Read ქართული ბიბლია, სრული ვერსია 1 Corinthians 16 Bible Online

1 Corinthians 16 - ქართული ბიბლია, სრული ვერსია bible

1 Corinthians 16

¹რაც შეეხება წმიდათათვის შესაწირავს, როგორც გალატიის ეკლესიებს დავუწესე, თქვენც ისე მოიქეცით.

²კვირის პირველ დღეს თითოეულმა თქვენგანმა გადადოს და შეინახოს თავისი მონაგებიდან თავისთან, რათა ჩემი მოსვლისას არ იწყებოდეს შეგროვება.

³ხოლო როცა მოვალ, ვისაც თქვენ სცნობთ სანდოდ, იმათ მივავლენ წერილებით თქვენი ძღვენის წასაღებად იერუსალიმში.

⁴და თუ იქ ჩემი წასვლაც შესაფერი იქნება, მაშინ ჩემთან ერთად წამოვლენ.

⁵ხოლო მე მოვალ თქვენთან, როდესაც მაკედონიაზე გავივლი, რადგან მაკედონიაზე უნდა გავიარო.

⁶თქვენთან კი, შესაძლოა, გავჩერდე, ან იქნებ გამოვიზამთრო, რათა გამაცილოთ იქ, სადაც წავალ,

⁷რადგან ახლა არ მინდა თქვენი ნახვა გავლით, არამედ იმედი მაქვს რამდენიმე ხანს დავრჩე თქვენთან, თუ უფალი ინებებს.

⁸ხოლო ეფესოში დავრჩები ორმოცდაათობამდე,

⁹რადგან გაიღო ჩემთვის ღვაწლის დიდი კარი და მოწინააღმდეგენიც მრავლად არიან.

¹⁰და თუ ტიმოთე მოვა თქვენთან, ეცადეთ, რომ უსაფრთხოდ იყოს, რადგან ის უფლის საქმეს აკეთებს ისევე, როგორც მე.

¹¹ამიტომ არავინ შეურაცხყოს იგი. გამოისტუმრეთ მშვიდობით, რათა მოვიდეს ჩემთან, რადგან ველოდები მას ძმებთან ერთად.

¹²რაც შეეხება ძმა აპოლოსს, ძალიან ვეხვეწებოდი, რომ მოსულიყო თქვენთან ძმებითურთ, მაგრამ არ ისურვა ახლა წამოსვლა. მაგრამ მოვა, როცა შეძლებს.

¹³იფხიზლეთ, იდექით რწმენაში, იყავით მამაცნი, გამაგრდით!

¹⁴ყველაფერი თქვენი სიყვარულით იყოს.

¹⁵ხოლო შეგაგონებთ, ძმებო: თქვენ იცით, რომ სტეფანასის ოჯახი აქაიის პირველი ნაყოფია და რომ მათ თავიანთი თავი მიუძღვნეს წმიდათა მსახურებას.

¹⁶თქვენც პატივი მიაგეთ მათ და ყველას, ვინც თანამშრომელი და მოღვაწეა!

¹⁷და აი, მიხარია სტეფანას, ფორტუნატეს და აქაიკოსის მოსვლა, რადგან მათ შემივსეს თქვენი არყოფნა,

¹⁸და დაამშვიდეს ჩემი სულიც და თქვენიც. ამიტომ სცანით ასეთები!

¹⁹მოგიკითხავენ ასიის ეკლესიები. დიდად მოგიკითხავენ უფლის მიერ აკვილა და პრისკა და ასევე მათი საშინაო ეკლესია.

²⁰მოგიკითხავთ ყველა ძმა. მოიკითხეთ ერთმანეთი წმიდა ამბორით.

²¹მოგიკითხავთ ჩემი, პავლეს, ხელით.

²²ვისაც არ უყვარს უფალი, ანათემა მას! მარანათა — მოდი უფალო!

²³ჩვენი უფლის, იესო ქრისტეს მადლი იყოს თქვენთან,

²⁴და ჩემი სიყვარული ყველა თქვენგანთან ქრისტე იესოში!