Read ქართული ბიბლია, სრული ვერსია Joshua 13 Bible Online

Joshua 13 - ქართული ბიბლია, სრული ვერსია bible

Joshua 13

¹უკვე მოხუცი იყო იესო და დღეებს გარდასული, როცა უთხრა მას უფალმა: „შენ უკვე მოხუცი ხარ და დღეებს გარდასული, დასამკვიდრებელი მიწა-წყალი კი ძალიან ბევრი დარჩა.

²აჰა, მიწები, რომლებიც დაუნაწილებელი დარჩა: ფილისტიმელთა მთელი მხარე და გეშურელთა მთელი ქვეყანა.

³მთელი მიწა-წყალი შიხორიდან, ეგვიპტის საზღვართან რომ არის, და ყეკრონის ჩრდილოეთ საზღვრამდე, ქანაანის ნაწილად ითვლება; იქვე ფილისტიმელთა ხუთი სამთავრო: ღაზა, აშდოდი, აშკელონი, გათი და ყეკრონი. ეს არის ყავიმელთა მიწა-წყალი

⁴სამხრეთში. ეს ყოველივე ქანაანელთა მიწა-წყალია ციდონელთა მეყარადან აფეკამდე ედა ამორეველთა საზღვრებამდე.

⁵და გებალელთა ქვეყანა და მთელი ლიბანი მზის აღმოსავლეთით, ბაყალ-გადიდან, ხერმონის მთის ძირიდან, ხამათის მისასვლელამდე.

⁶მთის ყველა მკვიდრი ლიბანიდან მისრეფოთ-მაიმამდე, ყველა ციდონელს განვდევნი ისრაელის ძეთა წინაშე. ოღონდ წილისყრით გაუნაწილე სამკვიდროდ ისრაელს, როგორც მე გიბრძანე.

⁷და ახლა გაუნაწილე ქვეყანა სამკვიდროდ ცხრა ტომსა და მანაშეს ნახევარტომს.“

⁸მანაშეს ნახევარტომს (და მასთან ერთად რეუბენის ტომსა და გადის ტომს) უკვე მიღებული ჰქონდა თავიანთი სამკვიდრო მიწა, რომელიც მისცა მათ მოსემ იორდანეს გაღმა, მის აღმოსავლეთით. უფლის მსახურმა მოსემ მისცა მათ

⁹მიწა-წყალი დაწყებული ყაროყერიდან, არნონის ველზე რომაა, და ქალაქი, რომელიც არნონის ველზეა, და მთელი ვაკე მედებადან ვიდრე დიბონამდე,

¹⁰და ყველა ქალაქი სიხონისა, ამორეველთა მეფისა, რომელიც მეფობდა ხეშბონში (ყამონელთა საზღვრამდე),

¹¹ასევე გალაადი და მხარე გეშურელთა, და მაყაქათელთა, და მთელი ხერმონის მთა და მთელი ბაშანი ვიდრე სალქამდე

¹²(მთელი მიწა-წყალი ყოგისა, ბაშანის მეფისა, რომელიც მბრძანებლობდა ყაშთაროთსა და ედრეყში; ისღა იყო რეფაიმელთა უკანასკნელი ნატამალიდან). ეს მეფეები სძლია მოსემ და დაეპატრონა მათ მიწა-წყალს.

¹³და არ განუდევნიათ ისრაელიანთ გეშურელნი და მაყაქათელნი — ისინი დღემდე ცხოვრობენ ისრაელიანთა შორის.

¹⁴მხოლოდ ლევის ტომისთვის არ მიუცია მოსეს წილი. მათი წილი არის უფლის, ისრაელის ღმერთის, მსხვერპლები, როგორც უთხრა უფალმა მოსეს.

¹⁵და მისცა მოსემ რეუბენის ძეთა ტომს საგვარეულოების მიხედვით.

¹⁶მათი მიწა-წყალი იწყებოდა ყაროყერიდან, არნონის ველზე რომ არის, და ქალაქი, რომელიც არნონის ველზეა, და ასევე მთელი ვაკე, მედებამდე,

¹⁷ხეშბონი და ყველა ქალაქი, რომელიც მის გვერდითაა ვაკობზე, — დიბონი, ბამოთ-ბაყალი და ბეთ-ბაყალ-მეყონი,

¹⁸იაჰცა, კედემოთი, მეფაყათი,

¹⁹კირიათაიმი, სიბმა, ცერეთ-შახარი, რომელიც ყემეკის მთაზეა,

²⁰ბეთ-ფეღორი, ფისგას კალთები და ბეთ-იეშიმოთი —

²¹ვაკის ყველა ქალაქი და მთელი სამეფო სიხონისა, ამორეველთა მეფისა, რომელიც მეფობდა ხეშბონში, რომელიც მოსრა მოსემ, ის და მიდიანელი სარდლები: ევი, რეკემი, ცური, ხური და რებაყი, მკვიდრნი ამ ქვეყნისა.

²²და ბალაამი, ძე ბეყორისა, მისანი, მოკლეს ისრაელის ძეთ მახვილით, მათ მიერ სხვა მოკლულთა რიცხვში.

²³და რეუბენის ძეთა საზღვრად იყო იორდანე. რეუბენის ძეთა წილ-ხვედრი იყო მათი საგვარეულოების მიხედვით, ქალაქები და მათი სოფლები.

²⁴და გამოუყო მოსემ სამკვიდრო გადის ტომს, გადის ძეთ, მათი საგვარეულოების მიხედვით.

²⁵და იყო მათი სამკვიდრო იაყზერი, და გალაადის ყველა ქალაქი, და ყამონელთა ნახევარი ქვეყანა ვიდრე ყაროყერამდე, რაბას ახლოს რომ არის,

²⁶და ხეშბონიდან ვიდრე რამათ-მიცფემდე და ბეტონიმამდე, და მახანაიმიდან დებირის საზღვრამდე,

²⁷და ველზე: ბეთ-ჰარამი, ბეთ-ნიმრა, სუქოთი, ცაფონი და სიხონის, ხეშბონის მეფის, სამეფოს დარჩენილი ნაწილი. იორდანე ესაზღვრებოდა მას ქინერეთის ზღვის კიდემდე, იორდანეს გაღმა, აღმოსავლეთით.

²⁸ეს იყო სამკვიდრო გადის ძეთა მათი საგვარეულოების მიხედვით, ქალაქები და მათი სოფლები.

²⁹და მისცა მოსემ მანაშეს ნახევარტომს სამკვიდრო, და ეს იყო მანაშეს ძეთა ნახევარტომისა, მათი საგვარეულოების მიხედვით.

³⁰და იყო საზღვარი მათი: მახანაიმიდან მთელი ბაშანი, მთელი სამეფო ყოგისა, ბაშანის მეფისა, და ყველა სოფელი იაირისა, რომელიც ბაშანშია — 60 ქალაქი.

³¹და ნახევარი გალაადი, და ყაშთაროთი, და ედრეყი — ყოგის სამეფოს ქალაქები ბაშანში ერგოთ მანაშეს ძის, მაქირის, შთამომავლებს, მაქირის ძეთა ნახევარს, მათი საგვარეულოების მიხედვით.

³²ეს არის, რაც გაანაწილა მოსემ მოაბის ვაკობზე, იორდანეს აღმოსავლეთით — იერიხოს მდინარისა.

³³ლევის ტომისთვის არ მიუცია მოსეს სამკვიდრო. მათი სამკვიდრ — ასე უთხრა მათ მოსემ — თავად უფალი, ისრაელის ღმერთია.