Read ქართული ბიბლია, სრული ვერსია Deuteronomy 24 Bible Online

Deuteronomy 24 - ქართული ბიბლია, სრული ვერსია bible

Deuteronomy 24

¹თუ კაცი ცოლს შეირთავს, მაგრამ ქალი მადლს ვერ ჰპოვებს მის თვალში, რადგან სამარცხვინოს რასმე უპოვნის კაცი, დაუწეროს გაყრილობის ბარათი, ხელში მისცეს და გაუშვას თავისი სახლიდან.

²და გავა ქალი მისი სახლიდან, წავა და გათხოვდება სხვა კაცზე.

³და თუ შეიძულა იგი ამ მეორე ქმარმაც, და დაუწერა მას გაყრილობის ბარათი, და მისცა მას და გაუშვა იგი თავისი სახლიდან, ან თუ მოკვდება ეს მეორე ქმარი, რომელმაც იგი ცოლად მოიყვანა,

⁴არ შეუძლია მის პირველ ქმარს, რომელმაც გაუშვა იგი, კვლავ დაიბრუნოს ცოლად, მას შემდეგ, რაც წაიბილწა, რადგან სისაძაგლეა ეს უფლის წინაშე, და ნუ გარყვნი ქვეყანას, რომელსაც უფალი, შენი ღმერთი, გაძლევს სამკვიდროდ.

⁵თუ კაცს ახლად შერთული ცოლი ჰყავს, ნუ გავა ლაშქარში და ნურც ნურაფერი დაეკისრება. ერთი წელი თავისუფალი იყოს თავის სახლში და გაახაროს თავისი ცოლი, რომელიც შეირთო.

⁶არავინ აიღოს გირაოდ დოლაბები (თუნდაც მხოლოდ ზედა), რადგან კაცის სულის დამგირავებელი იქნება იგი.

⁷თუ აღმოჩნდება კაცი, რომელმაც მოიტაცა თავისი მოძმე ისრაელიანი, დაიმონა და გაყიდა იგი, უნდა მოიკლას მომტაცებელი; ასე აღმოფხვრი ბოროტებას შენი წიაღიდან.

⁸არ გამოგრჩეს კეთრის წყლული, რათა ზუსტად დაიცვა და შეასრულო ყველაფერი, რასაც გასწავლიან ლევიანი მღვდლები. რაც მე ვუბრძანე მათ, დაიცავით შესასრულებლად.

⁹გაიხსენე, თუ რა უყო უფალმა, შენმა ღმერთმა, მირიამს გზაზე, როცა ეგვიპტიდან გამოდიოდით.

¹⁰თუ შენს მოყვასს რაიმეს ასესხებ, არ შეხვიდე მის სახლში გირაოს ასაღებად.

¹¹გარეთ დადექი და მოვალე თვითონ გამოგიტანს გირაოს.

¹²და თუ ის ღარიბია, ღამე არ დაიტოვო მისი გირაო;

¹³დაუბრუნე მზის ჩასვლამდე, რათა დაიძინოს თავის მოსასხამში; ის დაგლოცავს, და ეს სიკეთედ ჩაგეთვლება უფლის, შენი ღმერთის, წინაშე.

¹⁴ნუ შეავიწროვებ მოჯამაგირეს, ღარიბს და გლახაკს, შენი მოძმეთაგანი იქნება იგი თუ შენი ხიზანი, რომელიც შენს ქვეყანაშია, შენს კარიბჭეებში;

¹⁵იმავე დღეს მიეცი თავისი გასამრჯელო, ვიდრე მზე ჩავა, რადგან ღარიბია და ნატრობს მისი სული მას; რათა არ შეჰღაღადოს უფალს შენზე და ცოდვა არ დაგედოს.

¹⁶მამები არ უნდა მოიკლან შვილების ცოდვებისათვის, და შვილები არ უნდა მოიკლან მამების გამო, არამედ თითოეული თავისი ცოდვის გამო მოიკლას.

¹⁷ნუ გაამრუდებ ხიზნისა და ობლის სამართალს, და ნუ აიღებ გირაოდ ქვრივის მოსასხამს.

¹⁸გახსოვდეს, რომ მონა იყავი ეგვიპტეში და გიხსნა უფალმა, შენმა ღმერთმა, იქიდან. ამიტომ გიბრძანებ ამის აღსრულებას.

¹⁹როცა მომკი ყანას და ძნა დაგავიწყდება ნამკალში, ნუ გაბრუნდები მის ასაღებად — ხიზნისათვის და ქვრივ-ობლისათვის იყოს ის, რათა გიკურთხოს უფალმა, შენმა ღმერთმა, შენი ნაამაგარი.

²⁰როცა ჩამობერტყავ ზეთისხილს, თუ რამ დარჩა ზედ, ნუღარ მიუბრუნდები — ხიზნისა და ქვრივ-ობლისათვის იყოს.

²¹როცა ვენახს დაკრეფ, ნუღარ მოიმცვრევ დარჩენილ ნაყოფს: ხიზნისა და ქვრივ-ობლისათვის იყოს.

²²გახსოვდეს, რომ მონა იყავი ეგვიპტის ქვეყანაში. ამიტომ გიბრძანებ ამის აღსრულებას.