Read ქართული ბიბლია, სრული ვერსია Romans 3 Bible Online

Romans 3 - ქართული ბიბლია, სრული ვერსია bible

Romans 3

¹მაშინ რა არის იუდეველის უპირატესობა ან წინადაცვეთილობის სარგებლობა?

²დიდია უპირატესობა ყოველნაირად, რადგან პირველ ყოვლისა მათ აქვთ მინდობილი ღმერთის სიტყვები,

³და თუ ზოგიერთმა არ იწამა, განა მათი ურწმუნოება გააბათილებს ღმერთის სარწმუნოობას?

⁴არამც და არამც! ღმერთი ჭეშმარიტია და ყოველი ადამიანი კი — მტყუანი, როგორც წერია: „ამიტომ მართალი ხარ შენს სიტყვებში და სწორი შენს სამართალში.“

⁵ხოლო თუ ჩვენი უსამართლობა გამოაჩენს ღმერთის სიმართლეს, რაღა გვეთქმის? უსამართლოა ღმერთი, რისხვას რომ მოავლენს? — ვლაპარაკობ როგორც ადამიანი.

⁶არამც და არამც! სხვაგვარად როგორ განიკითხოს ღმერთმა ქვეყნიერება?

⁷თუ ჩემი სიცრუით ღმერთის ჭეშმარიტება გაცხადდა თავისი დიდებით, რაღად უნდა ვიქნე განკითხული როგორც ცოდვილი?

⁸მაშ, ხომ არ ვაკეთოთ ბოროტი, რათა კეთილი გამოვიდეს? როგორც ზოგიერთები ავსიტყვაობენ ჩვენზე და ამბობენ, თითქოს ასე ვასწავლიდეთ? ასეთები განსჯას იმსახურებენ.

⁹მაშ, როგორ? გვაქვს უპირატესობა? არავითარი! რადგან ხომ განვსაჯეთ, რომ იუდეველებიც და ბერძნებიც ცოდვის ქვეშ არიან.

¹⁰როგორც წერია: „არავინ არის მართალი,

¹¹არავინ არის გონიერი; არავინ ეძებს ღმერთს.

¹²ყველანი გზას ასცდნენ, აღარავინ ვარგა. არ არის სიკეთის მქმნელი, არ არის არავინ.

¹³მათი ხორხი ღია სამარეა. ენებით ცრუობენ. მათ ბაგეებზე ასპიტის გესლია.

¹⁴მათი პირი წყევლით და გესლით არის სავსე.

¹⁵მათი ფეხები სწრაფია სისხლის დასაღვრელად.

¹⁶ნგრევა და უბედურებაა მათ გზებზე,

¹⁷მშვიდობის გზა არ იციან.

¹⁸ღმერთის შიში არ არის მათ თვალწინ.“

¹⁹ხოლო ჩვენ ვიცით, რომ რასაც რჯული ამბობს, რჯულის ქვეშ მყოფთათვის ამბობს, რათა დაიხშოს ყოველი ბაგე და მთელი ქვეყნიერება მსჯავრდებული გახდეს ღმერთის წინაშე.

²⁰იმიტომ რომ რჯულის საქმეებით ვერც ერთი ხორციელი ვერ გამართლდება მის წინაშე, რადგან რჯულით შეიცნობა ცოდვა.

²¹ხოლო ახლა, რჯულისგან დამოუკიდებლად, გამოჩნდა ღმერთის სიმართლე, რომელსაც მოწმობენ რჯული და წინასწარმეტყველნი,

²²ღმერთის სიმართლე იესო ქრისტეს რწმენით ყველა მორწმუნისათვის, რადგან არ არის განსხვავება,

²³რადგან ყველამ შესცოდა და ყველა მოკლებულია ღმერთის დიდებას,

²⁴და უსასყიდლოდ მართლდებიან მისი მადლით, ქრისტე იესოში გამოსყიდვით,

²⁵რომელიც წინასწარ დაადგინა ღმერთმა შენდობის მსხვერპლად რწმენის მეშვეობით, მისი სისხლით, რათა ადრე ჩადენილ ცოდვათა მიტევებით გამოჩენილიყო მისი სიმართლე ღმერთის სულგრძელებაში,

²⁶რათა ამჟამად გამოჩნდეს მისი სიმართლე იმით, რომ ის არის მართალი და იესოს მორწმუნის გამმართლებელი.

²⁷რაღა დაგვრჩა სასიქადულო? აღარაფერი, ყველაფერი გაუქმდა. რომელი რჯულით? საქმეთა რჯულით? არა, არამედ რწმენის რჯულით.

²⁸რადგან მიგვაჩნია, რომ რწმენით მართლდება კაცი, რჯულის საქმეთაგან დამოუკიდებლად.

²⁹განა ღმერთი მარტო იუდეველთა ღმერთია? განა წარმართებისაც არა? დიახ, წარმართებისაც.

³⁰რადგან ერთია ღმერთი, რომელიც რწმენის გამო ამართლებს წინადაცვეთილებს და ასევე წინადაუცვეთელებსაც.

³¹მაშ, ჩვენ რწმენით ვაბათილებთ რჯულს? არამც და არამც. არამედ განვამტკიცებთ რჯულს.