Read ქართული ბიბლია, სრული ვერსია Joshua 17 Bible Online

Joshua 17 - ქართული ბიბლია, სრული ვერსია bible

Joshua 17

¹ეს იყო მანაშეს ტომის წილი, რადგან ის იოსების პირმშო იყო. ხოლო მაქირს, მანაშეს პირმშოს, გალაადის მამას, ერგო გალაადი და ბაშანი, რადგან ის მეომარი კაცი იყო.

²და ერგოთ მიწები მანაშეს დანარჩენ ძეებსაც მათი საგვარეულოების მიხედვით: აბიყეზერის ძეთ, ხელეკის ძეთ, ასრიელის ძეთ, შექემის ძეთ, ხეფერის ძეთ და შემიდაყის ძეთ. ესენი არიან მანაშეს შთამომავლები, იოსების ძისა, მათი საგვარეულოების მიხედვით.

³ხოლო ცელოფხადს, ხეფერის ძეს, გალაადის ძეს, მაქირის ძეს, მანაშეს ძეს არ ჰყავდა ძენი, არამედ ასულნი. და მის ასულებს ერქვათ: მახლა, ნოყა, ხოგლა, მილქა და თირცა.

⁴და წარდგნენ ისინი ელეაზარ მღვდლის, იესო ნავეს ძისა და მთავართა წინაშე და თქვეს: „უფალმა უბრძანა მოსეს, რომ მოეცა ჩვენთვის სამკვიდრო ჩვენს მოძმეთა შორის.“ და მისცა მათ, უფლის ბრძანებისამებრ, სამკვიდრო მათი მამის ძმებს შორის.

⁵და ერგო მანაშეს ათი ნაკვეთი, გარდა გალაადისა და ბაშანის მიწებისა, რაც იორდანეს გაღმა იყო.

⁶რადგან მანაშეს ძეთა ასულებმა დაიმკვიდრეს სამკვიდრო მის ძეთა შორის. ხოლო გალაადის ქვეყანა ერგო მანაშეს დანარჩენ ძეებს.

⁷მანაშეს ძეთა საზღვარი გადიოდა აშერიდან მიქმეთათამდე, შექემის პირდაპირ რომ არის. იქიდან საზღვარი მიდიოდა მარჯვნივ, ყენ-თაფუახისკენ.

⁸მანაშეს ერგო თაფუახის ქვეყანა. ხოლო ქალაქი თაფუახი მანაშეს საზღვართან ეფრემის ძეთ ერგოთ.

⁹და ეშვებოდა საზღვარი კანას ხევისკენ, ხევის სამხრეთით. ეს ქალაქები ერგო ეფრემს, თუმცა მანაშეს ქალაქებს შორის მდებარეობდა. მანაშეს სამკვიდროს საზღვარი ხევის ჩრდილოეთ მხარეს იყო, და ზღვასთან წყდებოდა.

¹⁰სამხრეთით ეფრემისა იყო, ჩრდილოეთით — მანაშესი; ზღვა იყო მათი გამმიჯნავი. აშერს ისინი ეკვროდნენ ჩრდილოეთიდან, ისაქარს — აღმოსავლეთიდან.

¹¹ისაქარისა და აშერის საზღვრებში მანაშეს ერგო ბეთ-შეანი, იბლეყამი, დორი ყენ-დორი, თაყანაქი და მეგიდო, მათ ირგვლივ მდებარე დაბებითურთ. მესამე ამ ქალაქთაგან ნაფეთ-დორში მდებარეობდა.

¹²მაგრამ მანაშეს შთამომავლებმა ვერ შეძლეს ამ ქალაქების დაუფლება, და დარჩნენ ქანაანელნი ამ მიწა-წყალზე საცხოვრებლად.

¹³და როცა მომძლავრდნენ ისრაელიანები, მოხარკეებად გაიხადეს ქანაანელები, მათ მიწებს კი ვერ დაეუფლნენ.

¹⁴ელაპარაკნენ იოსების შთამომავალნი იესოს და უთხრეს: „რატომ მოგვეცი მხოლოდ ერთი წილი სამკვიდრო და მხოლოდ ერთი ნაკვეთი? ჩვენ ხომ მრავალრიცხოვანი ხალხი ვართ, რადგან ასე გვაკურთხა ჩვენ უფალმა!“

¹⁵და უპასუხა მათ იესომ: „თუ მრავალრიცხოვანი ხალხი ხართ, ადით ტყეში და გატეხეთ იქ თქვენთვის ახო ფერიზელთა და რეფაიმელთა მიწაზე, რაკი ეფრემის მთა გევიწროვებათ.“

¹⁶და უთხრეს იოსების მემკვიდრეებმა: „არ შეგვრჩება ეს მთა, რადგან რკინის ეტლები აქვთ ბარში მცხოვრებ ქანაანელთ, იმათაც, ვინც ბეთ-შეანში არიან და მის სოფლებში, და იმათაც, ვინც იზრეყელის ველზე არიან.“

¹⁷და უთხრა იესომ იოსების, ეფრემისა და მანაშეს სახლს ასე: „მრავალრიცხოვანი ხალხი ხართ და ძალაც დიდი გაქვთ, ამიტომ არ უნდა გქონდეთ ერთი წილი.

¹⁸მთა თქვენი იქნება, ტყიანი კია, მაგრამ ახოს გატეხავთ და თავიდან ბოლომდე თქვენი იქნება, რადგან განდევნით ქანაანელთ, თუმცა მათ რკინის ეტლები აქვთ; და თუმცა ისინი ძლიერნი არიან, მაინც დაიმკვიდრებთ მათ მიწა-წყალს.“