Read ქართული ბიბლია, სრული ვერსია Numbers 25 Bible Online

Numbers 25 - ქართული ბიბლია, სრული ვერსია bible

Numbers 25

¹ცხოვრობდა ისრაელი შიტიმში, და დაიწყო ხალხმა მრუშობა მოაბელთა ასულებთან,

²რომლებიც იწვევდნენ ხალხს თავიანთი ღმერთების ნაკერპავებზე, და ჭამდა ხალხი და თაყვანს სცემდა მათ კერპებს.

³და მიეკრა ისრაელი ბაყალ-ფეღორს, და აღეგზნო რისხვა უფლისა ისრაელზე,

⁴და უთხრა უფალმა მოსეს: „მოიყვანე ყოველი თავკაცი ხალხისა და ჩამოკიდე ისინი მზეზე უფლის წინაშე“ და გადავა მძვინვარება უფლის რისხვისა ისრაელისაგან.

⁵და უთხრა მოსემ ისრაელის მსაჯულებს: „მოკლას თითოეულმა თავის კაცთაგან, ვინც კი ბაყალ-ფეღორს მიეკრა.“

⁶და ერთხელ ერთი ისრაელიანი მოვიდა და მოიყვანა თავის ძმებთან მიდიანელი ქალი, მოსეს თვალწინ და ისრაელიანთა მთელი თემის წინაშე, როდესაც ისინი იდგნენ და ტიროდნენ საკრებულო კარვის კართან.

⁷და როცა იხილა ფინეხასმა, აარონ მღვდლის ძის, ელეაზარის ძემ, ადგა შუა თემიდან და შუბი აიღო ხელში.

⁸მიჰყვა ისრაელიანს მის საწოლამდე და შუბით გაფატრა ორივე მუცელზე, ისრაელიანი და ის ქალი. და შეწყდა ისრაელიანთა მუსვრა.

⁹მუსვრის დროს გაწყდა 24 ათასი კაცი.

¹⁰უთხრა უფალმა მოსეს:

¹¹„ფინეხასმა, აარონ მღვდლის ძის, ელეაზარის, ძემ, დააცხრო ჩემი რისხვა ისრაელიანებზე, რადგან შური იძია ჩემს გამო მათზე. და არ მოვსპე მე ისრაელიანები ჩემი შურით.

¹²ამიტომ უთხარი მას: აჰა, მე ვაძლევ მას მშვიდობის აღთქმას.

¹³ეს იქნება მისთვის და მისი მოდგმისათვის მღვდლობის საუკუნო აღთქმა იმის სანაცვლოდ, რომ შური იძია თავისი ღმერთისათვის და გამოისყიდა ისრაელიანები.“

¹⁴ხოლო სახელი მოკლული ისრაელიანისა, რომელიც მოკლულ იქნა მიდიანელ ქალთან, იყო ზიმრი, სალუს ძე, სიმეონიანთა შტოს თავკაცი.

¹⁵და სახელი მოკლული მიდიანელი ქალისა იყო ქოზბი, ასული ცურისა, რომელიც იყო თავკაცი უბოთისა, მიდიანის ტომისა.

¹⁶უთხრა უფალმა მოსეს:

¹⁷„დაემტერეთ მიდიანელებს და მუსრი გაავლეთ,

¹⁸ვინაიდან მზაკვრობით გიმტრეს, როცა გაცდუნეს ფეღორით, და ქოზბით, მიდიანელი თავკაცის ასულით, თავიანთი დით, რომელიც მოკლულ იქნა მუსვრის დღეს ფეღორის გამო.“