Read ქართული ბიბლია, სრული ვერსია Deuteronomy 10 Bible Online

Deuteronomy 10 - ქართული ბიბლია, სრული ვერსია bible

Deuteronomy 10

¹და იმ დროს მითხრა მე უფალმა: „გამოთალე ორი ქვის დაფა იმ პირვანდელთა მსგავსი, ამოდი ჩემთან მთაზე და გაიკეთე ხის კიდობანი.

²და დავწერ ქვის დაფებზე იმ სიტყვებს, რომლებიც იყო პირვანდელ ქვის დაფებზე, შენ რომ დაამსხვრიე. და კიდობანში ჩააწყვე ისინი.“

³და გავაკეთე მე კიდობანი აკაციის ხისგან, და გამოვთალე ორი ქვის დაფა, პირვანდელთა მსგავსი, და ავედი მთაზე. და ხელში ორი ქვის დაფა მეჭირა.

⁴და მან დაწერა ქვის დაფებზე პირვანდელი ნაწერის მსგავსად ათი მცნება, რომელნიც თქვა თქვენს მიმართ უფალმა მთაზე ცეცხლის შუაგულიდან შეკრების დღეს, და მომცა მე ისინი უფალმა.

⁵და გამოვბრუნდი და ჩამოვედი მთიდან, და ჩავაწყვე დაფები კიდობანში, რომელიც გავაკეთე, და აწყვია იქ, როგორც მე მიბრძანა უფალმა.

⁶და ისრაელის ძენი გაემართნენ ბეეროთ-ბენე-იაყაკანიდან მოსერასაკენ. და იქ მოკვდა აარონი და იქვე დაიმარხა. მის ნაცვლად მისი ძე, ელეაზარი, გახდა მღვდელი.

⁷იქიდან გუდგოდასაკენ გაემგზავრნენ და გუდგოდადან იოტბათასაკენ, წყლის ნაკადთა ქვეყნისაკენ.

⁸იმ დროს გამოაცალკევა უფალმა ლევის ტომი, რომ ეტარებინათ უფლის აღთქმის კიდობანი უფლის წინაშე, ემსახურათ მისთვის და ეკურთხებინათ მისი სახელით, როგორც დღევანდლამდე არის.

⁹ამიტომაც არა აქვთ ლევიანებს წილი და სამკვიდრო თავის მოძმეებთან. თავად უფალია მათი სამკვიდრო, როგორც უთხრა მას უფალმა, შენმა ღმერთმა.

¹⁰და მე დავრჩი მთაზე მაშინდელივით 40 დღე და 40 ღამე. და მისმინა მე უფალმა ამჯერადაც და არ ისურვა შენი დაღუპვა.

¹¹და მითხრა მე უფალმა: „ადექი და წინ წაუძეხი ამ ხალხს; დაე, მივიდნენ და დაიმკვიდრონ ის ქვეყანა, რომლის მიცემაც მე ფიცით აღვუთქვი მათ მამებს.“

¹²და ახლა, ისრაელ, რას ითხოვს შენგან უფალი, შენი ღმერთი? თუ არა იმას, რომ გეშინოდეს უფლისა, შენი ღმერთისა, იარო მისი გზებით, გიყვარდეს ის, და ემსახურო უფალს, შენს ღმერთს, მთელი შენი გულით და მთელი შენი სულით,

¹³დაიცვა მცნებანი უფლისა და მისი წესები, რომელთაც გიბრძანებ დღეს შენს სასიკეთოდ.

¹⁴უფლის, შენი ღმერთის, არის ცანი და ცანი ცათანი, მიწა და ყოველივე, რაც მასზეა.

¹⁵მხოლოდ შენი მამები შეიტკბო უფალმა და შეიყვარა ისინი, და გამოგარჩიათ თქვენ, მათი შთამომავლობა მათ შემდეგ ყველა ხალხიდან, როგორც ამ დღევანდელ დღეს.

¹⁶დაიცვითეთ გული და ნუღარ გაჯიუტდებით,

¹⁷რადგან უფალი, თქვენი ღმერთი, არის ღმერთთა ღმერთი და მეუფეთა მეუფე, დიდი, ძლიერი და მრისხანე ღმერთი, რომელიც მიუკერძოებელია და მოუქრთამავი;

¹⁸რომელიც ობოლსა და ქვრივს სამართალს უჩენს და უყვარს ხიზანი, აჭმევს და აცმევს მათ.

¹⁹და თქვენც გიყვარდეთ ხიზანი, რადგან თქვენ თვითონ ხიზნები იყავით ეგვიპტის ქვეყანაში.

²⁰გეშინოდეს უფლისა, შენი ღმერთისა, მას ემსახურებოდე, მას მიეკარი და მისი სახელით ფიცულობდე.

²¹იგია შენი დიდება და იგია შენი ღმერთი, რომელმაც მოიმოქმედა შენთვის ის დიდი და მრისხანე საქმეები, რაც შენმა თვალებმა იხილეს.

²²70 სული ჩავიდა შენი მამა-პაპა ეგვიპტეში, ახლა კი ცის ვარსკვლავებივით გაგამრავლა უფალმა, შენმა ღმერთმა.