Read ქართული ბიბლია, სრული ვერსია Deuteronomy 16 Bible Online

Deuteronomy 16 - ქართული ბიბლია, სრული ვერსია bible

Deuteronomy 16

¹დაიცავი აბიბის თვე და მოუმზადე პასექი უფალს, შენს ღმერთს, რადგან აბიბის თვეში გამოგიყვანა უფალმა, შენმა ღმერთმა, ეგვიპტიდან, ღამით.

²და დაკალი საპასექო მსხვერპლი უფლის, შენი ღმერთისათვის, შენი ცხვარ-ძროხიდან იმ ადგილას, რომელსაც ამოირჩევს უფალი, თავისი სახელის იქ დასავანებლად.

³არ მიატანო საპასექო მსხვერპლს საფუარიანი პური. შვიდ დღეს ჭამე ხმიადთან, გაჭირვების პურთან, ერთად, იმის სამახსოვროდ, რომ ნაჩქარევად გამოხვედით ეგვიპტის ქვეყნიდან, ასე გემახსოვრება ეგვიპტის ქვეყნიდან შენი გამოსვლის დღე მთელი შენი სიცოცხლე.

⁴და არ იპოვებოდეს საფუარიანი მთელს შენს საზღვრებში ამ შვიდ დღეს. და დილამდე არ დარჩეს შეუჭმელი ის ხორცი, რომელსაც შენ მსხვერპლად შესწირავ პირველ საღამოთი.

⁵ნუ დაკლავ საპასექო მსხვერპლს შენს რომელიმე ქალაქში, რომელსაც უფალი, შენი ღმერთი, გაძლევს,

⁶არამედ მხოლოდ იმ ადგილას, რომელსაც ამოირჩევს უფალი, შენი ღმერთი, თავისი სახელის დასავანებლად — იქ დაკალი საპასექო მსხვერპლი საღამოს, მზის ჩასვლისას, ეგვიპტიდან შენი გამოსვლის ჟამს.

⁷და გაამზადე და ჭამე იმ ადგილას, რომელსაც ამოირჩევს უფალი, შენი ღმერთი, დილით კი გაბრუნდი და წადი შენი კარვებისაკენ.

⁸ექვს დღეს ჭამე ხმიადი და მეშვიდე დღეს დღესასწაულია უფლისა, შენი ღმერთისა. არანაირი საქმე არ აკეთო.

⁹შვიდი შვიდეული გადაითვალე, ნამგალს რომ შეიტანენ ყანაში იმ დღიდან დაიწყე შვიდეულების ათვლა,

¹⁰და გადაუხადე შვიდეულთა დღესასწაული უფალს, შენს ღმერთს, შენი ნებით და შენი შესაძლებლობით, რის გამოც გაკურთხებს შენ უფალი, შენი ღმერთი.

¹¹და გაიხარეთ უფლის, შენი ღმერთის, წინაშე შენ და შენმა ძეებმა, შენმა ასულებმა, შენმა მსახურებმა, შენმა მხევლებმა და ლევიანმა, რომელიც შენს კარზე ცხოვრობს, და ხიზანმა და ქვრივ-ობოლმა, რომელნიც თქვენში არიან, იმ ადგილას, რომელსაც ამოირჩევს უფალი, შენი ღმერთი, თავისი სახელის იქ დასავანებლად.

¹²და გახსოვდეს, რომ მონა იყავი ეგვიპტეში, და დაიცავი და შეასრულე ეს წესები.

¹³იზეიმე კარვობის დღესასწაული შვიდ დღეს, როცა მორჩები კალოობასა და ყურძნის წურვას.

¹⁴და გაიხარეთ ამ დღესასწაულზე შენ და შენმა ძეებმა, შენმა ასულებმა, შენმა მონა-მხევლებმა და ლევიანმა, რომელიც შენს კარზეა; შენმა ხიზანმა და ქვრივ-ობოლმა.

¹⁵შვიდ დღეს იდღესასწაულე უფლის, შენი ღმერთის სახელით, იმ ადგილას, რომელსაც ამოირჩევს იგი, რადგან გაკურთხა უფალმა, შენმა ღმერთმა, უხვი მოსავლითა და შენი ხელის ყოველი საქმის წარმატებით, და მუდამ გახარებული იქნები.

¹⁶წელიწადში სამჯერ გამოცხადდეს ყველა შენი მამაკაცი უფლის, შენი ღმერთის, წინაშე იმ ადგილას, რომელსაც უფალი ამოირჩევს: უფუარობის დღესასწაულზე, შვიდეულის დღესასწაულზე და კარვობის დღესასწაულზე. და არავინ მოვიდეს უფლის წინაშე ხელცარიელი,

¹⁷ყველას ძღვენი გეჭიროთ ხელში უფლის, შენი ღმერთის კურთხევის კვალობაზე, როგორც მოუცია შენთვის.

¹⁸მსაჯულები და ზედამხედველები დაიყენე შენი ტომებიდან ყველა შენს ქალაქში, რომელსაც გაძლევს უფალი, შენი ღმერთი, რათა სამართლიანად განსაჯონ ხალხი.

¹⁹არ გაამრუდო სამართალი, მიკერძოება არ გამოიჩინო და ქრთამი არ აიღო, რადგან ქრთამი თვალს უბრმავებს ბრძენკაცებს და აუკუღმართებს მართალთა საქმეებს.

²⁰სიმართლეს, მხოლოდ სიმართლეს მიჰყევი, რათა იცოცხლო და დაიმკვიდრო ის ქვეყანა, რომელსაც უფალი, შენი ღმერთი, გაძლევს.

²¹არ დარგო ნერგი აშერასათვის, რა ხისაც არ უნდა იყოს, უფლის, შენი ღმერთის, საკურთხეველთან, რომელსაც შენ ააგებ.

²²და არ აღიმართო სვეტი, რადგან სძულს იგი უფალს, შენს ღმერთს.