Read ქართული ბიბლია, სრული ვერსია John 21 Bible Online

John 21 - ქართული ბიბლია, სრული ვერსია bible

John 21

¹ამის შემდეგ კვლავ გამოეცხადა იესო მოწაფეებს ტიბერიის ზღვაზე. და გამოეცხადა ასე:

²იყვნენ ერთად სიმონ-პეტრე და თომა (რომელსაც ტყუპი ერქვა), ნათანაელი გალილეის კანადან, ზებედეს ძენი და ორი სხვა მისი მოწაფეთაგანი.

³ეუბნება მათ სიმონ-პეტრე: „სათევზაოდ მივდივარ.“ უთხრეს მას: „ჩვენც წამოვალთ შენთან ერთად.“ გავიდნენ და ჩასხდნენ ნავში. და ვერაფერი დაიჭირეს იმ ღამეს.

⁴როდესაც თენდებოდა, იესო იდგა ნაპირზე, მოწაფეებმა კი არ იცოდნენ, რომ ეს იესო იყო.

⁵ეუბნება მათ იესო: „შვილებო, არა გაქვთ საჭმელი?“ მიუგეს მას: „არა.“

⁶უთხრა მათ: „ისროლეთ ბადე ნავის მარჯვენა მხარეს და იპოვით.“ ისროლეს და ვეღარ შეძლეს ამოზიდვა თევზის სიმრავლის გამო.

⁷ეუბნება პეტრეს მოწაფე, რომელიც უყვარდა იესოს: „ეს უფალია.“ სიმონ-პეტრემ რომ გაიგონა, უფალიაო, მოსასხამი მოიხვია, რადგან შიშველი იყო, და ზღვაში გადაეშვა.

⁸ხოლო სხვა მოწაფეებიც გამოვიდნენ ნავით, რადგან შორს არ იყვნენ ხმელეთიდან, ასე ორას წყრთაზე, და გამოათრიეს თევზით სავსე ბადე.

⁹ხმელეთზე რომ გადმოვიდნენ, დაინახეს დაწყობილი ნაკვერცხლები და ზედ დადებული თევზი და პური.

¹⁰ეუბნება მათ იესო: „იმ თევზისა მოიტანეთ, ახლა რომ დაიჭირეთ.“

¹¹ავიდა ნავზე სიმონ-პეტრე და ხმელეთზე გადმოათრია ბადე, 153 დიდი თევზით სავსე; და, მიუხედავად იმისა, რომ ამდენი იყო, ბადე არ გაიხა.

¹²ეუბნება მათ იესო: „მოდით, ისაუზმეთ.“ მოწაფეთაგან ვერც ერთმა ვერ გაბედა, ეკითხა, ვინ ხარ, რადგან იცოდნენ, რომ უფალი იყო.

¹³მივიდა იესო, აიღო პური და მისცა მათ, ასევე თევზიც.

¹⁴ეს უკვე მესამედ გამოეცხადა იესო მოწაფეებს, მკვდრეთით აღმდგარი.

¹⁵რომ ისაუზმეს, იესო ეუბნება სიმონ-პეტრეს: „სიმონ იოანეს ძეო, გიყვარვარ ამათზე მეტად?“ ეუბნება მას: „დიახ, უფალო, შენ იცი, რომ მიყვარხარ.“ ეუბნება მას: „აძოვე ჩემი კრავები.“

¹⁶ეუბნება მას კვლავ მეორედ: „სიმონ იოანესო, გიყვარვარ?“ ეუბნება მას: „დიახ, უფალო, შენ იცი, რომ მიყვარხარ.“ ეუბნება მას: „დამწყსე ჩემი ცხვრები.“

¹⁷ეუბნება მას მესამედ: „სიმონ იოანესო, გიყვარვარ?“ დაღონდა პეტრე, მესამედ რომ უთხრა: „გიყვარვარ?“ და ეუბნება მას: „უფალო, შენ ყველაფერი იცი. იცი, რომ მიყვარხარ!“ ეუბნება მას იესო: „აძოვე ჩემი ცხვრები.

¹⁸ჭეშმარიტად, ჭეშმარიტად გეუბნები შენ: სანამ ახალგაზრდა იყავი, შენ თვითონ შემოირტყამდი სარტყელს და მიდიოდი, სადაც გსურდა. ხოლო როდესაც დაბერდები, გაშლი ხელს და სხვა შემოგარტყამს სარტყელს და წაგიყვანს იქ, სადაც არ გსურს.“

¹⁹ეს თქვა იმის მისანიშნებლად, თუ როგორი სიკვდილით განადიდებდა იგი ღმერთს. ეს რომ თქვა, უთხრა: „მომყევი მე!“

²⁰მოტრიალდა პეტრე და დაინახა, რომ მოწაფე, რომელიც უყვარდა იესოს, მოსდევდა მათ. რომელიც მკერდზე მიეყრდნო მას სერობისას და უთხრა: „უფალო, ვინ არის, რომელიც შენ გაგცემს?“

²¹ის რომ დაინახა პეტრემ, ეუბნება იესოს: „უფალო, ამას რა?“

²²ეუბნება მას იესო: „მე თუ მსურს, რომ დარჩეს ჩემს მოსვლამდე, შენ რა? შენ მე გამომყევი.“

²³და გავრცელდა ეს სიტყვა ძმებს შორის, რომ ის მოწაფე არ მოკვდებოდა. მაგრამ იესოს არ უთქვამს მასზე, არ მოკვდებაო, არამედ, „თუ მე მსურს, რომ დარჩეს ჩემს მოსვლამდე, შენ რა?“

²⁴ეს არის ის მოწაფე, რომელიც მოწმობს ამას და რომელმაც დაწერა ეს. და ვიცით, რომ მისი მოწმობა ჭეშმარიტია.

²⁵კიდევ ბევრი სხვაც არის, რაც იესომ მოიმოქმედა, რომელიც, დაწვრილებით რომ დაწერილიყო, ვფიქრობ, მთელი ქვეყნიერებაც კი ვერ დაიტევდა დაწერილ წიგნებს. ამინ.