Read ქართული ბიბლია, სრული ვერსია Deuteronomy 8 Bible Online

Deuteronomy 8 - ქართული ბიბლია, სრული ვერსია bible

Deuteronomy 8

¹ყოველი მცნება, რომელსაც მე დღეს შენ გამცნებ, ეცადე, შეასრულო, რათა იცოცხლო და გამრავლდე, და მიხვიდე და დაიმკვიდრო ის ქვეყანა, რომელიც შეჰფიცა უფალმა შენს მამებს.

²გახსოვდეს მთელი გზა, რომლითაც გატარა უფალმა, შენმა ღმერთმა, ეს 40 წელიწადი უდაბნოში, რათა მოეთვინიერებინე და გამოეცადე, რათა შეეტყო, თუ რა გიდევს გულში, დაიცავდი მის მცნებებს თუ არა.

³და გათვინიერებდა, გაშიმშილებდა, გაჭმევდა მანანას, რაც არ იცოდით, რა იყო ის, არც შენ და არც შენმა მამებმა, რათა შეგეცნო, რომ არა მხოლოდ პურით ცოცხლობს კაცი, არამედ უფლის პირიდან გამომავალი ყოველი სიტყვით.

⁴ტანზე სამოსელი არ გაგცვეთია და ფეხი არ გაგსივებია მთელი ამ 40 წლის მანძილზე.

⁵გახსოვდეს, რომ როგორც მამა წვრთნის თავის ძეს, ისე გწვრთნის შენ უფალი, შენი ღმერთი.

⁶და დაიცავი მცნებანი უფლისა, შენი ღმერთისა, რათა მისი გზებით იარო და გეშინოდეს მისი.

⁷რადგან უფალს, შენს ღმერთს, კარგ ქვეყანაში მიჰყავხარ, ქვეყანაში, სადაც წყლის ნაკადულები, წყაროები და მიწისქვეშა წყლები მოედინება მთასა და ბარში.

⁸ხორბლისა და ქერის, ვაზის, ლეღვისა და ბროწეულის ქვეყანაში; ზეთისხილისა და თაფლის ქვეყანაში,

⁹ქვეყანაში, სადაც მაძღრად გექნება პური, და არაფერი დაგაკლდება; ქვეყანაში, რომლის ქვები რკინაა და მისი მთებიდან მოიპოვებ სპილენძს.

¹⁰და როცა შეჭამ და გაძღები, აკურთხე უფალი, შენი ღმერთი, იმ მადლიანი მიწისათვის, რომელიც მოგცა.

¹¹და გაფრთხილდი, რათა არ დაივიწყო უფალი, ღმერთი შენი, დაიცავი მისი მცნებები, მისი წესები და კანონები, რომელთაც მე დღეს გაუწყებ.

¹²და, როცა მაძღრისად შეჭამთ და აიშენებთ მშვენიერ სახლებს და შესახლდებით,

¹³და როცა გაიმრავლებ ცხვარსა და ძროხას, ბევრი გექნება ვერცხლი და ოქრო, და ყოველივე უხვად გექნება,

¹⁴არ გაამაყდე და არ დაივიწყო უფალი, შენი ღმერთი, რომელმაც გამოგიყვანა ეგვიპტიდან, მონობის სახლიდან;

¹⁵რომელმაც გატარა დიდსა და საშინელ უდაბნოში, სადაც გესლიანი გველები, მორიელები და ხრიოკებია; სადაც არ იყო წყალი, მან კი სალი კლდიდან გამოადინა შენთვის წყალი;

¹⁶ის უდაბნოში გკვებავდა მანანით, რასაც არ იცნობდნენ შენი მამები, რათა მოეთვინიერებინე და გამოეცადე, რათა სიკეთე ექნა ბოლოს შენთვის;

¹⁷და რომ არ თქვა გულში: ჩემმა ძალამ და ჩემმა მტკიცე მკლავმა შემძინაო მე ეს ქონება!

¹⁸უნდა გახსოვდეს უფალი, შენი ღმერთი, რადგან იგი გაძლევს ძალას ქონების შესაძენად, რათა შეასრულოს თავისი აღთქმა, რომელიც შეჰფიცა შენს მამებს, როგორც დღემდე ასრულებს.

¹⁹და თუ დაივიწყებ უფალს, შენს ღმერთს, და გაჰყვები უცხო ღმერთების კვალს და მოემსახურები, და თაყვანს სცემ მათ, დღეს ვფიცავ ცასა და მიწას, რომ უსათუოდ დაიღუპებით;

²⁰იმ ხალხებივით, რომელთაც უფალი ღუპავს თქვენს წინაშე, თქვენც დაიღუპებით, თუ არ შეისმენთ უფლის, თქვენი ღმერთის, ხმას.