Read ქართული ბიბლია, სრული ვერსია Deuteronomy 25 Bible Online

Deuteronomy 25 - ქართული ბიბლია, სრული ვერსია bible

Deuteronomy 25

¹თუ ორ კაცს რაიმე დავა ჩამოვარდებათ ერთმანეთში, სასამართლოს წინაშე წარდგნენ. და განსჯიან მათ; მართალს გაამართლებენ და მტყუანს ბრალს დასდებენ;

²და თუ დამნაშავე გაჯოხვას იმსახურებს, წამოაქცევინოს მსაჯულმა და აცემინოს თავის თვალწინ მისი დანაშაულის კვალობაზე, სათვალავით.

³ორმოცჯერ დაარტყან, მეტი არა, თორემ, თუ გადააჭარბეს და ბევრი ურტყეს, დამცირდება შენი მოძმე შენს თვალში.

⁴კევრში შებმულ ხარს პირს ნუ აუკრავ.

⁵თუ ძმები ერთად ცხოვრობენ და ერთი მათგანი უშვილოდ მოკვდება, მკვდრის ცოლი გარეთ არ უნდა გათხოვდეს უცხო კაცზე, არამედ მისი მაზლი შევიდეს მასთან და შეირთოს იგი ცოლად, და შეუსრულოს მაზლობის წესი.

⁶და პირმშო, რომელსაც ქალი გააჩენს, ის აღუდგენს მკვდარი ძმის სახელს, რათა არ წარიხოცოს მისი სახელი ისრაელიდან.

⁷მაგრამ თუ არ ისურვებს მაზლი თავისი რძლის შერთვას, ქვრივი უხუცესებთან ავიდეს ქალაქის კარიბჭესთან და თქვას: არა სურსო ჩემს მაზლს სახელი აღუდგინოს თავის ძმას ისრაელში, არა სურს მას ჩემი შერთვაო.

⁸და დაიბარებენ მაზლს ქალაქის უხუცესები და მოელაპარაკებიან. და თუ ადგება ის და იტყვის: არ მსურს მისი შერთვაო,

⁹მივა მასთან რძალი უხუცესთა თვალწინ და გახდის ფეხსაცმელს ფეხზე და სახეში შეაფურთხებს, და ეტყვის: ამის ღირსია კაცი, რომელიც არ აშენებსო თავისი ძმის სახლს.

¹⁰და სახელად დაერქმევა მის მოდგმას „ფეხშველანი“

¹¹თუ კაცები წაიჩხუბებიან და ერთ-ერთის ცოლი ქმრის საშველად გავა და მოჩხუბარ კაცს სარცხვინელით დაითრევს,

¹²ხელის მტევანი მოკვეთე ქალს, წყალობის თვალით ნუ შეხედავ მას!

¹³ნუ გექნება ქისაში ორგვარი საწონი — სწორი და მრუდე.

¹⁴ნუ გექნება სახლში ორგვარი საწყაო — სწორი და მრუდე.

¹⁵საწონი სრული და სწორი გქონდეს, საწყაო სრული და სწორი გქონდეს, რათა დღეგრძელი იყო მიწაზე, რომელსაც უფალი, შენი ღმერთი გაძლევს,

¹⁶რადგან სძულს უფალს, შენს ღმერთს, ყველა უკანონობის მოქმედი.

¹⁷გაიხსენე, რა გიყო ყამალეკმა გზაზე, როცა ეგვიპტიდან გამოდიოდი,

¹⁸როგორ დაგიხვდა გზაზე და კუდი მოგწყვიტა, როცა შენ დაღლილი და ღონემიხდილი იყავი, და არ შეეშინდა მას ღმერთისა.

¹⁹და როცა დაგასვენებს უფალი, შენი ღმერთი, ყველა შენი გარეშემო მტრისაგან იმ ქვეყნაში, რომელსაც უფალი, შენი ღმერთი, გაძლევს დასამკვიდრებლად, წაშალე სახელი ყამალეკისა ცისქვეშეთში; არ დაგავიწყდეს!