მისი ასულნი ამორეველთა მეფის, სიხონის, ტყვეებად.

³⁰და ჩვენ განვგმირეთ ისინი. გაწყდა ხეშბონი დიბონამდე, და ნოფახამდე ავაოხრეთ, რომელიც მედების მახლობლადაა.“

³¹და დასახლდა ისრაელი ამორეველთა ქვეყანაში.

³²გაგზავნა მოსემ მსტოვრები იაყზერის დასაზვერად; და დაიპყრეს მათ მისი გარეუბნები, და განდევნეს ამორეველები, რომელნიც იქ იყვნენ.

³³და შემობრუნდნენ ისინი და დაადგნენ ბაშანის გზას. და ედრეყიში გამოვიდა მათ წინააღმდეგ საბრძოლველად ბაშანის მეფე, ყოგი, და მთელი მისი ჯარი.

³⁴და უთხრა უფალმა მოსეს: „ნუ გეშინია მისი, რადგან ხელში ჩაგიგდე იგი და მთელი მისი ჯარი, და მთელი მისი ქვეყანა. მოექეცი ისე, როგორც სიხონს მოექეცი, ამორეველთა მეფეს, რომელიც ხეშბონში ცხოვრობდა.“

³⁵და მუსრი გაავლეს მას და მის ძეებს და მთელ მის ჯარს, და არავინ დატოვეს ცოცხალი, და დაიმკვიდრეს მისი ქვეყანა.