Read ქართული ბიბლია, სრული ვერსია Haggai 2 Bible Online

Haggai 2 - ქართული ბიბლია, სრული ვერსია bible

Haggai 2

¹მეშვიდე თვის ოცდამეერთე დღეს იყო უფლის სიტყვა ანგია წინასწარმეტყველის პირით:

²უთხარი ზერუბაბელ შეალთიელის ძეს, იუდას განმგებელს, იესო იეჰოცადაკის ძეს, მღვდელმთავარს, და მთელს დანარჩენ ხალხს:

³ვინ არის დარჩენილი თქვენს შორის, ვინც მოსწრებია ამ სახლის პირვანდელ დიდებას? რას ხედავთ ახლა? ხომ არარაობად ჩანს თქვენს თვალში!

⁴ახლა გამაგრდი, ზერუბაბელ! — ამბობს უფალი. — გამაგრდი იესო იეჰოცადაკის ძევ, მღვდელმთავარო! მთელი ქვეყნის ერო! — ამბობს უფალი, — და იშრომეთ, რადგან თქვენთანა ვარ, — ამბობს ცაბაოთ უფალი. —

⁵სიტყვა, ეგვიპტიდან გამოსვლისას რომ დაგიდევით, და ჩემი სული იმყოფება თქვენს შორის. ნუ გეშინიათ.

⁶რადგან ასე ამბობს ცაბაოთ უფალი: კიდევ ცოტაც და შევარყევ ცას და მიწას, ზღვასა და ხმელეთს.

⁷შევარყევ ყველა ხალხს და აღსრულდება ყოველი ხალხის საწადელი: დიდებით ავავსებ ამ სახლს, — ამბობს ცაბაოთ უფალი. —

⁸ჩემია ვერცხლი და ჩემია ოქრო, — ამბობს ცაბაოთ უფალი. —

⁹პირვანდელზე უფრო დიდი იქნება ამ უკანასკნელი სახლის დიდება, — ამბობს ცაბაოთ უფალი. — ამ ადგილზე მოვაფენ მშვიდობას, — ამბობს ცაბაოთ უფალი.

¹⁰მეცხრე თვის ოცდამეოთხე დღეს, დარიოსის მეორე წელს, იყო უფლის სიტყვა ანგია წინასწარმეტყველის პირით:

¹¹ასე თქვა ყოვლისმპყრობელმა უფალმა: ჰკითხე მღვდლებს რჯული:

¹²აჰა, მიაქვს კაცს წმიდა ხორცი თავისი კალთით, თუ შეეხო კალთით პურს, შეჭამადს, ღვინოს, ზეთს ან რაიმე საჭმელს, თუ გახდება წმიდა? მიუგეს მღვდლებმა და უთხრეს: არაო.

¹³თქვა ანგიამ: თუ შეეხო ამას ყველაფერს გაუწმიდურებული კაცი, გაუწმიდურდება ეს ყველაფერი? მიუგეს მღვდლებმა და უთხრეს: გაუწმიდურდებაო.

¹⁴მიუგო ანგიამ და უთხრა: ასეთია ეს ერი, ასეთია ეს ხალხი ჩემს წინაშე, — ამბობს უფალი, — ასეთია მათი ხელის ნამოქმედარი. მათი მოტანილი ყველაფერი უწმიდურია.

¹⁵ახლა დააკვირდით, რა ხდებოდა ძველად, ვიდრე ქვა ქვაზე დაიდებოდა უფლის ტაძარში.

¹⁶მივიდოდნენ ოცძნიან ზვინთან და აღმოჩნდებოდა 10. მივიდოდნენ საწნახელთან 50 საწყაოს ამოსახაპავად და აღმოჩნდებოდა 20.

¹⁷გინადგურებდით მთელს ნამუშაკევს ხორშაკით, სიყვითლით და სეტყვით. და მაინც არ მოიქეცით ჩემსკენ, — ამბობს უფალი. —

¹⁸დააკვირდით, რა ხდებოდა ძველად მეცხრე თვის ოცდამეოთხე დღიდან, იმ დღიდან, რაც უფლის ტაძარი დაფუძნდა, დააკვირდით:

¹⁹თუღა დარჩა ბეღელში თესლი? თუ გამოუღია ნაყოფი ვაზს, ლეღვს, ბროწეულს და ზეთისხილს? ამიერიდან კი ვაკურთხებ.

²⁰მეორედ იყო უფლის სიტყვა ანგიას მიმართ თვის ოცდამეოთხე დღეს:

²¹„ასე უთხარი ზერუბაბელს, იუდას განმგებელს: შევარყევ ცას და მიწას.

²²დავამხობ სამეფოთა ტახტებს, მოვსპობ წარმართთა სამეფოთა ძლიერებას, დავამხობ ეტლებს მხედრებითურთ, და დაეცემიან ცხენები და მხედრები ერთმანეთის მახვილით,

²³იმ დღეს, — ამბობს ცაბაოთ უფალი, — აგიყვან შენ, ზერუბაბელ შეალთიელის ძეო, ჩემო მორჩილო, — ამბობს უფალი, — და ბეჭედივით მეყოლები, რადგან ჩემი რჩეული ხარ, — ამბობს ცაბაოთ უფალი.“