Read ქართული ბიბლია, სრული ვერსია Malachi 1 Bible Online

Malachi 1 - ქართული ბიბლია, სრული ვერსია bible

Malachi 1

¹განაჩენი. სიტყვა უფლისა ისრაელისადმი მალაქიას მიერ გაცხადებული:

²მე შეგიყვარეთ თქვენ, — გეუბნებათ უფალი, — თქვენ კი ამბობთ: როგორ შეგვიყვარე? განა ესავი და იაკობი ძმები არ იყვნენ? — ამბობს უფალი: — მაგრამ მე იაკობი უფრო შევიყვარე,

³ესავი კი შევიძულე, და გავაუდაბურე მისი მთები და უდაბნოს ტურებს მივეცი მისი სამკვიდრო.

⁴თუმცა ამბობს ედომი: დარბეული ვართ, მაგრამ კვლავ აღვადგენთ ნაოხარს. აი რას ამბობს ყოვლისშემძლე უფალი: შეიძლება ააშენონ, მაგრამ მე დავანგრევ. და დაარქმევენ მათ ბოროტების მხარეს, ხალხს, რომელსაც სამუდამოდ შემოსწყრა უფალი.

⁵თქვენი თვალით იხილავთ ამას და იტყვით: დიდებულია უფალი ისრაელის საზღვრებს გარეთაც!

⁶შვილი პატივს სცემს მამას და ყმა — თავის ბატონს. თუ მამა ვარ, სად არის ჩემი პატივისცემა? თუ მათი ბატონი ვარ, სად არის ჩემდამი კრძალვა? თქვენ გეუბნებათ ყოვლისშემძლე უფალი: ჰოი მღვდლებო, ჩემი სახელის შეურაცხმყოფელნო! თქვენ კი ამბობთ: რითი შეურაცხვყავითო შენი სახელი?

⁷მოგაქვთ წაბილწული პური ჩემს სამსხვერპლოზე და ამბობთ: რითი წაგბილწეთო? იმით, რომ ფიქრობთ: უფლის ტაბლა რა პატივის ღირსიაო.

⁸ბრმას რომ მწირავთ მსხვერპლად, ცუდი არ არის? კოჭლი და სნეული რომ მოგყავთ, ცუდი არ არის? აბა, მიართვი იგი შენს ხელისუფალს, თუ მოგიწონებს ან თუ კეთილად შემოგხედავს? — ამბობს ყოვლისშემძლე უფალი. —

⁹ახლა კი ევედრეთ ღმერთს, ვინძლო, შეგვიწყალოს. როგორღა შემოგხედავთ კეთილად, როცა თქვენი ხელიდან გამოდის ეს ძღვენი? — ამბობს ყოვლისშემძლე უფალი.

¹⁰რატომ არცერთი თქვენგანი არ დახშავს კარიბჭეებს, რომ ფუჭად აღარ ანთებდეთ ცეცხლს ჩემს სამსხვერპლოზე?! არ მეთნევით, — ამბობს ყოვლისშემძლე უფალი და არ მივიღებ თქვენი ხელით მორთმეულ ძღვენს.

¹¹რადგან დიდია ჩემი სახელი ხალხებში, მზის აღმოსავალიდან მის დასავალამდე. ყოველ ადგილას უკმევენ საკმეველს ჩემს სახელს და წმიდა ძღვენს მწირავენ, რადგან დიდია ჩემი სახელი ხალხებში, — ამბობს ყოვლისშემძლე უფალი. —

¹²თქვენ კი შელახეთ ჩემი სახელი იმით, რომ ამბობთ: უფლის ტაბლა წაბილწულიაო და მასზე შეწირული ძღვენი საკვებად საძულველიო.

¹³ამბობთ: აჰა, რა დამქანცველიაო ეს საქმე. და გძულთ იგი,[1] — ამბობს ყოვლისშემძლე უფალი, — მოგყავთ ნატაცები, კოჭლი და სნეული და ეს არის თქვენი ძღვენი — როგორ მივიღებ მას თქვენი ხელიდან?! — ამბობს უფალი. —

¹⁴წყეულიმც იყოს ის თვალთმაქცი, ვისაც საღი მამალი პირუტყვი ჰყავს სამწყსოში და შეუთქვამს მას, მაგრამ მის ნაცვლად, ხინჯიანს სწირავს უფალს მსხვერპლად! რადგან დიდებული მეფე ვარ მე, — ამბობს ყოვლისშემძლე უფალი, — და შიშის მომგვრელია ჩემი სახელი ხალხებში.