Read ქართული ბიბლია, სრული ვერსია Deuteronomy 17 Bible Online

Deuteronomy 17 - ქართული ბიბლია, სრული ვერსია bible

Deuteronomy 17

¹არ შესწირო უფალს, შენს ღმერთს, ზვარაკი ან ცხვარი, რომელსაც რაიმე ხინჯი აქვს, როგორიც არ უნდა იყოს ეს ხინჯი, რადგან სისაძაგლეა ეს უფლის, შენი ღმერთისათვის.

²თუ აღმოჩნდება თქვენში, შენს რომელიმე ქალაქში, რომელსაც უფალი, შენი ღმერთი, გაძლევს, მამაკაცი ან დედაკაცი, რომელიც ბოროტებას ჩაიდენს უფლის, შენი ღმერთის თვალში და გადაუხვევს მის აღთქმას,

³წავა და მოემსახურება სხვა ღმერთებს და თაყვანს სცემს მათ: მზეს ან მთვარეს, ან მთელ ციურ მხედრობას, რაც მე არ მიბრძანებია,

⁴და გეუწყება და მოისმენ, კარგად გამოიძიე. და თუ ეს სიმართლეა, სრული ჭეშმარიტებაა, და ეს სისაძაგლე მოხდა ისრაელში,

⁵გაიყვანე შენს კარიბჭესთან ის მამაკაცი ან დედაკაცი, რომელმაც ეს ბოროტება ჩაიდინა და ჩაქოლე.

⁶ორი მოწმის, ან სამი მოწმის სიტყვით უნდა მოკვდეს, ვინც მოსაკლავია. ხოლო ერთი მოწმის სიტყვით არ შეიძლება მისი მოკვლა.

⁷პირველად მოწმის ხელი უნდა შეეხოს მას მოსაკლავად, და მერე მთელი ხალხის. და ასე აღმოფხვრი ბოროტებას შენი წიაღიდან.

⁸თუ რაიმე მიზეზით გაგიძნელდა მკვლელობის, დავის და დასახიჩრების საქმეების გარჩევა შენს კარიბჭეებში, ადექი და ადი იმ ადგილას, რომელსაც ამოირჩევს უფალი, შენი ღმერთი,

⁹მიდი ლევიან მღვდლებთან და მსაჯულთან, რომლებიც იქნებიან იმ დღეებში, და ჰკითხე და გეტყვიან სამსჯავროს განაჩენს.

¹⁰და მოიქეცი იმ სიტყვისამებრ, რასაც გეტყვიან იმ ადგილას, რომელსაც ამოირჩევს უფალი, და ეცადე ყველაფერი შეასრულო, რასაც გასწავლიან.

¹¹მოიქეცი იმ რჯულისამებრ, რასაც გირჩევენ, და იმ სამართლისამებრ, რასაც გეტყვიან. არ გადაუხვიო სიტყვას, რომელსაც გეტყვიან არც მარჯვნივ და არც მარცხნივ.

¹²ვინც თავხედურად მოიქცევა და არ მოუსმენს მღვდელს, რომელიც უფლის, შენი ღმერთის, მსახურია, ან მსაჯულს, სასიკვდილოდ გადაეცით; და აღმოფხვრი ბოროტებას ისრაელიდან,

¹³და მთელი ხალხი გაიგებს ამას, შეშინდება და აღარ გაკადნიერდება.

¹⁴როცა მიხვალ იმ ქვეყანაში, რომელსაც უფალი, შენი ღმერთი, გაძლევს, და დაიმკვიდრებ მას, დასახლდები იქ და იტყვი: „დავიდგენ მეფეს, ყველა იმ ხალხებივით, ჩემს ირგვლივ რომ არიანო“,

¹⁵დაისვი მეფე, რომელსაც ამოირჩევს უფალი, შენი ღმერთი; შენს მოძმეთაგან დაისვი მეფე; ნება არა გაქვს, უცხოელი დაისვა, რომელიც შენი მოძმე არ არის.

¹⁶მეფემ არ უნდა გაიმრავლოს ცხენები და უკან არ უნდა დააბრუნოს ხალხი ეგვიპტეში ცხენების ამოსარეკად, ვინაიდან უფალმა გითხრათ თქვენ: „აღარ დაბრუნდეთ ამ გზით.“

¹⁷მან არ უნდა იყოლიოს ბევრი ცოლები, რომ არ გაირყვნას მისი გული. და ვერცხლი და ოქრო არ გაიმრავლოს მეტისმეტად.

¹⁸და როცა თავის სამეფო ტახტზე დაჯდება, გადაიწეროს ეს რჯულის წიგნი ლევიანი მღვდლებისაგან.

¹⁹და თავისთან იქონიოს და იკითხოს მთელი სიცოცხლე, რათა ისწავლოს შიში უფლისა, თავისი ღმერთისა, რომ დაიცვას ამ რჯულის ყოველი სიტყვა და შეასრულოს მისი წესები.

²⁰რათა არ გაუმედიდურდეს თავის მოძმეებს და არ გადაუხვიოს მცნებას არც მარჯვნივ და არც მარცხნივ, რათა დიდხანს იმეფონ მანაც და მისმა ძეებმაც ისრაელის მიწაზე.