Read ქართული ბიბლია, სრული ვერსია Deuteronomy 4 Bible Online

Deuteronomy 4 - ქართული ბიბლია, სრული ვერსია bible

Deuteronomy 4

¹და ახლა ისმინე, ისრაელ, წესები და კანონები, რომელთაც მე დღეს გასწავლით თქვენ შესასრულებლად, რათა იცოცხლოთ და მიხვიდეთ და დაიმკვიდროთ ის ქვეყანა, რომელსაც უფალი, თქვენი მამების ღმერთი, გაძლევთ თქვენ.

²ნურაფერს დაამატებთ იმას, რასაც მე გამცნებთ თქვენ, და ნურც მოაკლებთ, რათა დაიცვათ მცნებანი უფლისა, თქვენი ღმერთისა, რომელთაც მე გაუწყებთ.

³თქვენმა თვალებმა იხილეს, რაც უყო უფალმა ბაყალ-ფეღორს, რადგან ყოველი კაცი, რომელიც მიჰყვა ბაყალ-ფეღორს, მოსრა უფალმა, შენმა ღმერთმა, თქვენში.

⁴ხოლო თქვენ, ვინც მიელტვით უფალს, თქვენს ღმერთს, ყველანი ცოცხლობთ დღემდე.

⁵აჰა, მე გასწავლით თქვენ წესებსა და კანონებს, როგორც მიბრძანა უფალმა, ჩემმა ღმერთმა, აღსასრულებლად იმ ქვეყანაში, სადაც თქვენ მიდიხართ, რომ დაიმკვიდროთ;

⁶დაიცავით და შეასრულეთ, რადგან ესაა თქვენი სიბრძნე და თქვენი გონიერება იმ ხალხების თვალწინ, რომელნიც მოისმენენ ამ წესებს და იტყვიან: „მხოლოდ ეს ხალხია დიდი, ბრძენი და გონიერი.“

⁷რადგან რომელი დიდი ერია, რომელთანაც ისე ახლოს იდგნენ მისი ღმერთები, როგორც ახლოსაა ჩვენთან უფალი, ჩვენი ღმერთი, როცა კი მოვუხმობთ მას?

⁸და განა არის სხვა დიდი ერი, რომელსაც ჰქონდეს ისეთი მართალი წესები და კანონები, როგორც მთელი ეს რჯულია, რომელსაც მე გაძლევთ თქვენ დღეს?

⁹მხოლოდ გაფრთხილდი და გულისყურით დაიცავი შენი სული, ნუ დაივიწყებ იმ საქმეებს, რაც შენმა თვალებმა იხილეს, და გულიდან ნუ ამოგივარდება შენი სიცოცხლის მანძილზე. და აცოდინე იგი შენს ძეთ და შენს ძეთა ძეთ,

¹⁰ის დღე, როდესაც უფლის, შენი ღმერთის, წინაშე იდექი ხორებთან, და მითხრა მე უფალმა: „შეკრიბე ხალხი ჩემს წინაშე, და გავაგონებ მათ ჩემს სიტყვებს, რათა ისწავლონ ჩემდამი შიში მთელი მათი სიცოცხლის მანძილზე, და ასწავლონ თავიანთ ძეებსაც.“

¹¹აჰა, თქვენ მიხვედით და დადექით მთის ძირას, მთა კი გიზგიზებდა ცეცხლის ალით, რომელიც ზეცამდე აღწევდა, და იყო წყვდიადი — ღრუბელი და კუნაპატი სიბნელე.

¹²და გელაპარაკებოდათ უფალი შუაგული ცეცხლიდან. სიტყვები გესმოდათ, მაგრამ ვერავითარ სახეს ვერ ხედავდით — მხოლოდ ხმა ისმოდა.

¹³და გამოგიცხადათ მან თავისი აღთქმა, ათი მცნება, რაც გიბრძანათ შესასრულებლად, და დაწერა ქვის ორ დაფაზე.

¹⁴მე მიბრძანა უფალმა იმ დროს მესწავლებინა თქვენთვის წესები და კანონები, რათა დაიცვათ ისინი იმ ქვეყანაში, რომლის დასაუფლებლადაც მიდიხართ.

¹⁵ფრთხილად იყავით, რაკი არ გინახავთ არავითარი სახე, როცა უფალი გელაპარაკებოდათ ხორებში ცეცხლის შუაგულიდან,

¹⁶რათა არ წახდეთ და არ გაიკეთოთ ქანდაკება, მსგავსება რაიმე კერპისა, კაცს ან ქალს სახით,

¹⁷მსგავსება რაიმე ცხოველისა, რაც მიწაზეა, რაიმე ფრინველის გამოსახულება, რაც ცაში დაფრინავს,

¹⁸მსგავსება მიწაზე მხოხავი ყოველგვარი ქვეწარმავლისა, სახე ყოველგვარი თევზისა, რაც წყალში ცურავს, მიწის სიღრმეში;

¹⁹რათა, როცა თვალს აღაპყრობთ ზეცისკენ და იხილავთ მზეს, მთვარესა და ვარსკვლავებს — მთელ ციურ ლაშქარს — არ შეცდეთ, თაყვანი არ სცეთ და არ ემსახუროთ მათ, რადგან ისინი უფალმა, თქვენმა ღმერთმა, შეუქმნა ყველა ხალხებს მთელს ცისქვეშეთში.

²⁰ხოლო თქვენ აგიყვანათ უფალმა და გამოგიყვანათ რკინის ბრძმედიდან — ეგვიპტიდან — რათა ყოფილიყავით მისი წილხვედრი ხალხი, როგორც აღსრულდა კიდეც.

²¹და უფალი მე გამირისხდა თქვენს გამო, და დაიფიცა, რომ მე ვერ გადავლახავ იორდანეს და ვერ შევალ იმ მშვენიერ ქვეყანაში, რომელსაც თქვენი ღმერთი გაძლევთ სამკვიდროდ.

²²მე მოვკვდები ამ ქვეყანაში. მე ვერ გადავალ მდინარე იორდანეს გაღმა. ხოლო თქვენ გადახვალთ და დაიმკვიდრებთ იმ მშვენიერ ქვეყანას.

²³გაფრთხილდით, რომ არ დაივიწყოთ უფლის, თქვენი ღმერთის, აღთქმა, რომელიც დაგიდოთ თქვენ, და არ გაიკეთოთ კერპები, რაიმე გამოსახულებანი, როგორც გიბრძანათ თქვენ უფალმა, თქვენმა ღმერთმა.

²⁴რადგან უფალი, თქვენი ღმერთი, მშთანთქმელი ცეცხლია, შურისმგებელი ღმერთია იგი.

²⁵თუ გეყოლებათ შვილები და შვილიშვილები, და დაბერდებით ქვეყანაზე, და გაირყვნებით და გაიკეთებთ კერპს, რომელიც რაიმეს მიმსგავსება იქნება, და ჩაიდენთ ბოროტებას უფლის, თქვენი ღმერთის, თვალწინ მის გასარისხებლად,

²⁶თქვენს წინაშე ვიმოწმებ ცასა და მიწას, რომ ამის გამო მალე გადაშენდებით, იმ ქვეყნიდან, რომლის დასამკვიდრებლადაც გადადიხართ იორდანეზე; ვერ გაიხანგრძლივებთ დღეებს იმ მიწაზე, არამედ გადაშენდებით.

²⁷და გაგფანტავთ უფალი ხალხებში, და დარჩებით მცირერიცხოვან ხალხად იმ ხალხებში, ვისთანაც მიგიყვანთ უფალი.

²⁸და მოემსახურებით იქ კაცის ხელით ხისგან და ქვისგან გაკეთებულ ღმერთებს, რომლებიც ვერც ხედავენ, ვერც ესმით, ვერც ჭამენ და ვრც იყნოსენ.

²⁹და როცა იქ დაუწყებ ძებნას უფალს, შენს ღმერთს, იპოვი მას, თუ მოძებნი მას მთელი შენი გულით და მთელი შენი სულით.

³⁰როცა გაგიჭირდება, როცა შორეულ მომავალ დღეებში, ყოველივე ეს გეწევა — მაშინ დაბრუნდები უფალთან, შენს ღმერთთან, და გაიგონებ მის ხმას.

³¹რადგან მოწყალეა უფალი, შენი ღმერთი; არ მიგატოვებს და არ დაგღუპავს, და არ დაივიწყებს შენს მამებთან დადებულ აღთქმას, რომელიც ფიცით აღუთქვა მათ.

³²აბა ჰკითხე გარდასულ დღეებს, შენამდე რომ იყო, იმ დღიდან, რაც ღმერთმა შექმნა ადამიანი მიწაზე, თუ მომხდარა ცის კიდით კიდემდე, რაიმე მსგავსი ამ დიდი საქმისა, ან თუ გაგონილა მისი სადარი?

³³თუ სმენია რომელიმე ხალხს ცეცხლის შუაგულიდან მოლაპარაკე ღმერთის ხმა, როგორც შენ გაიგონე, და ცოცხალი გადარჩი?

³⁴თუ უცდია რომელიმე ღმერთს, მისულიყო და გამოეყვანა თავისთვის ხალხი სხვა ხალხის წიაღიდან განსაცდელებით, ნიშნებითა და სასწაულებით, ბრძოლით, და ძლიერი ხელით, და აღმართული მკლავით, და დიდი საშინელებებით, როგორც მოიმოქმედა ყოველივე თქვენთვის უფალმა, თქვენმა ღმერთმა ეგვიპტეში თქვენს თვალწინ?

³⁵შენ გახილვინა, რათა გცოდნოდა, რომ მხოლოდ უფალია ღმერთი, და სხვა არავინ არის მის გარდა.

³⁶ზეციდან მოგასმენინა თავისი ხმა, რათა განესწავლე, და მიწაზე გიჩვენა თავისი დიდი ცეცხლი, და მისი სიტყვები ისმინე ცეცხლის შუაგულიდან;

³⁷და რაკი შეიყვარა მან შენი მამები და გამოირჩია მათი შთამომავალი მათ შემდეგ, და გამოგიყვანა თავისი დიადი ძალით ეგვიპტიდან,

³⁸რათა განედევნა შენზე უფრო მრავალრიცხოვანი და ძლიერი ხალხები შენი პირისაგან, რათა მიეყვანე და მოეცა შენთვის მათი ქვეყანა სამკვიდროდ.

³⁹დღეს შეიცანი და გულში ჩაიბეჭდე, რომ უფალი ღმერთია მაღლა ზეცაში და დაბლა მიწაზე, და სხვა არავინაა მის გარდა.

⁴⁰დაიცავი მისი კანონები და მისი მცნებები, რომელთაც მე გიცხადებ დღეს, რათა კარგად იყოთ შენ და შენი ძენი შენს შემდგომ, და რათა გაიხანგრძლივო დღენი იმ მიწაზე, რომელსაც უფალი, შენი ღმერთი, გაძლევს სამარადისოდ.

⁴¹მაშინ გამოყო მოსემ სამი ქალაქი იორდანეს გამოღმა, მზის აღმოსავლეთით,

⁴²რათა იქ გაიქცეს მკვლელი, რომელსაც უნებლიეთ შემოაკვდა თავისი მოყვასი, ვისი სიძულვილიც არ ჰქონია არც გუშინ და არც გუშინწინ; გაიქცეს ერთ-ერთ მათგანში იმ ქალაქთაგან, და იქ გადარჩეს:

⁴³ბეცერი უდაბნოში, ვაკეზე — რეუბენისა იყო, რამოთი გალაადში — გადისა, ხოლო გოლანი ბაშანში — მანაშესი.

⁴⁴ეს არის რჯული, რომელიც დაუდგინა მოსემ ისრაელიანთ.

⁴⁵ესენია მოწმობანი, წესები და სამართალი, რომელნიც გამოუცხადა მოსემ ისრაელის ძეთ ეგვიპტიდან გამოსვლისას,

⁴⁶იორდანეს გაღმა, ველზე, ბეთ-ფეღორის ახლოს, ამორეველთა მეფის, სიხონის, ქვეყანაში, რომელიც ცხოვრობდა ხეშბონში, და რომელიც შემუსრეს მოსემ და ისრაელიანებმა ეგვიპტიდან გამოსვლისას.

⁴⁷და დაიმკვიდრეს მისი ქვეყანა და ქვეყანა ყოგისა, ბაშანის მეფისა, ამორეველთა ორი მეფისა, რომელნიც იყვნენ იორდანეს გაღმა მხარეს, მზის აღმოსავლეთით,

⁴⁸ყაროყერიდან, რომელიც არნონის სანაპიროზე მდებარეობს, და მიდის სირიონის მთამდე (ეს არის ხერმონი).

⁴⁹და ასევე მთელ იორდანეს გაღმა, აღმოსავლეთით, და ყარაბას ზღვამდე, ფისგას მთის ძირას.