Read ქართული ბიბლია, სრული ვერსია Romans 12 Bible Online

Romans 12 - ქართული ბიბლია, სრული ვერსია bible

Romans 12

¹ამრიგად, შეგაგონებთ, ძმებო, ღმერთის წყალობით, რომ შესწიროთ თქვენი სხეული ცოცხალ, წმიდა, ღმერთის სასურველ მსხვერპლად! ეს იქნება თქვენი სულიერი მსახურება.

²და ნუ მიესადაგებით ამ საუკუნეს, არამედ შეიცვალენით თქვენი გონების განახლებით, რათა შეიცნოთ, რა არის ღმერთის ნება — კეთილი, სასურველი და სრულყოფილი.

³ჩემთვის მოცემული მადლით ვეუბნები ყოველ თქვენგანს: თქვენს თავზე იმაზე მეტად ნუ იფიქრებთ, ვიდრე უნდა ფიქრობდეთ, არამედ იფიქრეთ საღად იმ რწმენის კვალობაზე, რაც ღმერთმა გიწილადათ თითოეულს.

⁴რადგან ჩვენ ერთ სხეულში მრავალი ასო გვაქვს, მაგრამ ყველა ასოს როდი აქვს ერთი და იგივე საქმე.

⁵ასევე ჩვენ, მრავალნი ერთი სხეული ვართ ქრისტეში, ხოლო ერთიმეორისათვის — ასონი.

⁶და გვაქვს მადლით სხვადასხვა ნიჭი, ჩვენთვის მოცემული. თუ ეს წინასწარმეტყველებაა — იყოს რწმენის მიხედვით,

⁷თუ მსახურებაა — ემსახურე, თუ ეს მოძღვრობის ნიჭია — დამოძღვრე,

⁸თუ გამხნევის ნიჭია — გაამხნევე, თუ გამნაწილებელის — გაანაწილე უბრალოებით, თუ წინამძღოლის — უწინამძღვრე ბეჯითად და თუ მწყალობელის — ხალისით გაეცი წყალობა.

⁹იყოს თქვენი სიყვარული წრფელი. გძაგდეთ ბოროტი და შეუერთდით კეთილს.

¹⁰ძმათმოყვარეობაში იყავით ერთმანეთისადმი გულთბილნი და მოყვარულნი, ურთიერთპატივისცემაში ერთმანეთს დაასწარით.

¹¹იბეჯითეთ და ნუ დაიღლებით, სულით აღეგზნეთ, ემსახურეთ უფალს.

¹²იხარეთ იმედით, მომთმენნი იყავით გასაჭირში, ლოცვაში — ურყევნი.

¹³მონაწილეობა მიიღეთ წმიდათა საჭიროებებში, ესწრაფეთ სტუმართმოყვარეობას.

¹⁴დალოცეთ თქვენი მდევნელები, დალოცეთ და ნუ დაწყევლით.

¹⁵გახარულებთან იხარეთ და მტირალებთან იტირეთ.

¹⁶ერთსულოვანნი იყავით ერთმანეთს შორის. ქედმაღლური ფიქრები ნუ გექნებათ, არამედ მორჩილებს მიხედეთ, ბრძენი ნუ გეგონებათ საკუთარი თავი.

¹⁷ნურავის მიაგებთ ბოროტის წილ ბოროტს. ეცადეთ კეთილს ყველა ადამიანის წინაშე.

¹⁸თუ თქვენის მხრივ შესაძლებელია, იყავით ყველა ადამიანთან მშვიდობიანად.

¹⁹შურს ნუ იძიებთ თქვენთვის, საყვარელნო, არამედ ადგილი მიეცით უფლის რისხვას, რადგან წერია: „ჩემია შურისგება და მე მივაგებ“ — ამბობს უფალი.

²⁰ამიტომ, თუ შენი მტერი მშიერია, დააპურე იგი; თუ სწყურია, დაალევინე. რადგან ამის გაკეთებით ნაკვერცხლებს აგროვებ მის თავზე.

²¹არ დაგძლიოს ბოროტმა, არამედ კეთილით სძლიე ბოროტს.