Read ქართული ბიბლია, სრული ვერსია Numbers 23 Bible Online

Numbers 23 - ქართული ბიბლია, სრული ვერსია bible

Numbers 23

¹და უთხრა ბალაამმა ბალაკს: „ამიშენე აქ შვიდი საკურთხეველი და მომიმზადე შვიდი მოზვერი და შვიდი ვერძი.“

²გააკეთა ბალაკმა, როგორც ბალაამმა უთხრა, და შესწირეს ბალაკმა და ბალაამმა თითო მოზვერი და თითო ვერძი თითოეულ საკურთხეველზე.

³და უთხრა ბალაამმა ბალაკს: „დადექ შენს სრულადდასაწველთან, მე კი წავალ, იქნებ შემომხვდეს უფალი, და რასაც ის მაუწყებს, განგიცხადებ.“ და წავიდა იგი მოშიშვლებულ მაღლობზე.

⁴და გამოეცხადა ღმერთი ბალაამს, და ბალაამმა უთხრა მას: „მოვაწყვე შვიდი საკურთხეველი და აღვავლინე თითო მოზვერი და თითო ვერძი თითოეულ საკურთხეველზე.“

⁵ჩაუდო უფალმა სიტყვები ბალაამს ბაგეებში და უთხრა: „დაბრუნდი ბალაკთან და გადაეცი ეს სიტყვები.“

⁶და დაბრუნდა მასთან, და აჰა, ის დგას თავის სრულადდასაწველთან მოაბის ყველა თავკაცთან ერთად.

⁷და წარმოთქვა ბალაამმა თავისი იგავი: „შუამდინარეთიდან მომიყვანა მე ბალაკმა, მოაბის მეფემ აღმოსავლეთის მთებიდან: წამოდი და დამიწყევლეო იაკობი, წამოდი და შეაჩვენეო ისრაელი.

⁸როგორ დავწყევლო? ღმერთი არ წყევლის მას. როგორ შევაჩვენო, რომ უფალს არ შეუჩვენებია.

⁹კლდეთა თხემებიდან ვხედავ მას და ბორცვებიდან დავცქერი მას: აჰა, ცხოვრობს ერი განმარტოებით და ხალხებში არ ირიცხება.

¹⁰ვინ აღრიცხავს იაკობის ქვიშას და ვინ დაითვლის ისრაელის მეოთხედს? მოკვდეს სული ჩემი მართალთა სიკვდილით, და იყოს ჩემი აღსასრული, როგორც მათი.“

¹¹და უთხრა ბალაკმა ბალაამს: „ეს რა მიყავი? ჩემი მტრის დასაწყევლად მოგიყვანე, შენ კი აკურთხე იგი?“

¹²და უპასუხა მან: „განა რასაც უფალი ჩამიდებს ბაგეებში, ზუსტად ის არ უნდა ვილაპარაკო?“

¹³და უთხრა მას ბალაკმა: „წამოდი ჩემთან სხვა ადგილას, საიდანაც მათ დაინახავ. მაგრამ შენ დაინახავ მხოლოდ ნაწილს, მთელს კი ვერ დაინახავ. და დამიწყევლე ისინი იქიდან.“

¹⁴და წაიყვანა იგი ცოფიმის ველზე, ფისგას თხემზე, და ააგო შვიდი საკურთხეველი, და აღავლინა თითო მოზვერი და თითო ვერძი თითოეულ საკურთხეველზე.

¹⁵და უთხრა მან ბალაკს: „დადექი აქ შენს სრულადდასაწველთან, მე კი იქ წავალ უფალთან შესახვედრად.“

¹⁶შეხვდა უფალი ბალაამს, და ჩაუდო სიტყვები ბაგეებში და უთხრა: „დაბრუნდი ბალაკთან და გადაეცი ეს სიტყვები.“

¹⁷და ის მივიდა მასთან, და ნახა, რომ იდგა იგი თავის სრულადდასაწველთან, და მოაბის თავკაცებიც მასთან იყვნენ. და უთხრა მას ბალაკმა: „რა ილაპარაკა უფალმა?“

¹⁸და წარმოთქვა ბალაამმა თავისი იგავი: „ადექი, ბალაკ, და ისმინე და ყური მიგდე, ციფორის ძევ.

¹⁹ღმერთი კაცი როდია, რომ იცრუოს, და არც ადამიანის შვილია, რომ გადათქვას. იტყვის და არ გააკეთებს? ილაპარაკებს და არ აღასრულებს?

²⁰აჰა, კურთხევა მებრძანა; მან აკურთხა, და მე ვერ შევცვლი.

²¹არ შეუმჩნევია მას სიცრუე იაკობში და არ დაუნახავს უკეთურება ისრაელში. უფალი, მისი ღმერთი, მასთანაა, და სამეფო ბუკის ჭექაა მასში.

²²ღმერთმა გამოიყვანა ისინი ეგვიპტიდან. ძალი გარეული ხარისა აქვს მას.

²³რადგან არ არსებობს მისნობა იაკობის წინააღმდეგ და არ ჭრის ჯადოქრობა ისრაელის წინააღმდეგ. თავის დროზე იტყვიან იაკობსა და ისრაელზე: ნახეთ, რა მოიმოქმედაო ღმერთმა!

²⁴აჰა, ხალხი ლომის ბოკვერივით გაიღვიძებს და ლომივით იბრდღვენს; და მანამ არ დაიძინებს, ვიდრე ნანადირევს არ შეჭამს და დახოცილთა სისხლს არ შესვამს.“

²⁵და უთხრა ბალაკმა ბალაამს: „ნურც დაწყევლი და ნურც აკურთხებ მას!“

²⁶და მიუგო ბალაამმა და უთხრა ბალაკს: „განა არ გითხარი, რომ რასაც უფალი მეტყვის, იმას გავაკეთებ-მეთქი?“

²⁷და უთხრა ბალაკმა ბალაამს: „წამოდი, სხვაგან წაგიყვან. იქნებ ინებოს ღმერთმა და დამიწყევლო იქიდან.“

²⁸და წაიყვანა ბალაკმა ბალაამი ფეღორის თხემზე, რომელიც გადმოჰყურებს უდაბნოს.

²⁹უთხრა ბალაამმა ბალაკს: „ამიშენე შვიდი სამსხვერპლო და მომიმზადე აქ შვიდი მოზვერი და შვიდი ვერძი.“

³⁰და გააკეთა ბალაკმა, როგორც ბალაამმა უთხრა, და აღავლინა თითო მოზვერი და თითო ვერძი თითოეულ სამსხვერპლოზე.