Read ქართული ბიბლია, სრული ვერსია Joshua 10 Bible Online

Joshua 10 - ქართული ბიბლია, სრული ვერსია bible

Joshua 10

¹და როცა გაიგო ადონი-ცედეკმა, იერუსალიმის მეფემ, რომ იესომ აიღო ქალაქი ღაი, დაარისხა იგი და გაანადგურა; და ისევე მოექცა ღაისა და მის მეფეს იესო, როგორც იერიხოსა და მის მეფეს; და რომ დაეზავნენ გიბეონელნი ისრაელს და დარჩნენ მათ შორის,

²ძლიერ შეშინდა ის, რადგან დიდი ქალაქი იყო გიბეონი, ერთ-ერთი სამეფო ქალაქივით, აღემატებოდა იგი ღაის და მამაცი მეომრები ჰყავდა.

³ამიტომ შეუთვალა ადონი-ცედეკმა, იერუსალიმის მეფემ, ჰოჰამს — ხებრონის მეფეს, ფირამს — იარმუთის მეფეს, იაფიაყს — ლაქიშის მეფეს და დებირს — ყეგლონის მეფეს, და უთხრა:

⁴„ამოდით ჩემთან და შემეწიეთ მე, და მოვსრათ გიბეონი, რადგან იგი დაეზავა იესოს და ისრაელიანთ.“

⁵და შეიყარა და ავიდა ხუთი ამორეველი მეფე: იერუსალიმისა, ხებრონისა, იარმუთისა, ლაქიშისა და ყეგლონისა მთელი თავიანთი ლაშქრით, დაიბანაკეს გიბეონთან, და ბრძოლა გაუმართეს მას.

⁶და შეუთვალეს გიბეონის კაცებმა იესოს გილგალის ბანაკში, და უთხრეს: „ნუ აიღებ ხელს შენს მსახურებზე. ჩქარა ამოდი ჩვენთან და გვიხსენი და შეგვეწიე, რადგან შეიყარა ჩვენს წინააღმდეგ ყველა ამორეველი მეფე — მთის მკვიდრნი.“

⁷და გავიდა იესო გილგალიდან მთელი ბრძოლისუნარიანი ხალხითა და მამაცი მებრძოლით.

⁸და უთხრა უფალმა იესოს: „ნუ გეშინია მათი, რადგან ხელში ჩაგიგდე ისინი, წინ ვერ დაგიდგება ვერცერთი მათგანი.“

⁹და ანაზდეულად მიადგა მათ იესო, გილგალიდან მთელი ღამის ნამგზავრი.

¹⁰და თავზარი დასცა მათ უფალმა ისრაელის წინაშე და შემუსრა ისინი იესომ დიდი შემუსვრით გიბეონში. დაედევნა ბეთ-ხორონის აღმართზე და მუსრავდა ყაზეკამდე და მაკედამდე.

¹¹და იყო, როცა ისინი ისრაელს გაურბოდნენ ბეთ-ხორონის ფერდობზე, უფალი დიდ ქვებს უშენდა ზეციდან მათ — და იხოცებოდნენ. ასე იყო თვით ყაზეკამდე. და ქვის სეტყვით დახოცილი უფრო მეტი იყო, ვიდრე ისინი, ვინც ისრაელიანთ მოსრეს მახვილით.

¹²მაშინ ელაპარაკა იესო უფალს იმ დღეს, როდესაც უფალმა ამორეველები ჩაუგდო ხელში ისრაელიანთ. და თქვა იესომ ისრაელის თვალწინ: „მზეო, შეჩერდი გიბეონზე და მთვარევ — აიალონის ველზე!“

¹³და შეჩერდა მზე, და მთვარე დადგა, ვიდრე არ იძია ერმა შური თავის მტრებზე. და განა არ სწერია ეს სიმართლის წიგნში:[2] და მზე იდგა შუაგულ ცაზე მთელ დღეს და ჩასვენებას არ ჩქარობდაო?

¹⁴და არ ყოფილა ასეთი დღე არც უწინ და არც მის შემდგომ, რომ ასე შეესმინოს უფალს კაცის ხმა, რადგან უფალი იბრძოდა ისრაელისთვის.

¹⁵და დაბრუნდა იესო და მასთან ერთად მთელი ისრაელი გილგალის ბანაკში.

¹⁶და გაიქცა ის ხუთი მეფე და დაიმალა მაკედას მღვიმეში.

¹⁷ამბავი მიუტანეს იესოს: ხუთი მეფე მაკედას მღვიმეში აღმოჩნდაო დამალული.

¹⁸და თქვა იესომ: „მიაგორეთ დიდი ლოდები მღვიმის პირს და კაცები დაუყენეთ ყარაულად.

¹⁹თქვენ ნუ შეჩერდებით, დაედევნეთ უკან თქვენს მტრებს და ზურგიდან შეუტიეთ, და ნუ დაანებებთ მათ თავიანთ ქალაქებში შესვლას, რადგან ხელში ჩაგიგდოთ ისინი უფალმა, თქვენმა ღმერთმა.“

²⁰და როცა მორჩნენ იესო და ისრაელის ძენი მათ მუსვრას საშინელი მუსვრით, ვიდრე მთლიანად არ გაანადგურეს, ხოლო გადარჩენილნი გაექცნენ მათ და შევიდნენ გამაგრებულ ქალაქებში.

²¹დაბრუნდა მთელი ხალხი იესოსთან მაკედას ბანაკში მშვიდობიანად. კაციშვილმა ვერ დაძრა ენა ისრაელის ძეთა წინააღმდეგ.

²²და თქვა იესომ: „გახსენით მღვიმის პირი და გამოიყვანეთ ჩემთან ის ხუთი მეფე მღვიმიდან.“

²³და გააკეთეს ასე, და გამოუყვანეს მას ის ხუთი მეფე მღვიმიდან: მეფე იერუსალიმისა, მეფე ხებრონისა, მეფე იარმუთისა, მეფე ლაქიშისა და მეფე ყეგლონისა.

²⁴და როცა გამოუყვანეს ეს ხუთი მეფე იესოს, მოუხმო იესომ მთელ ისრაელს და უთხრა მხედართმთავრებს, რომელნიც იყვნენ მასთან: „ახლოს მოდექით და ფეხი დაადგით ქედზე ამ მეფეებს.“ და ახლოს მოდგნენ და ქედზე დაადგეს მათ ფეხი.

²⁵და უთხრა იესომ თავის მხედართმთავრებს: „ნუ შეგეშინდებათ და ნურც შეძრწუნდებით, გაძლიერდით და განმტკიცდით, რადგან ასე მოექცევა უფალი ყველა თქვენს მტერს, ვისაც კი თქვენ შეებრძოლებით.“

²⁶და შემდეგ განგმირა ისინი იესომ, და ჩამოკიდა ხუთ ხეზე. და ასე ეკიდნენ ისინი ხეებზე საღამომდე.

²⁷და მზის ჩასვლისას ბრძანა იესომ და ჩამოხსნეს ისინი ხეებიდან, და გადაყარეს მღვიმეში, რომელშიც იმალებოდნენ, და დიდრონი ქვები მიაყარეს მღვიმის პირს. და ასეა დღევანდლამდე.

²⁸და მაკედა აიღო იესომ იმავე დღეს, და მოსრა იგი და მისი მეფე მახვილის პირით; დაარისხა ისინი და ყველა სულდგმული, რაც კი იქ იყო, არავინ დაუტოვებია ცოცხალი. და მაკედას მეფეს ისე მოექცა, როგორც იერიხოს მეფეს მოექცა.

²⁹და წავიდა იესო, და მთელი ისრაელი მასთან ერთად მაკედადან ლიბნასაკენ, და ბრძოლა გაუმართა ლიბნას.

³⁰და ხელში ჩაუგდო უფალმა ისიც და მისი მეფეც ისრაელს. და განგმირა მახვილის პირით იგი და ყველა სულდგმული, რაც კი იქ იყო; არავინ დაუტოვებია ცოცხალი. და მის მეფეს ისე მოექცა, როგორც იერიხოს მეფეს მოექცა.

³¹და წავიდა იესო, და მთელი ისრაელი მასთან ერთად, ლიბნადან ლაქიშისაკენ, და დაიბანაკეს მის ახლოს, და ბრძოლა გაუმართეს.

³²და ხელში ჩაუგდო უფალმა ლაქიში ისრაელს და აიღო იგი მეორე დღეს, და მოსრა მახვილის პირით იგი და ყველა სულდგმული, რაც კი იქ იყო, ისევე, როგორც ლიბნაში.

³³და მაშინ გამოვიდა ჰორამი, მეფე გეზერისა ლაქიშის საშველად, და იესომ განგმირა იგი და მისი ხალხი ისე, რომ არავინ დაუტოვებია მათგან ცოცხალი.

³⁴და წავიდა იესო, და მთელი ისრაელი მასთან ერთად, ლაქიშიდან ყეგლონისაკენ, და დაიბანაკა მის ახლოს, და ბრძოლა გაუმართა.

³⁵და იმავე დღეს აიღო იგი, და მოსრა მახვილის პირით ყოველი სული, ვინც იქ იყო, და იმავე დღეს გაანადგურა ისე, როგორც ლაქიში.

³⁶და წავიდა იესო, და მთელი ისრაელი მასთან ერთად, ყეგლონიდან ხებრონისაკენ და ბრძოლა გაუმართა.

³⁷აიღეს ხებრონი და მოსრეს იგი მახვილით მისი მეფითურთ, და ყველა მისი ქალაქი, და ყოველი სული, ვინც იქ იყო და არავინ დაუტოვებიათ ცოცხალი, როგორც ყეგლონში. მოსპეს იგი და ყოველი სული, ვინც იქ იყო.

³⁸და მობრუნდა იესო, და მთელი ისრაელი მასთან ერთად დებირისაკენ, და ბრძოლა გაუმართა.

³⁹და მან აიღო იგი, და მისი მეფეც და მისი ყველა ქალაქი, და განგმირა ისინი მახვილის პირით, და მოსპეს ყოველი სული, ვინც იქ იყო, არავინ დაუტოვებიათ ცოცხალი. როგორც მოექცნენ ხებრონს, ეგრე მოექცნენ დებირს და მის მეფეს, და ლიბნას და მის მეფეს.

⁴⁰და მოსრა იესომ მთელი მთიანეთი, სამხრეთი მხარე, ვაკობი, ფერდობები და ყველა მათი მეფე. არავინ დაუტოვებია ცოცხალი, და გაანადგურა ყოველი სული, როგორც უბრძანა ისრაელის უფალმა ღმერთმა.

⁴¹და მოსრა ისინი იესომ კადეშ-ბარნეაყიდან ვიდრე ღაზამდე, და მთელი ქვეყანა გოშენისა ვიდრე გიბეონამდე.

⁴²და ყველა ეს მეფე და მათი ქვეყანა აიღო იესომ ერთ ჯერზე, რადგან უფალი, ისრაელის ღმერთი, იბრძოდა ისრაელისთვის.

⁴³და დაბრუნდა იესო, და მთელი ისრაელი მასთან ერთად გილგალის ბანაკში.