Read ქართული ბიბლია, სრული ვერსია Philippians 1 Bible Online

Philippians 1 - ქართული ბიბლია, სრული ვერსია bible

Philippians 1

¹პავლე და ტიმოთე, ქრისტე იესოს მონები, ყველა წმიდას ქრისტე იესოში, რომელნიც ფილიპეში იმყოფებიან, ეპისკოპოსებითა და დიაკვნებითურთ:

²მადლი თქვენ და მშვიდობა ჩვენი მამა ღმერთისა და უფალი იესო ქრისტესაგან.

³ვმადლობ ჩემს ღმერთს თქვენს ყოველ გახსენებაზე.

⁴ჩემს ყველა ლოცვაში მუდამ სიხარულით ვევედრები ყოველი თქვენგანისათვის,

⁵სახარებაში თქვენი თანაზიარებისათვის პირველი დღიდან აქამომდე.

⁶დარწმუნებული ვარ, რომ დამწყები თქვენში კეთილი საქმისა აღასრულებს კიდეც მას იესო ქრისტეს დღემდე.

⁷სწორედაც რომ მმართებს ფიქრი ყოველ თქვენგანზე, რადგან გულში მყავარხართ, ჩემს ბორკილებში ყოფნისას, სახარების დაცვისას და განმტკიცებისას, თქვენ ყველანი თანაზიარნი ხართ ჩემს მადლში.

⁸რადგან ღმერთია ჩემი მოწმე, როგორ მენატრებით თქვენ ყველანი ქრისტე იესოს სიყვარულით.

⁹ამაზე ვლოცულობ, რომ უფრო და უფრო გაიზარდოს თქვენი სიყვარული შეცნობასა და ყველაფრის გაგებაში,

¹⁰რათა აირჩიოთ უმჯობესი და იყოთ წრფელნი და შეუბღალავნი ქრისტეს დღეს,

¹¹სიმართლის ნაყოფით აღვსილნი იესო ქრისტეს მიერ ღმერთის სადიდებლად და საქებრად.

¹²ძმებო, მსურს იცოდეთ, რომ ის, რაც მე გადამხდა, უფრო სახარების წარმატებისთვის მოხდა.

¹³ისე რომ, ჩემი ბორკილები ქრისტეში ცნობილი გახდა მთელი პრეტორიუმისათვის და ყველა დანარჩენთათვის.

¹⁴და გამხნევდა ძმათა უმრავლესობა უფალში ჩემი ბორკილებით და გაბედა, რომ უფრო მეტად და უშიშრად ელაპარაკა სიტყვა.

¹⁵თუმცა ზოგიერთნი შურით და ჯიბრით აკეთებენ ამას, მაგრამ ზოგნი კი კეთილი ზრახვით ქადაგებენ ქრისტეს.

¹⁶ესენი სიყვარულით მოქმედებენ, რადგან იციან, რომ სახარების დასაცავად ვარ დადგენილი.

¹⁷ზოგნი კი შურით ახარებენ ქრისტეს არაწრფელად, რადგან ფიქრობენ ჩემი ბორკილების დამძიმებას.

¹⁸მერედა რა! როგორც არ უნდა იქადაგონ ქრისტე — მოსაჩვენებლად თუ ჭეშმარიტებით, მიხარია ეს და კვლავაც გავიხარებ,

¹⁹რადგან ვიცი, რომ ეს მე ხსნამდე მიმიყვანს თქვენი ლოცვითა და იესო ქრისტეს სულის შეწევნით,

²⁰თანახმად მოლოდინისა და სასოებისა, რომ არაფერში არ შევრცხვები, არამედ მთელი სიცხადით, როგორც ყოველთვის, ისე ახლაც განდიდდება ქრისტე ჩემს სხეულში — სიცოცხლით იქნება თუ სიკვდილით,

²¹რადგან ჩემთვის სიცოცხლე ქრისტეა და სიკვდილი — მონაგები.

²²მაგრამ თუ ხორციელი ცხოვრება ჩემი საქმის ნაყოფის მომტანია, არ ვიცი, რა ამოვირჩიო.

²³შეჭირვებული ვარ ამ ორი მხრიდან: ძალზე მსურს გავიდე და ვიყო ქრისტესთან, რაკი ეს ბევრად უკეთესია,

²⁴ხორცში დარჩენა კი უფრო თქვენთვის არის საჭირო.

²⁵და მე დარწმუნებული ვარ, რომ დავრჩები და ვიქნები თქვენ ყველასთან ერთად თქვენი წარმატებისა და რწმენის სიხარულისათვის,

²⁶რათა ჩემ მიერ კიდევ უფრო გამრავლდეს თქვენი სიქადული ქრისტე იესოში, როცა კვლავ მოვალ თქვენთან.

²⁷ოღონდ ქრისტეს სახარების ღირსად მოიქეცით, რათა, ან როცა მოვალ და გნახავთ, ან თუ არ ვიქნები თქვენთან, მოვისმინო თქვენზე, რომ დგახართ ერთ სულში და ერთ სამშვინველში იღწვით სახარების რწმენისათვის.

²⁸ნურაფერში შეუშინდებით მოწინააღმდეგეს: ეს მათთვის დაღუპვის ნიშანია, თქვენთვის კი — ხსნისა. და ეს ღმერთისაგან არის,

²⁹რომ ქრისტეს გულისათვის მოგემადლათ თქვენ არა მარტო მისი რწმენა, არამედ მისთვის ტანჯვაც,

³⁰ისეთივე ღვაწლით, რომელიც ჩემში გიხილავთ და ახლაც გესმით, რომ ვიღვწი.