Read ქართული ბიბლია, სრული ვერსია Zechariah 11 Bible Online

Zechariah 11 - ქართული ბიბლია, სრული ვერსია bible

Zechariah 11

¹გააღე, ლიბანო, შენი კარიბჭე, რომ ცეცხლმა შეჭამოს შენი კედრები!

²გოდებდე, კვიპაროსო, რადგან დაეცა კედარი, რადგან გაიძარცვნენ ძლევამოსილნი; გოდებდეთ, ბაშანის მუხებო, რადგან დაემხო უღრანი ტყე.

³ისმინეთ მწყემსთა გოდების ხმა, რადგან გაიძარცვა მათი იალაღები; ისმინეთ ლომთა ბრდღვინვა, რადგან გაიძარცვა იორდანეს მშვენება.

⁴ასე ამბობს უფალი, ჩემი ღმერთი: დამწყსე დასაკლავად განწირული ცხვრები,

⁵მოვაჭრენი რომ ხოცავენ უწყალოდ, გამყიდველნი კი ამბობენ: „კურთხეულია უფალი, რადგან გავმდიდრდით!“ მათ მწყემსებსაც არ ანაღვლებთ ისინი.

⁶რადგან მეც აღარ დავინდობ ამ ქვეყნის მკვიდრთ, — ამბობს უფალი, — აჰა, ჩავუგდებ ყოველ კაცს თავის თვისტომს ხელში და თავის მეფეს, და ისინი აიკლებენ ქვეყანას, და მე არ დავიხსნი მათ მათი ხელიდან.

⁷დავმწყემსავ ცხვარს, დასაკლავად განწირულ ცხვარს, დაბეჩავებულ ცხვარს. ავიღებ ორ კომბალს, ერთს ვუწოდებ სიკეთეს, მეორეს — საკრველს, და იმითი დავმწყემსავ ცხვარს.

⁸ერთ თვეში მოვსპობ სამ მწყემსს; და ვეღარ აიტანს მათ ჩემი სული, როგორც მათმა სულმა შემიძულა მე.

⁹და მე ვამბობ: „მე აღარ დაგმწყემსავთ; მოსაკვდომი მოკვდეს, გასაწყვეტი გაწყდეს, დარჩენილებმა ერთმანეთის ხორცი ჭამონ.“

¹⁰ავიღებ კომბალს — სიკეთეს და გადავტეხ, რათა გავაქარწყლო ჩემი აღთქმა, რომელიც ყველა ხალხებს დავუდე.

¹¹და მოისპობა ის იმ დღეს, და მიხვდებიან ჩემი შემყურე დაბეჩავებული ცხვრები, რომ ეს უფლის სიტყვაა.

¹²და ვეტყვი მათ: „თუ გეთნევათ, მომეცით ჩემი გასამრჯელო, და თუ არა, ნუ მომცემთ;“ და მომიწონიან გასამრჯელოდ ოცდაათ ვერცხლს.

¹³და მითხრა უფალმა: „ჩაყარე ისინი საგანძურში,“ — საუკეთესო საფასური, როგორც შევფასდი მათგან. მეც ავიღე 30 ვერცხლი და ჩავყარე უფლის სახლის საგანძურში.

¹⁴და გავტეხ ჩემს მეორე კომბალს — საკრველს, რათა დავარღვიო სიყვარული იუდასა და ისრაელს შორის.

¹⁵და მითხრა უფალმა: კიდევ აიღე უგუნური მწყემსის იარაღი,

¹⁶რადგან აჰა, დავუყენებ ამ ქვეყანას მწყემსს, რომელიც მომაკვდავთ არ მიხედავს, დაკარგულს არ მოძებნის, დაცემულს არ განკურნავს, ფეხზე მდგარს არ გამოკვებავს, მაგრამ ნასუქალთა ხორცს შეჭამს და ჩლიქებს აახლეჩს.

¹⁷ვაი უმაქნის მწყემსს, ფარის მიმტოვებელს! მახვილი მის მკლავზე და მის მარჯვენა თვალზე. მთლიანად შეახმება მკლავი და მთლიანად დაევსება მარჯვენა თვალი!