Read ქართული ბიბლია, სრული ვერსია Deuteronomy 29 Bible Online

Deuteronomy 29 - ქართული ბიბლია, სრული ვერსია bible

Deuteronomy 29

¹აჰა, სიტყვები აღთქმისა, რომელიც გამოუცხადა უფალმა მოსეს მოაბის ქვეყანაში, გარდა იმ აღთქმისა, რომელიც დაუდო მათ ხორებში.

²და მოუხმო მოსემ მთელს ისრაელს და უთხრა: „ყველაფერი იხილეთ, რაც დამართა უფალმა ეგვიპტის ქვეყანაში ფარაონს და ყველა მის მსახურსა და მთელ მის ქვეყანას თქვენს თვალწინ!

³ის დიდი განსაცდელები, რომლებიც იხილეს შენმა თვალებმა, ის დიდი ნიშნები და სასწაულები.

⁴მაგრამ დღემდე არ მოუცია უფალს შენთვის გული მისახვედრად, თვალნი სახილველად და ყურნი მოსასმენად.

⁵და გატარებდი ორმოც წელიწადს უდაბნოში. არ გაგცვეთია ტანზე სამოსელი და ფეხზე — ხამლი.

⁶პური არ გიჭამიათ და ღვინო და თაფლუჭი არ გისვამთ, რათა გცოდნოდათ, რომ მე ვარ უფალი, თქვენი ღმერთი.

⁷და აჰა, როცა თქვენ მოხვედით ამ ადგილას, ჩვენს წინააღმდეგ საომრად გამოვიდნენ: სიხონი — ხეშბონის მეფე და ყოგი — ბაშანის მეფე, და ჩვენ დავამარცხეთ ისინი.

⁸და ავიღეთ მათი ქვეყანა, და მივეცით ის სამკვიდროდ რეუბენის ტომს, გადის ტომსა და მანაშეს ნახევარტომს.

⁹დაიცავით ამ აღთქმის სიტყვები და შეასრულეთ, რათა ხელი მოგემართოთ ყველა საქმეში, რასაც დაიწყებთ.

¹⁰ყველანი დგახართ დღეს უფლის, თქვენი ღმერთის, წინაშე: თქვენი ტომების თავკაცნი, თქვენი უხუცესები, თქვენი განმკარგულებლები, მთელი ისრაელიანობა,

¹¹თქვენი პატარები, თქვენი ცოლები, შენი ხიზანი, რომელიც შენი ბანაკის წიაღშია — შეშის მჩეხავიდან წყლის მზიდავამდე,

¹²რათა შემოხვიდე უფლის, შენი ღმერთის აღთქმაში და მის ფიცში, რომელსაც უფალი, შენი ღმერთი გიდებს დღეს,

¹³რათა დაგაყენოს დღეს თავის ერად. და თვითონ შენი ღმერთი გახდეს, როგორც გითხრა და როგორც შეჰფიცა შენს მამებს: აბრაამს, ისააკსა და იაკობს.

¹⁴და მხოლოდ თქვენთან როდი ვდებ მე ამ აღთქმას და ამ ფიცს,

¹⁵არამედ მათთანაც, ვინც ჩვენთან ერთად დგას დღეს აქ უფლის, ჩვენი ღმერთის, წინაშე და მათთანაც, ვინც ჩვენთან ერთად არ არიან აქ დღეს.

¹⁶რადგან თქვენ იცით, როგორ ვცხოვრობდით ჩვენ ეგვიპტის ქვეყანაში და როგორ გამოვაღწიეთ იმ ხალხებში, რომელთა შორისაც თქვენ გამოიარეთ.

¹⁷და თქვენ იხილეთ მათი სისაძაგლეები და მათი კერპები, რაც ჰქონდათ, ქვისა და ხისა, ვერცხლისა და ოქროსი.

¹⁸ნუ იქნება თქვენში კაცი ან ქალი, ან საგვარეულო, ან ტომი, რომლის გულიც მიიქცევა დღეს უფლისაგან, ჩვენი ღმერთისაგან, რათა წავიდეს და ემსახუროს იმ ხალხების ღმერთებს! ნუ იქნება თქვენში ფესვი შხამისა და ძიმწარის აღმომაცენებელი!

¹⁹ამ საწყევარი სიტყვების მომსმენი კაცი, თავს ნუ ინუგეშებს თავის გულში და ნუ იტყვის: მშვიდობა არ მომაკლდება, თუმცა კი ჩემი გულის ნებაზე დავდივარო. და ამგვარად ცოდვილი უცოდველს გადაიყოლებს.

²⁰არ ისურვებს უფალი მის პატიებას, რადგან აღეგზნება მაშინ უფლის რისხვა და მისი შური იმ კაცზე, და ეწევა მას ყოველი წყევლა, რაც ამ გრაგნილზეა დაწერილი, და წაშლის უფალი მის სახელს ცისქვეშეთიდან.

²¹და გამოაცალკევებს მას უფალი დასაღუპად ისრაელის ყველა ტომიდან, ამ რჯულის გრაგნილზე დაწერილი აღთქმის ყოველი წყევლის თანახმად.

²²და იტყვის მომავალი თაობა, თქვენი ძენი, რომელნიც თქვენს შემდეგ გაჩნდებიან, და უცხოელი, რომელიც მოვა შორეული ქვეყნიდან და იხილავს ამ ქვეყნის წყლულებს და მის სნეულებებს, რითაც დაასნეულა იგი უფალმა,

²³ნახავენ გოგირდსა და მარილს, ნახანძრალ მიწას, სადაც უკვე აღარაფერი დაითესება და არ აღმოცენდება არც ერთი ღერი ბალახი, როგორც დაიქცა სოდომი და გომორა, ადმა და ცებოიმი, ქალაქები, რომლებიც დააქცია უფალმა რისხვითა და წყრომით.

²⁴და იტყვის ყველა ხალხი: ‘რისთვის მოექცა უფალი ასე ამ ქვეყანას? რის გამო მოხდა ეს დიდი რისხვა?’

²⁵და მიუგებენ: ‘იმიტომ, რომ მიატოვეს უფლის, თავიანთი მამების ღმერთის, აღთქმა, რომელიც მან დაუდო მათ, როცა ეგვიპტის ქვეყნიდან გამოჰყავდა.’

²⁶და წავიდნენ და ემსახურნენო სხვა ღმერთებს, და თაყვანი სცეს მათ, — ღმერთებს, რომელთაც არ იცნობდნენ და რომლებიც უფალს არ უწილხვედრებია მათთვის.

²⁷და აღიგზნო რისხვა უფლისა იმ ქვეყანაზე, რათა მოევლინა მასზე მთელი წყევლა, რომელიც ამ გრაგნილზეა დაწერილი.

²⁸და განდევნა ისინი უფალმა მათი მიწიდან რისხვით, მძვინვარებითა და დიდი წყრომით. და გადაყარა სხვა ქვეყანაში, როგორც დღეს არიანო.

²⁹დაფარული უფალს, ჩვენს ღმერთს, ეკუთვნის, გაცხადებული კი — ჩვენ და ჩვენს შვილებს უკუნისამდე, რათა შევასრულოთ ამ რჯულის ყველა სიტყვა.