Read ქართული ბიბლია, სრული ვერსია Deuteronomy 28 Bible Online

Deuteronomy 28 - ქართული ბიბლია, სრული ვერსია bible

Deuteronomy 28

¹და თუ გაიგონებ უფლის, შენი ღმერთის, ხმას, რათა დაიცვა და შეასრულო ყველა მისი მცნება, რომელსაც მე გიბრძანებ დღეს, დაგაყენებს შენ უფალი, შენი ღმერთი, ქვეყნიერების ყველა ხალხებზე მაღლა.

²და გადმოვა შენზე ყველა ეს კურთხევა და აღსრულდება, თუ მოუსმენ უფლის, შენი ღმერთის, ხმას.

³კურთხეულიმც იყავ ქალაქში და კურთხეულიმც იყავ მინდვრად.

⁴კურთხეულიმც იყოს ნაყოფი მუცლისა შენისა და ნაყოფი შენი მიწისა, ნამატი შენი ცხვარ-ძროხისა.

⁵კურთხეულიმც იყოს შენი ბეღლები და შენი მარნები.

⁶კურთხეულიმც იყავ შინ შესული და კურთხეულიმც იყავ გარეთ გამოსული.

⁷დასცემს უფალი შენს წინაშე შენს მტრებს, შენს წინააღმდგომთ. ერთი გზით წამოვლენ შენსკენ და შვიდი გზით გაიქცევიან უკან.

⁸კურთხევით მოხედავს უფალი შენს ბეღლებსა და ყველა შენს საქმეს; და გაკურთხებს იმ ქვეყანაში, რომელსაც გაძლევს უფალი, შენი ღმერთი.

⁹დაგაყენებს შენ უფალი თავის წმიდა ერად, როგორც შემოგფიცა, თუ დაიცავ უფლის, შენი ღმერთის, მცნებებს და ივლი მისი გზებით.

¹⁰და დაინახავენ ქვეყნის ყველა ხალხები, რომ უფლის სახელია შენზე, და შეეშინდებათ შენი.

¹¹და გაგიმრავლებს უფალი სასიკეთოდ შენი მუცლის ნაყოფს იმ ქვეყანაში, რომლის მოცემაც ფიცით აღუთქვა შენს მამებს.

¹²გაგიხსნის უფალი თავის მადლიან საუნჯეს — ზეცას, რათა აწვიმოს შენს მიწაზე თავის დროზე და აკურთხოს შენი ხელის ყოველი საქმე. შენ მრავალ ხალხებს მიასესხებ, შენ კი არ ისესხებ.

¹³უფალი გაქცევს თავად, და არა ბოლოდ, და სულ მაღლა იქნები და ძირს არასდროს იქნები — თუ შეისმენ უფლის, შენი ღმერთის, მცნებებს, რომელთაც გიცხადებ დღეს დასაცავად და შესასრულებლად.

¹⁴არ გადაუხვიო არცერთ სიტყვას, რომელთაც გიცხადებ დღეს, არც მარჯვნივ და არც მარცხნივ, არ იარო უცხო ღმერთების კვალზე და არ ემსახურო მათ.

¹⁵თუ არ გაიგონებ უფლის, შენი ღმერთის სიტყვას, არ დაიცავ და არ შეასრულებ ყველა მის მცნებას და წესებს, რომელთაც გიცხადებ დღეს, გადმოვა შენზე ყველა ეს წყევლა და გეწევა:

¹⁶წყეულიმც იყავ ქალაქად და წყეულიმც იყავ მინდვრად.

¹⁷წყეულიმც იყოს შენი ბეღლები და შენი მარნები.

¹⁸წყეულიმც იყოს ნაყოფი შენი მუცლისა და ნაყოფი შენი მიწისა, ნამატი შენი ცხვარ-ძროხისა.

¹⁹წყეულიმც იყავ შინ შესული და წყეულიმც იყავ გარეთ გამოსული.

²⁰მოგივლენს უფალი წყევლას, არეულობას და წარუმატებლობას შენი ხელის ყოველ საქმეში, რასაც კი გააკეთებ, ვიდრე არ მოისპობი და არ დაიღუპები ადრე და მალე შენი ბოროტი საქმეების გამო, რადგან მე მიმატოვე.

²¹მოგივლენს უფალი შავ ჭირს, ვიდრე არ ამოიძირკვები იმ მიწიდან, რომლის დასამკვიდრებლადაც მიდიხარ.

²²მოგსრავს უფალი ჭლექით და ციებ-ცხელებით, ანთებითა და ხურვებით, გვალვით, ხორშაკითა და სიყვითლით; და ეს უბედურებანი დევნას დაგიწყებენ, ვიდრე არ დაგღუპავენ.

²³ცა თავზე ბრინჯაოდ გექცევა, და მიწა, რომელიც შენს ფერხთ ქვეშაა — რკინად.

²⁴წვიმის წილ უფალი შენს მიწას მოსცემს ნაცარ-მტვერს ზეციდან და ზედ დაგივა, ვიდრე არ მოისპობი.

²⁵დაგამხობს უფალი შენი მტრების წინაშე. ერთი გზით გახვალ მათ წინააღმდეგ და შვიდი გზით გამოექცევი მათ; და გაიფანტები ქვეყნის ყველა სამეფოში.

²⁶და შენი გვამი ცის ფრინველთა და ტყის ნადირთა საჯიჯგნი გახდება, და არავინ გამოჩნდება მათი მომგერიებელი.

²⁷მოგსრავს უფალი ეგვიპტური წყლულით, ბუგრით, მუნით და ქეცით, რომელთაც ვერ გაექცევი.

²⁸მოგსრავს უფალი სიგიჟით და სიბრმავით, და შეშლილობით;

²⁹და ივლი ხელის ცეცებით შუადღის გულზე, როგორც ბრმა დადის წყვდიადში; ხელი მოგეცარება შენს გზებზე და იქნები დათრგუნული და გაძარცვული მთელი შენი დღე და მოსწრება, და არ გეყოლება შემწე;

³⁰ქალს დანიშნავ და სხვა კაცი დაწვება მასთან; სახლს აიშენებ და შიგ ვერ იცხოვრებ; ვაზს ჩაყრი და არ გეღირსება მისი მოსთვლა;

³¹შენს ხარს თვალწინ დაგიკლავენ და შენ ვერ შეჭამ მის ხორცს; სახედარს მოგტაცებენ და აღარ დაგიბრუნებენ; შენს ფარას შენი მტერი გაირეკავს და შემწე არ გეყოლება;

³²შენს ძეთ და შენს ასულთ სხვა ხალხები, დაიმონებენ, თვალები დაგაწყდება დღედაღამ მათ გზაზე ყურებით და მკლავში აღარ გექნება ძალა;

³³შენი მიწის ნაყოფს და მთელ შენს ნაოფლარს სხვა ხალხი შეჭამს, რომელსაც არ იცნობდი. და იქნები დღენიადაგ დათრგუნული და დამსხვრეული;

³⁴და შეიშლები სანახავით, რასაც იხილავენ შენი თვალები;

³⁵დაგიწყლულებს უფალი მუხლებსა და წვივებს, რომლისგანაც ვერ განიკურნები; ის წყლულები დაგფარავს თავით ფეხთამდე;

³⁶და წაგიყვანთ უფალი შენ და შენს მეფეს, რომელსაც დაიდგენ, ხალხთან, რომელსაც არ იცნობდით შენ და შენი მამები, და ემსახურები იქ სხვა ღმერთებს — ქვასა და ხეს;

³⁷საფრთხობელად, თითით საჩვენებლად და სამასხროდ შეიქნები ყველა ხალხებში, სადაც კი წაგიყვანს უფალი.

³⁸მრავალ თესლს გაიტან მინდორში და ცოტას მოიმკი, რადგან კალია გადაჭამს მას;

³⁹ვენახს გააშენებ და დაამუშავებ, მაგრამ ვერ მოისთვლი და ღვინოს ვერ შესვამ, რადგან ყურძენს ჭია შეჭამს;

⁴⁰ზეთისხილი გექნება მთელ მიწა-წყალზე და ზეთით ვერ გაიპოხები, რადგან უჟამოდ გასცვივა ნაყოფი;

⁴¹ძეებსა და ასულებს შობ და შენები არ იქნებიან, რადგან ტყვედ გაირეკავენ მათ;

⁴²ყოველ შენს ხეს და შენი მიწის ნაყოფს კალია გადაჭამს;

⁴³ხიზანი, რომელიც შენს წიაღშია, ამაღლდება, შენ კი დაბლა დაეშვები;

⁴⁴ის გასესხებს, შენ კი ვერ ასესხებ მას; ის თავი იქნება, შენ კი — ბოლო.

⁴⁵და მოგეწევა ყოველი ეს წყევლა, და დაგედევნება ვიდრე არ მოისპობი, რადგან არ ისმინე უფლის, შენი ღმერთის, ხმა და არ დაიცავი მისი მცნებები და მისი წესები, რომლებიც მან გამოგიცხადა.

⁴⁶ნიშნებად და სასწაულებად იქნება ეს უკუნისამდე შენთვის და შენი თესლისთვის.

⁴⁷და რაკი არ ემსახურებოდი უფალს, შენს ღმერთს, სიხარულითა და კეთილი გულით, როცა დოვლათით იყავი ჩაქცეული,

⁴⁸შენს მტრებს მოემსახურები, რომელთაც მოგისევს უფალი, შიმშილში, წყურვილში, სიშიშვლე-სიტიტვლესა და ყოველგვარ გასაჭირში მყოფს; და ქედზე დაგადგამს რკინის უღელს, რომ საბოლოოდ გაგანადგუროს.

⁴⁹უფალი მოგისევს ხალხს შორი ქვეყნის კიდეებიდან, რომლებიც ორბივით დაგაცხრებიან, და ეს იქნება ხალხი, რომლის ენასაც ვერ გაიგებ,

⁵⁰მოძალადე ხალხი იქნება, რომელიც მოხუცს პატივს არ სცემს და ჭაბუკები არ ებრალება.

⁵¹და შეჭამს იგი შენი საქონლის ნამატს და შენი მიწის ნაყოფს, სანამ არ მოისპობი ისე, რომ არ დაგიტოვებს არც პურს, არც ღვინოს, არც ზეთს, არც შენი ნახირისა და ფარების ნამატს, რომ საბოლოოდ გაგანადგუროს.

⁵²და შეგავიწროვებს ყველა შენს კარიბჭეში, სანამ არ დაამხობს შენს მაღალ და მტკიცე გალავნებს, რომელთა იმედიცა გაქვს. მთელს შენს ქვეყანას მოიქცევს ალყაში და ყველა შენს კარიბჭეს, მთელს შენს ქვეყანაში, რომელიც მოგცა უფალმა, შენმა ღმერთმა.

⁵³და შეჭამ შენი მუცლის ნაყოფს, შენი ვაჟებისა და ასულების ხორცს, რომელიც მოგცა უფალმა, შენმა ღმერთმა, ალყაში და გასაჭირში, რომლითაც შეგავიწროვებს შენი მტერი.

⁵⁴თქვენში ნაფოფინები და ნებივრად გაზრდილი კაცი უმოწყალო თვალით დაუწყებს ყურებას თავის ძმას, თავის უბეში მყოფ ცოლს და თავის შვილებს, რომლებიც მას კიდევ შერჩა.

⁵⁵არ მისცემს არც ერთ მათგანს თავისი შვილების ხორცს, რომელსაც თავად ჭამს, რადგან არ დარჩება მას არაფერი ალყასა და გასაჭირში, რომლითაც შეგავიწროვებს შენი მტერი ყველა შენს კარიბჭეში.

⁵⁶თქვენში ნაზად და ნანებივრები ქალი, რომელსაც ნებივრობისა და სინაზის გამო მიწაზე ფეხი არ დაუკარებია, უწყალო თვალით შეხედავს თავის თანამეცხედრეს, თავის ძეს და თავის ასულს,

⁵⁷და თავის მომყოლს, რომელიც გამოდის მისი წიაღიდან, და თავის შვილებს, რომელთაც გააჩენს, რადგან ფარულად შეჭამს ყველაფერს გაჭირვებისას, როცა შეგავიწროვებს მტერი შენს კარიბჭეებში.

⁵⁸თუ არ დაიცავ და არ შეასრულებ ამ რჯულის ყოველ სიტყვას, რომელიც ამ წიგნშია ჩაწერილი, რათა გაშინებდეს ეს დიდი და მრისხანე სახელი — უფალი, შენი ღმერთი,

⁵⁹უფალი შეგყრით შენ და შენს შთამომავლობას გაუგონარ სატკივრებს, დიდ და უკურნებელ წყლულებს, ბოროტ და უკურნებელ სნეულებებს.

⁶⁰და შემოგიქცევს ეგვიპტის ყველა სნეულებას, რომლისაც გეშინოდა, და შეგეყრება.

⁶¹აგრეთვე ყველა სნეულებასა და წყლულს, რომელიც არ სწერია ამ რჯულის წიგნში, მოგივლენს უფალი, სანამ არ მოისპობი.

⁶²და მცირედნი დარჩებით, ცის ვარსკვლავებივით მრავალრიცხოვანი რომ იყავით, რადგან არ გაიგონე უფლის, შენი ღმერთის, ხმა.

⁶³და როგორც ხარობდა უფალი თქვენს გამო, როცა სიკეთეს გიკეთებდათ და გამრავლებდათ, ასევე გაიხარებს უფალი, როცა დაგღუპავთ და მოგსრავთ და აღმოიფხვრებით იმ მიწიდან, რომლის დასამკვიდრებლადაც მიდიხართ.

⁶⁴და გაგფანტავთ უფალი ყველა ხალხებში ქვეყნის კიდიდან ქვეყნის კიდემდე, და დაუწყებთ მსახურებას იქ სხვა ღმერთებს, რომელთაც არ იცნობდით შენ და შენი მამები — ქვასა და ხეს.

⁶⁵და იმ ხალხშიც ვერ იგრძნობთ შვებას და ფეხს ვერ დაასვენებთ; და მოგცემს უფალი იქ მწუხარე გულს, თვალთა კლებას და სულის ჭმუნვას.

⁶⁶ბეწვზე ეკიდება შენს წინ შენი სიცოცხლე, შიშში იქნები დღისით და ღამით და დაგეკარგება სიცოცხლის სასო.

⁶⁷დილით იტყვი: ოჰ, ნეტავ საღამო იყოსო! და საღამოს იტყვი: ოჰ, ნეტავ დილა იყოსო! იმ შიშის გამო, რითაც სავსე გექნება გული და იმ სანახავის გამო, რასაც დაინახავ.

⁶⁸და დაგაბრუნებს უფალი ეგვიპტეში გემებით იმ გზაზე, რომელზეც გითხარი: აღარ იხილავ-მეთქი მას! და იქ თავს შეაძლევთ თქვენს მტრებს მსახურებად და მხევლებად, მაგრამ მყიდველი არავინ იქნება.“