Read ქართული ბიბლია, სრული ვერსია Deuteronomy 23 Bible Online

Deuteronomy 23 - ქართული ბიბლია, სრული ვერსია bible

Deuteronomy 23

¹უფლის საკრებულოში ვერ შევა საჭურისი და ვერც კვერცხებდაზიანებული.

²ბუში ვერ შევა უფლის საკრებულში; მისი მეათე თაობაც კი ვერ შევა უფლის საკრებულოში.

³ვერ შევა ყამონელი და მოაბელი უფლის საკრებულოში; მათი მეათე თაობაც კი ვერასოდეს შევა უფლის საკრებულოში,

⁴იმიტომ, რომ არ შემოგეგებნენ თქვენ პურითა და წყლით გზაზე, როცა გამოხვედით ეგვიპტიდან, და იმიტომ, რომ დაიქირავა შუამდინარეთის ფეთორელი ბალაამი, ძე ბეყორისა, შენს დასაწყევლად.

⁵და არ ინება უფალმა, შენმა ღმერთმა, მოსმენა ბალაამისა, და წყევლა კურთხევად შეგიცვალა, რადგან შეგიყვარა შენ უფალმა, შენმა ღმერთმა.

⁶ნურასოდეს შენს იცოცხლეში ნუ ეძებ მათთვის მშვიდობასა და სიკეთეს.

⁷ნუ შეიძულებ ედომელს, რადგან ის შენი მოძმეა. ნუ შეიძულებ ეგვიპტელს, რადგან ხიზნად იყავი მის ქვეყანაში.

⁸ბავშვები, რომლებიც მათ შეეძინებათ, მესამე თაობაში შევლენ უფლის კრებულში.

⁹როცა სალაშქროდ გახვალ შენი მტრის წინააღმდეგ და დაიბანაკებ, ერიდე ყოველგვარ ხინჯს.

¹⁰თუ ვინმე იქნება თქვენში, რომელიც სუფთა არ იქნება ღამის დინების გამო, გავიდეს ბანაკს გარეთ და უკან არ შემოვიდეს,

¹¹საღამო ჟამს წყლით დაიბანოს და მზის ჩასვლისას შევიდეს ბანაკში.

¹²ადგილი იქონიე ბანაკს გარეთ, სადაც შეგეძლება გასვლა და მოსაქმება;

¹³ნიჩაბი გქონდეს სარტყელში და გარეთ მოსაქმებისას, მიწა ამოთხარე და ჩაფალი შენი განავალი;

¹⁴რადგან უფალი, შენი ღმერთი, დადის შენს ბანაკში, რათა გიხსნას და ხელში ჩაგიგდოს შენი მტრები. და იყოს შენი ბანაკი წმიდა, და არ იხილოს მან იქ რაიმე სამარცხვინო და ზურგი არ შეგაქციოს.

¹⁵არ გადასცე თავის ბატონს მონა, როცა მისგან გაქცეული თავს შემოგაფარებს.

¹⁶შენთან იცხოვროს, შენს წიაღში, იმ ქალაქში, რომელსაც ამოირჩევს, მის ერთ-ერთ ბჭესთან, სადაც მოეწონება. არ შეავიწროვო იგი.

¹⁷ნუ იქნება ტაძრის მეძავი ისრაელის ასულთაგან ნუ იქნება ტაძრის მსიძავი ისრაელის ძეთაგან.

¹⁸არავითარი აღთქმისათვის არ შეიტანო მეძავის გასამრჯელო და მსიძავის ფასი უფლის, შენი ღმერთის სახლში, რადგან ორივე სისაძაგლეა უფლის, შენი ღმერთისათვის.

¹⁹არ მისცე შენს მოძმეს ვახშით არც ვერცხლი, არც სასმელ-საჭმელი, არც რაიმე ისეთი, რაც ვახშით გაიცემა.

²⁰უცხოელს შეგიძლია ვახშით ასესხო, ხოლო შენს მოძმეს არ ასესხო ვახშით, რათა აკურთხოს უფალმა, შენმა ღმერთმა, მთელი შენი ნაამაგარი იმ ქვეყანაში, რომელშიც შედიხარ დასამკვიდრებლად.

²¹თუ აღთქმას დაუდებ უფალს, შენს ღმერთს, არ დაუყოვნო შესრულება, რადგან მოგკითხავს აღთქმულს უფალი, შენი ღმერთი, და ცოდვა დაგედება.

²²და თუ არ მიგიცია აღთქმა, არ დაგედება ცოდვა.

²³შენი პირიდან გამოსული სიტყვა დაიცავი, და შეასრულე, როგორც აღუთქვი უფალს, შენს ღმერთს, რაც ნებაყოფლობით აღუთქვი შენი პირით.

²⁴თუ შეხვალ შენი მოყვასის ვენახში, ყურძენი ჭამე რამდენიც გინდა, ოღონდ კალათით არ წაიღო.

²⁵თუ შეხვალ შენი მოყვასის ყანაში, ხელით რასაც გაგლეჯ, ის წაიღე, ოღონდ ნამგალს ნუ იხმარებ.